باسىلىمنىڭ مالىمەتىنشە، مينيسترلەر مەيدەن «ءوز ەركىمەن وستاۆكاعا كەتۋىن تالاپ ەتەدى». ونىڭ ورنىنا ءقازىر مينيسترلەر كابينەتىنىڭ حاتشىلىعىندا وتىرعان ديەۆيد ليدينگتون كەلۋى مۇمكىن دەلىنگەن.

گازەتتىڭ جازۋىنشا، مەيگە ەو-دان شىعۋ قاجەتتىلىگى جونىندە پارلامەنتتى كوندىرە المادى دەگەن كىنا ارتپاق.

پرەمەرلىككە سونىمەن بىرگە ءسىم باسشىسى دجەرەمي حانت جانە قورشاعان ورتا جونىندەگى مينيستر مايكل گوۋۆ سەكىلدى كونسەرۆاتورلاردىڭ ءۇمىتى بار دەپ جازادى باسىلىم.

وتكەن اپتادا لوندوندا جۇزدەگەن بريتاندىقتار برەكزيتكە قارسى كوشەگە شىعىپ، بيلىكتەن قايتا رەفەرەندۋم وتكىزۋىن تالاپ ەتكەن.

تەرەزا مەي ەۋروپا وداعىنداعى ارىپتەستەرىن برەكزيتتىڭ مەرزىمىن 30 ماۋسىمعا شەگەرۋ تۋرالى سۇراعان، ءبىراق ەۋروپارلامەنتتەگى سايلاۋعا بايلانىستى ونىڭ بۇل ءوتىنىشى قابىلدانباعان. ۇلىبريتانيانىڭ ەۋرووداقتان شىعۋى اۋەلى 29 ناۋرىزعا بەلگىلەنگەن ەدى. ءبىراق قاۋىمدار پالاتاسى ەلدىڭ ەۋرووداقتان شىعۋىنا بايلانىستى لوندون مەن بريۋسسەل اراسىنداعى كەلىسىمدى ەكى رەت ماقۇلداماي قويعان. ەۋرووداقتان كەلىسىمسىز شىعۋ مۇمكىندىگىن دە بريتان پارلامەنتى قابىلداماي تاستاعان.

ۇسىنعان: گۇلىم جاقان