ەلباسى جاڭا زامانعا ساي بولۋ ءۇشىن ءتورتىنشى ونەركاسىپتىك ريەۆوليۋسيا جاعدايىنداعى تاريحي ورلەۋ  باستاۋىندا تۇرعان  ءبىرتۇتاس ۇلت بولۋىمىز ءۇشىن 10 باعىتتى ايقىنداپ بەرگەن ەدى. «جەمقورلىقپەن كۇرەس  جانە زاڭنىڭ ۇستەمدىگى» اتتى توعىزىنشى باعىتىندا جەمقورلىقتىڭ الدىن الۋعا باعىتتالعان كۇرەستىڭ جالعاسى بەرەتىنىن ايتتى. سوعان وراي  «نۇر وتان» پارتياسى باتىس قازاقستان  وبلىستىق فيليالى جانىنداعى سىبايلاس جەمقورلىققا قارسى ءىس-قيمىل جونىندەگى قوعامدىق كەڭەستىڭ وتىرىسى وتكەن بولاتىن.

باسقوسۋدا بقو ادىلەت دەپارتامەنتى باسشىسىنىڭ مىندەتىن اتقارۋشى حاميدوللا قۇسداۋلەتوۆ وبلىستاعى ادىلەت قۇرىلىمدارىندا 2015-2017 جىلدار ىشىندە جەمقورلىققا قارسى ارەكەت ەتۋ جۇمىستارى تۋرالى باياندادى. ونىڭ ايتۋىنشا، وتكەن جىلى وبلىستاعى ادىلەت قۇرىلىمدارىنا جەكە جانە زاڭدى تۇلعالاردان 149 شاعىم تۇسكەن. بارلىق ءوتىنىش پەن ارىزدار زاڭمەن بەكىتىلگەن مەرزىم ىشىندە قارالعان. مەملەكەتتىك قىزمەتتەردىڭ ساپالى ءارى ۋاقتىلى كورسەتىلۋىنە          تۇراقتى تۇردە مونيتورينگ جۇرگىزىلىپ وتىرادى.

ماجىلىستە سونداي-اق «نۇر وتان» پارتياسى شىڭعىرلاۋ اۋداندىق فيليالىندا پارتيانىڭ «سىبايلاس جەمقورلىققا قارسى ءىس-قيمىلدىڭ 2015-2025 جىلدارعا ارنالعان باعدارلاماسىنىڭ» ورىندالۋ بارىسى تۋرالى اۋدان اكىمى، فيليال ءتوراعاسى البەرت ەسالييەۆ باياندادى.

– «سيفرلىق قازاقستان» باعدارلاماسى شەڭبەرىندە اۋداننىڭ سەگىز اۋىلدىق وكرۋگىندە تۇرعىنداردىڭ وز-وزىنە قىزمەت كورسەتۋ ورتالىقتارى اشىلدى. بۇل جۇمىس ەڭ الدىمەن ەلەكتروندى قىزمەت سانىنىڭ جانە اۋىل حالقىنىڭ كومپيۋتەرلىك ساۋاتتىلىعىنىڭ ارتۋىنا باعىتتالىپ وتىر. دەگەنمەن كەيبىر قىزمەت كورسەتۋ ورىندارىندا قيىندىقتار تۋىنداپ وتىر. بۇعان سەبەپ – ينتەرنەت جەلىسى جىلدامدىعىنىڭ ناشارلىعى. بۇل ماسەلەنى شەشۋ ءۇشىن ءتيىستى قۇرىلىمدىق مەكەمەلەرگە ۇسىنىستار ەنگىزىلۋدە، – دەدى ول.

باسقوسۋدا تۇرعىندار تاراپىنان جەكە سوت ورىنداۋشىلاردىڭ جۇمىسىنا كوپ سىن ايتىلاتىنى، قوجالىق ورنالاسقان جەر تەلىمىن ءوز اتىنا، نە تۋىسىنا اۋدارۋدا كەيبىر ادامداردىڭ قيىندىقتارعا كەزىگىپ جاتاتىنى كەڭ تالقىلاندى. قازىرگى اقپاراتتىق تەحنولوگيا دامىعان كەزەڭدە اۋداندىق ادىلەت باسقارماسى سايتىنىڭ ىسكە قوسىلماۋى دا سىنعا الىندى.