قازاق تىلىندەگى «100 جاڭا وقۋلىق» ماڭىزدىلىعى جايلى جوبا قاتىسۋشىلارىنىڭ ءبىرى ايتىپ ءوتتى.

ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ عىلىمي جۇمىستار بويىنشا پرورەكتورى، فيلوسوفيا عىلىمدارىنىڭ دوكتورى ساعادي بولەكبايەۆ «قازاق تىلىندەگى 100 جاڭا وقۋلىق» جوباسىن ىسكە اسىرعان توپتىڭ بىرىندە ەڭبەك ەتىپ كەلەدى.

بۇگىن رەمي حەسستىڭ «فيلوسوفيا بويىنشا 25 نەگىزگى كىتاپ: تالداۋ مەن پىكىرلەر» وقۋلىعىنىڭ قازاق تىلىندەگى نۇسقاسى شىعارىلدى. وقۋلىقتى فرانسۋز تىلىنەن ايىمجان رىسكييەۆا مەن اسەت قۇرامبەك اۋدارعان. ال باسىلىمنىڭ عىلىمي رەداكتورى فيلوسوفيا مەن ءتىلدىڭ بەدەلدى مامانى، فيلوسوفيا عىلىمدارىنىڭ دوكتورى داۋلەتبەك رايەۆ بولسا، ساعادي بولەكبايەۆ جاۋاپتى رەداكتورى قىزمەتىن اتقارعان.

«كىتاپ ادام مەن قوعام ويىنىڭ قالىپتاسۋ بارىسىن اشادى. فيلوسوفيا تاريحىن ادام ويلاۋىنىڭ دامۋ تاريحى دەۋگە بولادى. بۇل كونتەكستە كوپتەگەن فيلوسوفتار ەڭبەك ەتكەن جانە ارقايسىسى ءوز ەڭبەگىنىڭ ناتيجەسىن قالدىرعان. پلاتون ماحاببات تۋرالى ايتسا، اريستوتەل - ساياسات پەن ەتيكا، ال كانت باقىت نۇرىنا بولەنگەن اۆگۋستين مەن ءدىندى تانۋعا ءوز سەپتىگىن تيگىزسە، كارل ماركس يدەولوگيانى زەرتتەگەن. ادامنىڭ ويى مەن فيلوسوفيانىڭ دامۋىنا بۇل سالانىڭ ءاربىر كورنەكتى ازاماتى ءوز ۇلەسىن قالدىرىپ كەتكەن»، - دەيدى ساعادي بولەكبايەۆ.

«كونە فيلوسوفيادان الىپ مۇرا قالعان. ولاردىڭ باسىم بولىگى ورىس نە وزگە تىلدەردە ساقتالعان. سول سەبەپتى ستۋدەنتتەردىڭ ونى تولىق وقىپ، ۇيرەنۋىنە مۇمكىندىك جوقتىڭ قاسى. اۋدارىلعان كىتاپتىڭ كومەگىمەن ستۋدەنتتەر ادام ويىنىڭ ەفوليۋسياسىنا جانە فيلوسوفيالىق ويلاردىڭ دامۋىنا قىسقا دا نۇسقا شولۋ جاساۋعا مۇمكىندىك الادى»، - دەيدى ول.

ونىڭ ايتۋىنشا، جوو ستۋدەنتتەرى فيلوسوفيا، سانا، رۋحانيات سالالارىنداعى قىزىق ءارى ماڭىزدى جاڭالىق اشۋ ءۇشىن وزگە تىلدەن اۋدارۋعا ەش ۋاقىت جۇمساماي، قول جەتكىزە الادى. وعان قوسا، فيلوسوفيا بويىنشا قازاق تىلىندەگى وقۋلىقتار بۇگىندە تاپشى.

«ارينە، وقۋلىقتاردىڭ ورىس تىلىندەگى نۇسقالارى بار. ءبىراق ونى ەكىنشى تىلدەن اۋدارساق، كىتاپتىڭ ماعىناسى، ەرەكشەلىگى مەن ارتىقشىلىعى جوعالادى»، - دەيدى فيلوسوفيا عىلىمدارىنىڭ دوكتورى.

ونىڭ ايتۋىنشا، وقۋلىق فيلوسوفيا ساباقتارىندا قولدانىلماق. سونىمەن قاتار، ايماقتانۋ جانە ساياساتتانۋ سىندى گۋمانيتارلىق سالالاردى قامتيدى.

وقۋلىق تارالىمى - 10 مىڭ. سونداي-اق، ونىڭ ەلەكتروندى نۇسقاسى دا قولدانىلۋعا بەرىلمەك. ال جوو-دا وقۋلىق 1 قىركۇيەكتەن قولدانىلۋعا بەرىلەدى.

البەرت احمەتوۆ