استانا قالاسىنداعى №2 قالالىق اۋرۋحانادا ەمدەلۋشى «قۇقىعىنىڭ تاپتالعانىن» ايتىپ Facebook پاراقشاسىندا جازبا قالدىرىپتى. قۇلاعىنا وپەراسيا جاساتىپ، كەيىن پالاتاعا اۋىستىرىلعان مۇقاعالي بالقىبايەۆ اۋرۋحانا ىشىندە مەملەكەتتىك ءتىلدىڭ قورلانعانىن ايتىپ، اشىنىپ وتىر. ءتىپتى قىزمەتكەرلەردەن قازاق تىلىندە سويلەۋىن تالاپ ەتكەنى ءۇشىن تولىق ەمدەلمەي جاتىپ اۋرۋحانادان شىعىپ قالۋى ابدەن مۇمكىن ەكەن.

ۇلت، ءتىل ماسەلەلەرىندە قاشان دا قالام قوزعاۋعا دايىن Qamshy.kz اقپارات اگەنتتىگى ەمدەلۋشىمەن تىلدەسىپ، ءىستىڭ ءمان-جايىن انىقتادى.

ايتۋىنشا، 27 تامىز قۇلاعىنا وپەراسيا جاساتىپ، سول كۇنى كەشكە «وتولارينگولوگيا» بولىمشەسىنىڭ 9-پالاتاسىنا جاتقىزىلعان. 28 تامىز مەملەكەتتىك ءتىلدى قورعايمىن دەپ ءوز دارىگەرىنەن دورەكى ءسوز ەستىگەن.

«تاڭەرتەڭ پالاتامىزعا تازالىق قاداعالاۋشىسى كەلىپ، ورىس تىلىندە بىرنارسە ايتتى. مەن ورىسشا تۇسىنبەيتىنىمدى ايتىپ، مەملەكەتتىك تىلدە سويلەۋىن تالاپ ەتتىم. وعان تولىق قۇقىعىم بار دەپ ويلايمىن. ءبىراق الگى ايەل وزىمە تاپ بەردى. قازاق تىلىندە سويلەمەيتىنىن ايتىپ، دارىگەرىمە شاعىمدانىپتى. ءبىراز ۋاقىتتان كەيىن پالاتاعا اسحات نيكولاي ۇلى كەلدى. قازاق كىسى ەدى. مەنى قولداپ، ەڭ بولماعاندا كەشىرىم سۇرار دەپ ويلادىم. قيالىم ەكەن. «ساعان كىم قانداي تىلدە سويلەسە، سەن دە سول تىلدە جاۋاپ بەرۋگە ءتيىسسىڭ. ەلباسىمىز ءۇش تىلدە سويلەۋ كەرەك دەپ ەسكەرتتى. قىزمەتكەرلەردەن قازاق تىلىندە سويلەۋىن تالاپ ەتە المايسىڭ!» دەپ ادۋىندى سويلەي باستادى. ءبىراق كونبەسىمدى بايقاپ اۋرۋحانادان شىعارىپ جىبەرەمىن دەپ قوقان-لوقى كورسەتتى. ءتىپتى شىعارۋ انىقتامالارىن دا ورىس تىلىندە جازىپ بەرەتىنىن ايتتى. مەملەكەتتىك تىلدە سويلەۋ بىلاي تۇرسىن، ونى قۇرمەتتەمەيتىندەردى قالايشا جۇمىسقا الادى؟»، - دەپ اشۋعا بۋلىقتى مۇقاعالي.

بۇعان قوسا، ەمدەلۋشىنىڭ سوزىنە سەنسەك، اۋرۋحانانىڭ ىشىندە ءوزىڭدى رەسەيدىڭ ءبىر قالاسىندا جۇرگەندەي سەزىنەسىڭ. سەبەبى پالاتا ەسىكتەرىندەگى جازۋلار تۇگەلدەي دەرلىك تەك ورىس تىلىندە جازىلعان. كۇيىنگەن قازاق بۇل جاعدايعا اراشا تۇسەتىن نامىسشىل باۋىرلارعا ۇندەۋ سالدى.

ال بۇگىن ودان سوراقىسى ورىن العان كورىنەدى. ناۋقاستارعا تاڭعى استارىن اكەلگەن قىزمەتشى دە مەملەكەتتىك تىلدەن ماقۇرىم بولىپ شىقتى. ول دا قازاق تىلدە سويلەۋىن تالاپ ەتكەن ەمدەلۋشىگە دورەكى جاۋاپ قايتاردى. تاڭعى اسىن ۋعا تەڭەگەن مۇقاعالي قازاق باۋىرلارىنان كومەك سۇراپ وتىر.

بولعان جاعداي جەلى قولدانۋشىلارى اراسىندا رەزونانس تۋدىردى. ءبىرى قازاقتاردى باسىنعان ورىس تىلدىلەرگە دەگەن اشۋىن بىلدىرسە، ەندى وزگەسى زاڭدا ناقتىلىق جوق دەپ كونستيتۋسيانى رەتتەۋ كەرەكتىگىن ايتىپ، جار سالدى.