الماتىنىڭ اۋاسىن لاستاپ كەلگەن كاسىپورىندار 78 ملن تەڭگە ايىپپۇل تولەدى.

الماتى - لاس قالالاردىڭ قاتارىنان ەمەس. ەكولوگتار بۇل تۇسىنىكتىڭ جاڭساق ەكەندىگىن جەتكىزدى. مۇنداي اقپاراتتاردى جوققا شىعارىپ شارشاعان سالا ماماندارى ونىڭ قايدان شىعاتىنىن بىلمەي دال. ايتۋلارىنشا، اۋانىڭ لاستانۋ دەڭگەيى وتكەن جىلدارمەن سالىستىرعاندا ەداۋىر تومەندەگەن.

قالانىڭ باس ەكولوگى كەي اقپارات قۇرالدارىنىڭ الماتىعا نەلىكتەن «لاس قالا» دەگەن اتاۋ بەرگەنىن تۇسىنبەيدى ەكەن. ال رەسمي دەرەك باسقاشا. اتموسفەراعا بولىنەتىن زياندى زاتتار ەداۋىر تومەندەگەن. ءبىراق بۇل سالا باقىلاۋدى قاجەت ەتەدى. 2 جىل كولەمىندە ماماندار جۇزدەن استام تەكسەرىس ۇيىمداستىرىپتى. سالدارىنان اۋانى لاستاپ كەلگەن كاسىپورىندار مەملەكەتكە 78 ميلليون تەڭگە ايىپپۇل تولەگەن. 

«تەكسەرىس بارىسىندا اۋانى شامادان تىس لاستاپ كەلگەن كاسىپورىندار انىقتالدى، ياعني 13 دەرەك تىركەلدى. سونىمەن قاتار، 45 ءوندىرىس ورنى قورشاعان ورتادا جۇمىس ىستەۋ رۇقساتىن الماعان. ناتيجەسىندە ولارعا ايىپپۇل سالىنىپ، شىعىن كولەمىن وتەۋ مىندەتتەلدى»، - دەدى  الماتى قالاسى ەكولوگيا دەپارتامەنتىنىڭ باسشىسى ورمان اققوزييەۆ.

ەلىمىزدەگى  اۋا رايىنىڭ بولجامىن جاسايتىن باستى مەكەمە ماماندارىنىڭ سوزىنشە، قولايسىز اۋا رايى سالدارىنان اقپان ايىندا اۋا كوپ لاستانىپتى.

«قاڭتار ايىندا كۇننىڭ سۋىق بولۋى سالدارىنان اۋا لاستانۋىنىڭ كورسەتكىشى جاقسى بولدى. ال اقپاندا كۇننىڭ كۇرت جىلىنۋى ەسەبىنەن بەلگىلەنگەن مەجەدەن اسىپ ءتۇستى. ناۋرىز ايىندا مۇنداي تەرىس كورسەتكىشتەر بايقالمايدى»، - دەدى «قازگيدرومەت» رمك الماتى قالاسى بويىنشا فيليالىنىڭ حيميالىق-ساراپتامالىق تالداۋ ءبولىمىنىڭ باسشىسى ءلايلا ءادىلوۆا.

اۋانى لاستايتىن ءوندىرىس ورىندارىن كوگىلدىر وتىنعا الماستىرۋ ماسەلەسى دە ءوز شەشىمىن تاۋىپ كەلەدى. وعان دالەل الماتىداعى 1ء-شى جىلۋ ەلەكتر ستانسياسى. بۇل كاسىپورىن 2016 جىلدان بەرى گازبەن جۇمىس ىستەپ كەلەدى.

«2016 جىلى اكىمدىك پەن ەنەرگەتيكا مينيسترلىگى مەموراندۋم، شەشىم ارقاسىندا جەس-1 تەك گازبەن جۇمىس ىستەيتىن بولدى»، - دەدى الماتى قالاسى جەس-1 باسقارۋشى ديرەكتورى عالىم جاڭبىرشى.

جوسپاردان تىس تەكسەرۋ ودان ءارى جالعاسىن تاپپاق. ەكولوگتاردىڭ ايتۋىنشا، ول تۇرعىنداردىڭ جاساعان شاعىمى ەسەبىنەن جۇرگىزىلەدى. اۋانىڭ تازالىعىن عانا ەمەس، سۋدىڭ جانە توپىراقتىڭ دا قۇرامىن قالت جىبەرمەيمىز دەپ وتىر.