وتكەن اپتادا ق ر ۇكىمەتىنىڭ كەزەكتى وتىرىسى ءوتتى. وندا ءسوز سويلە­گەن دەنساۋلىق ساقتاۋ ءمينيسترى ەلجان ءبىرتانوۆ الماتى قالاسىندا بىرىكتىرىل­گەن ۋنيۆەرسيتەتتىك اۋرۋحانا قۇرۋ جوباسى بويىنشا جۇمىستار ءجۇرىپ جاتقانىن اتاپ ايتتى.

ءمينيستردىڭ سوزىنە سۇيەنسەك، الماتىدا قۇرىلاتىن ۋنيۆەرسي­تەتتىك اۋرۋحانا مەملەكەتتىك-جەكەمەنشىك ارىپتەستىك (ءمجا) بويىنشا سالىنادى ەكەن. ونىڭ ۇستىنە، ول الماتىداعى قازۇمۋ جانىنداعى بەس رەسپۋبلي­كالىق عىلىمي زەرتتەۋ ورتالىقتارىن ىقپالداستىرۋ ارقىلى 1265 توسەك ورىنعا ارناپ سالىناتىن بولىپتى. ءسويتىپ، ءقازىر بۇل جوبانى جۇزەگە اسىرۋ ۇلتتىق ەكونوميكا مينيسترلىگىنىڭ ەكونوميكالىق ساراپتاماسىنان ءوتۋ كەزەڭىندە تۇر ەكەن. سونداي-اق، «دەنساۋ­لىق» اتتى ەلىمىز­دەگى دەنساۋلىق ساق­تاۋدى دامىتۋ مەملەكەتتىك باعدارلا­ماسىن جۇزەگە اسىرۋ ماقساتىندا دەنساۋلىق ساقتاۋ مينيسترلىگىمەن كەلىسە وتىرىپ، ءوڭىر اكىمدىكتەرىمەن بىرگە جۇيەنى بىرتە-بىرتە قايتا قۇرۋ جانە 2025 جىلعا دەيىنگى ۇزاق مەرزىمدى كەزەڭدە ينۆەستيسيالىق قاجەتتىلىكتى شەشۋ تۇرعىسىندا  بيىل­دان باستاپ امبۋلاتوريالىق دەڭگەيدەگى ەمحانالىق سەكتوردىڭ وڭىرلىك بولاشاق جوسپار­لارى نەگىزىندە ينۆەستيسيانى جوسپارلاۋ جۇيەسىن ەنگىزۋ جۇمىستارى ءجۇرىپ جاتىر. سونىمەن قاتار، ستاسيو­نارلىق دەڭگەيدە حالىقارالىق قارجى ۇيىم­دارىمەن بىرلەسە وتىرىپ، ءمجا-نىڭ ۇزدىك ينفراقۇرىلىمدىق ءتاجىري­بەسى مودەلىن قولدانۋ ۇسىنىلىپ وتىر.