25 تامىزدا قاتەرلى ىسىكتەن كوز جۇمعان اقش سەناتورى دجون ماككەين امەريكالىقتار ءۇشىن قوشتاسۋ حاتىن جازىپ قالدىرىپتى.
«پاتريوتيزم ۇعىمىن الەمنىڭ ءار بۇرىشىندا زورلىق پەن قاتىگەزدىك، رەنىشكە اكەپ سوعاتىن باسەكەلەستىك ۇعىمىمەن شاتاستىرىپ الساق، ۇلىلىعىمىزدىڭ قۇنى كوك تيىن. ارمان-ماقساتتارىمىزدان كۇدىكتەنىپ، ولاردىڭ ورىندالۋىنا ءوزىمىز كەدەرگى جاساپ، باسەكەلەستىك دەگەن تۇسىنىكتەن ارىلمايىنشا پاتريوتتىعىمىز وسالداي بەرمەك»، - دەلىنگەن حاتىندا.
سونىمەن قاتار، ماككەين اسكەر مەن ساياساتتىڭ ارقاسىندا ەلگە بىرنەشە جىلدار بويى قىزمەت ەتۋ باقىتى بۇيىرعانى ءۇشىن امەريكالىقتارعا زور العىسىن ءبىلدىردى. ول امەريكالىقتاردى مەملەكەتتىڭ باسىنا تونگەن قيىندىقتار ءۇشىن مويىماۋعا ءارى اقش-تىڭ بولاشاعىنا سەنۋگە شاقىردى.
«مەن ەلىمە ابىرويمەن قىزمەت ەتۋگە تىرىستىم. ءيا، قاتەلىكتەر بولدى، ءبىراق امەريكاعا دەگەن ماحابباتىم ول قاتەلىكتەردىڭ ۇشىن دا كورسەتپەيدى دەپ ۇمىتتەنەمىن»، - دەپ جازدى ساياساتكەر ءوزىنىڭ حاتىندا.
سەناتوردىڭ سوزىنشە، اقش تالاي ادامدى كەدەيشىلىكتەن، زورلىق زومبىلىقتان قۇتقاردى، ەركىن ەتتى، ازات ەتتى. «امەريكالىقتار ەشقاشان كەتپەيدى. ءبىز بەرىلمەيمىز، تاريحتان قاشپايمىز. ءبىز تاريحتى جاسايمىز، ونى بيلەيمىز. قوش بولىڭدار، امەريكالىقتار، سەندەرگە، امەريكاعا قۇداي جار بولسىن»، - دەپ جازىپ كەتىپتى ماككەين.
ەسكە سالا كەتەيىك، اقش سەناتورى اريزونا دجون ماككەين 81 جاسقا كەلگەندە باقيلىق بولدى. سوڭعى جىلدارى ساياساتكەر قاتەرلى ىسىك دەرتىنە شالدىعىپ، ەم الىپ جۇرگەن ەدى. الايدا اسقىنعان دەرتتەن ايىقپاسىن بىلگەن ماككەين حيميالىق ەمدەۋدەن باس تارتىپ، اجالىن ءوزى قارسى الدى.
