استاناداعى ءورت بولعان ۇيگە بارعان 24.kz ءتىلشىسى اسلان قاجەنوۆ ءوزىنىڭ Facebook-تەگى پاراقشاسىنا ورتكە ورانعان "ۆرەميانكانىڭ" كۇيىن جازىپتى. ءورتتىڭ سەبەپتەرىن دە بولجاپ كوردى دەپ جازادى Qamshy.kz اقپارات اگەنتتىگى.   

♦«5 بالانىڭ ءولىمى سەنىڭ موينىڭدا، مادينا ءابىلقاسىموۆا!»

"ءورت بولعان جەرگە 09:48-دە جەتتىك. بالالاردىڭ كەرەۋەتى، ارباسى، كيىمدەرى مەن ويىنشىقتاردىڭ قالدىقتارىن كورىپ، سەلك ەتە ءتۇستىم. جانتۇرشىگەرلىك جاعداي. اۋىر قايعى. ەموسياعا بەرىلىپ تۇراتىن جاعداي جوق، تەز ەس جيناپ، 09:50-دە تىكەلەي ەفيرگە قوسىلدىق.

ارتىنان كورشى-كولەم مەن تۋعان-تۋىستارىن سوزگە تارتىپ كوردىم. كامەرادان سەسكەنەدى. وڭاشادا اڭگىمەگە اشىق. سونىمەن، بەلگىلى بولعانى، قايتىس بولعانداردىڭ بارلىعى دا قىز بالا ەكەن. ۇلكەنى 12-دە. ارتىنداعى سىڭلىلەرىنە باس-كوز بولىپ جۇرگەنءى دە سول. اكەسى جاقىن جەردەگى ستو-دا قىزمەت ەتەدى. "اناسى دا جۋىردا عانا جۇمىسقا شىققان" دەيدى. ءبىز بارعان كەزدە ولار بولمادى. ول تۇسىنىكتى دە. كۋاگەرلەردىڭ ايتۋىنشا، ءورت 10-اق مينۋتتا لاپ بەرىپ، بارلىق اۋماقتى شارپىپ ۇلگەرگەن. العاشقىدا اينالاسىنداعىلار ءوز بەتىنشە سوندىرۋگە تىرىسىپتى. سۋ اكەلىپ شاشقان، تاعىسىن تاعى. ءتىپتى، ءبىر ازامات ۇيگە كىرىپ، بالالاردى قۇتقارۋعا تىرىسقان. كوك ءتۇتىن، تۇك كورىنبەيدى، "جەردى سيپالاعاندا قيمىلداعان جان جوق" دەيدى. قولى مەن بەتىن كۇيىك شالعان.

بۇلدىرشىندەر انا دۇنيەگە ۇيىقتاپ جاتقاندا كەتىپ قالسا كەرەك. ۇيدەن شىعۋعا تىرىسىپ، جانتالاسقان ارەكەتتەرى بايقالمايدى. "ۇيىقتاعان جەرىندە جاتىر" دەيدى ءورت كەزىندە بولعاندار. ەسىك قۇلىپتالماعان. ويتكەنى، دارەتحانا دالادا.

قايعى جۇتقان وتباسىنىڭ تۇرعان جەرى الاقانداي عانا. 30 شارشى مەتر. وسى اۋماقتا 7 ادام تاماق پىسىرگەن، كىرلەرىن جۋعان، ۇيىقتاعان دەگەندەي. ال، ەندى سەبەبىنە قاتىستى: ۆرەميانكا پەشپەن جىلىتىلعان. ياعني، كۇندەلىكتى وت جاعىلادى. بۇعان قوسا، ەلەكترلى پەش تە قولدانعان ەكەن. ونىڭ قالدىقتارىن ءوز كوزىمىزبەن كوردىك. سونىمەن قاتار، ءۇيدىڭ قابىرعالارى تەز تۇتانعىش ماتەريالمەن (پەنوپلاست) قاپتالعان. تاعى ءبىر بولجام - توقتىڭ تۇيىقتالۋىنان بولۋى مۇمكىن. بۇل كۋاگەرلەردىڭ اۋزىنان الىنعان اقپاراتتار. ال، ناقتى سەبەبى ءالى رەسمي شىققان جوق.

مۇنى تىزبەلەپ وتىرعانىم، ءقازىر الەۋمەتتىك جەلىلەردە ءارتۇرلى جازبالار جاريالانىپ، ءتىپتى، كەيبىرى قاتتى بۇرمالانىپ تا كەتىپ جاتىر. وسى تۇرعىدا وقيعا ورنىندا بولعان، ءورت سالدارىن كورگەن، كۋاگەرلەرىمەن سويلەسكەن ءتىلشى رەتىندە وسى بىلگەندەرىممەن بولىسۋگە مورالدىق قۇقىم بار ەسەپتەيمىن".

♦تىرىدەي ورتەنىپ كەتكەن 5 بالانىڭ ۇلكەنى البينانىڭ حاتى...

♦بەس ءسابيدىڭ مۇڭ زارى. "ءبىز سىزدەردى كۇتەمىز. قوش، اكەشىم، قوش، انا!"

ۇسىنعان: گۇلىم جاقان