جاڭا وقۋ جىلى قارساڭىندا استانا قالاسى اكىمدىگىندە ەلوردا اكىمى اسەت يسەكەشيەۆتىڭ توراعالىعىمەن قوعامدىق كولىكتىڭ ماسەلەسى بۇگە-شۇگەسىنە دەيىن قارالدى، دەپ حابارلايدى استانا قالاسى اكىمدىگىنىڭ رەسمي سايتى. 

جيىندى اشقان اكىم بىردەن وسى جۇمىسقا جەتەكشىلىك جاساپ وتىرعان اكىمنىڭ ورىنباسارىن، ترانسپورت جانە جول-كولىك ينفراقۇرىلىمىن دامىتۋ باسقارماسىنىڭ باسشىسىن، «استانا LRT» ج ش س مەن استانالىق اۆتوبۋس پاركتەرىن قاتتى سىنعا الۋمەن باستادى. ول سونداي-اق الەۋمەتتىك جەلى مەن «iKomek» جەدەل ارەكەت ەتۋ ورتالىعى ارقىلى ۇنەمى تۇرعىنداردىڭ  رەاكسياسىن باقىلاپ وتىراتىنىن دا ايتا كەتتى. 

«بارلىق داۋلى ماسەلەنى وقۋ جىلى باستالماي تۇرىپ شەشۋ كەرەك ەدى. جۇمىس ىستەمەي تۇرعان ۆاليداتورلارعا بولا ادامدارعا اۆتوبۋس كۇتتىرىپ قويۋ سىلتاۋ ەمەس»، - دەدى اسەت يسەكەشيەۆ. 

ونىڭ ايتۋىنشا، قوعامدىق كولىكتىڭ جۇمىسىن سۋبسيديالاۋعا مەملەكەت قاجەتتى قاراجات كولەمىن بولگەن. لينياداعى اۆتوبۋستاردىڭ شىعۋىن 90-95% پايىز قامتي المايتىن اۆتوپاركتەر مەن استانالىق جولاۋشىلاردىڭ جايلىلىعى مەن قاۋىپسىزدىك سەرۆيسىن قامتاماسىز ەتە الماعانداردى كەلىسىمشارتتان ايىرىپ، ورنىن باسقا اۆتوپاركتەر الماستىرادى. 

اكىم بارلىق ۆاليداتورلاردىڭ جۇمىسىن رەتكە كەلتىرۋگە تاپسىرما بەردى، ولاي بولماعان جاعدايدا مارشرۋتتاعى ترانسپورت بىرلىكتەرىنىڭ سانىن قىسقارتپاستان بارلىق جولاۋشىلاردىڭ تەگىن ءجۇرۋىن قامتاماسىز ەتۋىن تاپسىردى. 

«ۆاليداتورلاردىڭ تۇراقتى جۇمىس ىستەپ تۇرۋىن قامتاماسىز ەتە المايسىزدار ما، وندا ادامداردى تەگىن تاسىمالداڭىزدار»، - دەپ مالىمدەدى يسەكەشيەۆ. 

بۇدان باسقا، اكىم اۆتوبۋس قوزعالىسىن باقىلاپ وتىراتىن GPS-مونيتورينگتىڭ جۇمىس ىستەمەيتىنىن جانە ونىڭ جولاۋشىلارعا ايتارلىقتاي قولايسىزدىق تۋعىزاتىنىن ايتتى. ەلەكتروندى تابلونىڭ ايىرماشىلىعى 3-5 مينۋتتان اسپاۋى ءتيىس. 

جيىن بارىسىندا كارتانى تولتىرۋدىڭ ۇزاق ۋاقىت الاتىنىن ياعني 36 ساعات كەتەتىنى دە ءسوز بولدى. 

«كارتانى تولتىرۋعا كەتەتىن ۋاقىت 3 ساعاتتان ارتىق بولماۋى ءتيىس، سول ءۇشىن ءىس جۇزىندە ونى بىرنەشە مينۋتتىڭ ىشىندە بولاتىنداي ەتۋى كەرەك. جۇرگىزۋشىلەر ۆاليداتوردى قايتادان جۇكتەپ، تولەمدى ەرتەرەك تۇسەتىن ەتۋى قاجەت» - دەپ تاپسىردى اكىم. 

ول سونداي-اق «استانا LRT» جشس-نە تامىزدىڭ اياعىنا دەيىن جولاقىنى تولەۋدىڭ قوسىمشا مۇمكىندىكتەرىن قاراستىرۋدى، جولاۋشىلارعا QR-كود، سمارتفون جانە ينتەرنەت-بانكينگ ارقىلى تولەۋگە مۇمكىندىك بەرۋدى تاپسىردى. 

بۇدان باسقا، جيىندا اكىم قازىرگى پروبلەمالار تۋرالى جانە ونىڭ شەشۋ جولدارى تۋرالى ۇسىنىستار ايتقان استانالىق اۆتوپاركتەردىڭ باسشىلارىن دا تىڭداپ شىقتى. 

اۆتوپارك وكىلدەرى ەلەكتروندى تولەم جۇيەسىن ەنگىزۋ اينالىمدى 30% دەيىن ۇلعايتقانىن جانە بۇل قارجىنىڭ قىزمەت كورسەتۋ ساپاسىن جاقسارتۋعا باعىتتالاتىنىن، ونىڭ ىشىندە جوعارى بىلىكتى جۇرگىزۋشىلەردىڭ سانىن كوبەيتەتىنىن ايتتى. 

ەلەكتروندى تولەم جۇيەسىن ەنگىزگەننەن كەيىن جۇرگىزۋشىلەردىڭ جەتىسپەۋشىلىك ماسەلەسىن، جۇرگىزۋشىلەردىڭ قولدارىنا الاتىن جالاقىسىن 300-400 مىڭ تەڭگەگە دەيىن كوتەرۋ ادىسىمەن شەشتى. 

اۆتوپارك باسشىلارى بيلەتسىز جۇرۋشىلەردىڭ كوبەيگەنىن بايقاپ، وسىعان بايلانىستى استانا اكىمدىگىمەن بىرلەسىپ ارەكەت ەتۋدى جانە وسى پروبلەمانى شەشۋ ءۇشىن ترانسپورت ينسپەكسياسى مەن جپق قوسۋدى ءوتىندى. 

جيىن قورىتىندىسى بويىنشا اكىم بارلىق وكىلەتتى ورگاندارعا ايتىلعان ماسەلەلەردىڭ ءبارىن 1 قىركۇيەككە دەيىن شەشىپ، قالا مارشرۋتتارىنىڭ قامتاماسىز ەتۋ دەڭگەيىن 90-95% پايىزعا دەيىن جەتكىزۋدى تاپسىردى، ولاي بولماعان جاعدايدا اۆتوپاركتەردى كەلىسىمشارتىنان ايىراتىنىن ەسكەرتتى.