الماتى قالاسىندا «الاتاۋ» ءداستۇرلى ونەر تەاترىندا 15 قازاندا ەلىمىزدە تۇڭعىش رەت تەاترلاندىرىلعان پوەتيكالىق جىر كەشى ءوتتى دەپ جازادى Qamshy.kz اقپارات اگەنتتىگى. 

كەشتە اقىن ماعيزا قۇناپيا قىزى مەن قايرات قۇلمۇحامەدتىڭ ولەڭدەرىنە قويىلعان «ولەڭ ءسوزدىڭ پاتشاسى» اتتى پوەتيكالىق ساحنالانعان قويىلىم كورسەتىلدى.

كەش شىمىلدىعىن اشقان قازاقستان جازۋشىلار وداعى ءتوراعاسىنىڭ ورىنباسارى باقىت بەدەلحان الداعى ۋاقىتتا وسىنداي كەشتەر جالعاسىن تاباتىنىن ايتتى.

"بۇگىنگى ۇلكەن كەش نار تاۋەكەلدىڭ كەشى، ياعني ءسوز پاتشاسىنىڭ تاعىنا قونعان كۇنى دەي كەلە، جىر كەشى دەگەن اشەيىن ساحناعا شىعىپ ولەڭ وقۋ ەمەس، ونى ساحنالانعان كورىنىسكە اينالدىرۋ، حالىققا جەتكىزۋ كەرەك ەكەندىگىن تىلگە تيەك ەتتى. ءار مەملەكەتتە وسىنداي پوەتيكالىق كەشتەردى ۇيىمداستىراتىن تەاترلارى بار، بىزدە بۇل جوق، بۇل رايىمبەك سەيتمەتوۆ اعامىزدىڭ مۇسىرەپوۆ تەاترىن پوەزيالىق تەاترعا اينالدىرسام دەگەن ارمانى. قاي جاعىنان دا قيسىنى كەلىپ تۇرعان نارسە. تاۋەلسىزدىك كۇنىنە وراي، «قاسقىر قۇداي بولعان كەز» دەگەن پوەتيكالىق-دراما جازىپ جاتىرمىن. جارتىسىن جازىپ قويدىم. دايىن. سونى بولاشاقتا بەيبىت پەن ءسانيانىڭ قولىنا تاپسىرامىن"، - دەدى باقىت بەدەلحان ءسوز اراسىندا. اقىن ءجاي سويلەمەي، جىر كەشىنىڭ شىمىلدىعىنىڭ اشىلۋىنا جىردان شاشۋ شاشتى. الداعى ۋاقىتتا جازۋشىلار وداعىنىڭ جانىنان «ءسوز پاتشاسى» اتتى پوەتيكالىق تەاتر اشىلاتىنىن، اقىنداردىڭ شىعارماشىلىق كەشتەرى وسىنداي فورماتتا وتەتىنىن حابارلادى.

كەشتى عابيت مۇسىرەپوۆ اتىنداعى جاستار تەاترىنىڭ اكتەرلارى بەيبىت قورامانوۆ پەن ءسانيا ەرزات قىزى جۇرگىزدى. كەشكە تانىمال تۇلعالار، ونەر قايراتكەرلەرى جانە جىر سۇيەر قاۋىم قاتىستى. تەاترلاندىرىلعان بۇل وزگەشە كەش كورەرمەندەردىڭ كوڭىلىنەن شىقتى. ءار كورىنىسكە ريزالىشىقپەن شاپالاق ۇرعان كوپشىلىك قاۋىم وسى كەشتىڭ ەرەكشەلىگىن سەزىندى.

كەش ءسوز العان دۇنيەجۇزى قازاقتارى قاۋىمداستىعىنىڭ الماتى قالاسى جانە وبلىستىق فيليالىنىڭ ديرەكتورى ايبوپە ماقۇلبەكوۆا حانىم كەشتى ۇيىمداستىرۋشىلارعا راحمەت ايتىپ، اقىندارعا ارنايى العىس حات تابىس ەتتى.

اسەل نازارالى