التى جىلعا باس بوستاندىعىنان ايىرىلعان ءانشى گاۋھار الىمبەكوۆا سوت شەشىمى كۇشىنە ەنگەنشە قولحاتپەن بوساتىلدى، - دەپ حابارلايدى Qamshy.kz اقپارات اگەنتتىگى Tengrinews.kz پورتالىنا سىلتەمە جاساي وتىرىپ.

"بۇگىن، 2019 جىلدىڭ 4 اقپانىندا الماتىنىڭ المالى اۋداندىق سوتى الىمبەكوۆانىڭ ادۆوكاتىنىڭ ونى قاماۋدا ۇستاۋ تۋرالى بۇلتارتپاۋ شاراسىن سوت ۇكىمى زاڭدى كۇشىنە ەنگەنگە دەيىن قولحاتپەن بوساتۋ تۋرالى ءوتىنىشىن قاناعاتتاندىردى. سوت الىمبەكوۆانىڭ سوتقا دەيىنگى تەكسەرۋ بارىسىندا بۇلتارتپاۋ شارالارىن بۇزباعانىن، تۇرعىلىقتى مەكەنجايى بار ەكەنىن جانە وسىعان دەيىن سوتتى بولماعانىن ەسكەردى"، - دەپ حابارلادى سوتتىڭ باسپا ءسوز قىزمەتىندەگىلەر.

ەسكە سالايىق، ەلىمىزگە تانىمال اندەردىڭ اۆتورى، ءانشى گاۋھار الىمبەكوۆا 30 قاڭتاردا الاياقتىق ءۇشىن 6 جىلعا باس بوستاندىعىنان ايىرىلعان بولاتىن.  كەيىنىرەك ءانشىنىڭ ادۆوكاتى جۇماعالي زينەلوۆ ءىستىڭ ءمان-جايىن ايتىپ بەرگەن ەدى. ادۆوكات سوت ۇكىمىمەن كەلىسپەيتىنىن جانە تاياۋ ارادا اپەللياسيالىق سوتقا ارىز تۇسىرەتىنىن مالىمدەدى.

ايتا كەتەيىك، ءانشىنىڭ "اق كەلىن"، "كوكتەمگە حات"، "جاس كەلىن"، "قىز سەزىمى"، "ورالشى ماحاببات"، "اقمارالىم" اندەرى جۇرتشىلىققا كەڭىنەن تارالىپ، تانىمال بولعان. ونىڭ انىنە جازىلعان ولەڭدەردى تانىمال ەسترادا جۇلدىزدارى ورىنداعان.