پەتروپاۆلداعى 20 ىقشام اۋدانىندا جاڭا مەشىتتىڭ سالتاناتتى اشىلۋ ءراسىمى ءوتتى. جاڭا مەشىت 500 ادامعا شاقتالعان، دەپ حابارلايدى Qamshy.kz اقپارات اگەنتتىگى.

اشىلۋ راسىمىنە وبلىس اكىمى قۇمار اقساقالوۆ پەن قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي سەرىكباي قاجى وراز، ق ر پارلامەنتى سەناتىنىڭ دەپۋتاتى ەرىك سۇلتانوۆ، ق ر پارلامەنتى ءماجىلىسىنىڭ دەپۋتاتى اباي تاسبولاتوۆ قاتىستى.

جينالعان قاۋىم الدىندا ءسوز سويلەگەن ءوڭىر باسشىسى جاڭا مەشىتتىڭ اشىلۋى وبلىستىڭ مۇسىلمان قاۋىمى جانە تۇرعىندارى ءۇشىن ۇلكەن وقيعا ەكەنىن اتاپ ءوتتى. ءقازىر وبلىستا ءارتۇرلى كونفەسسيالاردىڭ وكىلدەرى ءبىر شاڭىراق استىندا ءتاتۋ-تاتتى ءومىر ءسۇرىپ، وبلىستىڭ جانە ەلىمىزدىڭ دامۋىنا زور ۇلەستەرىن قوسۋدا.

جاڭا مەشىت قالانىڭ ايشىقتى ورنىنا اينالدى. مەشىتىڭ قۇرىلىسىنا 1،4 گا اۋماق جەر ءبولىندى. عيماراتتىڭ اۋماعى 2793 شارشى مەتردى قۇرايدى. جاڭا مەشىت يسلام داستۇرلەرى مەن ەرەجەلەرىنە ساي بوي كوتەردى. عيمارات ءۇش دەڭگەيلى كۇمبەز بەن 4 بىردەي مۇنارادان تۇرادى. سيممەتريالىق كوپ قىرلى مۇنارالاردىڭ بيىكتىگى 42 مەتردى قۇرايدى.

مەشىتتى اباتتاندىرۋعا ەرەكشە كوڭىل ءبولىندى. مەشىتتىڭ جانىنا سۋبۇرقاق  ورناتىلىپ، كەلۋشىلەرگە ىڭعايلى ورىندىقتار قويىلدى. جۋىق ارادا بۇل جەردە كىشى ساياباق اشىلادى.