ەكى كۇن قاتارىنان كرەملدە كونسەرتىن بەرگەن ديماشقا تىڭدارماندارىنىڭ ءبىرى ءدال وزىندەي قۋىرشاق سىيعا تارتتى دەپ حابارلايدى Qamshy.kz اقپارات اگەنتتىگى.
ديماشتىڭ رەسەيدەگى جانكۇيەرلەرىنىڭ ءبىرى، ساحا (ياكۋتيا) ەلىنىڭ قولونەر شەبەرىنە سۇيىكتى ءانشىسىنىڭ بەينەسىندەگى قۋىرشاقتى جاساۋعا تاپسىرىس بەرگەن ەكەن.
قولونەر شەبەرىنىڭ ايتۋىنا قاراعاندا، ول قۋىرشاقتى جاڭا جىلدىڭ الدىندا جاساپ باستاعان ەكەن. "لەنا ەسىمدى ديماشتىڭ جانكۇيەرى ديماش قۇدايبەرگەننىڭ سۋرەتىنە قاراپ، قۋىرشاعىن جاساي الاسىز با دەپ سۇرادى. سۋرەتىن جىبەرشى دەدىم. سۋرەتىن كورىپ، بەت الپەتى وتە سىمباتتى ەكەن. وپ-وڭاي جاسايمىن دەپ ويلادىم. سويتسەم، قاتەلەسىپپىن. ديماشتىڭ قۋىرشاعىن جاساۋ بارىسىندا بەت الپەتىن ءۇش رەت اۋىستىرۋعا تۋرا كەلدى. جۇمىس بارىسى تىم ۇزاققا سوزىلىپ كەتتى. قۋىرشاقتى قىستا ماسكەۋدە جاساپ باستادىم دا، سوناۋ بالي ارالدارىندا ارەڭ ءبىتىردىم. ءتىپتى، بۇعان دەيىن قۋىرشاقتارىمدى كۇيدىرىپ جۇرگەن پەشىم دە ىستەن شىعىپ، جاڭاسىن ساتىپ الدىم. جانە ەڭ تاڭ قالاتىنى ءدال مەن تۇراتىن ۋبۋدەدە ماتا ساتاتىن دۇكەن جوق بولىپ شىقتى. اينالاداعى بارلىق ماتا ساتاتىن دۇكەندەردى ارالاپ شىقتىق. ءبارى دە بىردەي. ەشبىر جەردە ماعان قاجەتتى ماتا جوق. ءسويتىپ، ينستاگرام جەلىسىندە قۋىرشاقتارعا كيىم تىگەتىن قولونەر شەبەرىنەن مەن تۇراتىن ايماققا جاقىن ماڭداعى دەنپاسار اتتى قالادا ماتا ساتاتىنىن ءبىلدىم. ءسويتىپ، كەشتەتىپ، ءبىر كوشەنىڭ ءبارى ماتا دۇكەندەرىنە تولى دەنپاسار قالاسىنا دا جەتتىك. سويتسەك، كەش بارعان ەكەنبىز، دۇكەندەر جابىلىپ قالىپتى. سوسىن ءانشىنىڭ كيىمىندەگىدەي ورنەكتەردى تىگىپ، تاستارمەن بەزەندىرۋ ءۇشىن اساي-مۇسەي ساتاتىن دۇكەن ىزدەپ شابىلدىق.
ءدال سول كۇنى كەشتە رەسەيدەن تاپسىرىس بەرگەن قۋىرشاققا لايىقتى، ءتۇسى ءدال كەلەتىن قوزىنىڭ ءجۇنى كەلدى. تىم قۇرىعاندا، وسىدا جولىم بولدى. مۇنداي بولارىن بىلگەندە ءبارىن الدىن-الا رەسەيدەن تاپسىرىس بەرەر ەدىم. ءدال وسىنداي ادەمى جەردەن كەرەگىڭدى تاپپايسىڭ دەپ كىم ويلاعان دەرسىڭ؟
قۋىرشاق دايىن. بەتىن بويادىم، شاشىن جابىستىردىم، كوستيۋمى تىگىلدى، اياق كيىمى دە دايىن. ءبىراق بىرنارسە جەتىسپەي تۇردى. جولداسىم جەرگىلىكتى جەردە تانىسقان سۋرەتشىنى ەسىمە ءتۇسىردى. ءسويتىپ، الگى سۋرەتشى سۋرەت ونەرىنە قاجەتتى زاتتار ساتاتىن دوستارىنىڭ دۇكەنىن ايتتى. ءدال سول جەردەن كوستيۋمىنە قاجەتتى جىلتىردى تاپتىم.
سوسىن باقىتىما وراي ەنەم زاتتارىنىڭ ىشىنەن التىن تۇستەس ءجىپ پەن ورنەك تاۋىپ الدى. كىشىگىرىم عاجايىپ دەرسىڭ.
قۋىرشاقتىڭ شاشىن قيۋ ءۇشىن جەرگىلىكتى شاشتارازعا بارىپ، وتكىر قايشىسىن سۇراۋىمىزعا تۋرا كەلدى.
سوسىن قۋىرشاقتى ماسكەۋگە وزىمەن بىرگە الا كەتۋگە كەلىسىم بەرگەن ادامدى تاپتىق. تاپسىرىستى تىم ەرتە الىپ كەتەتىندىكتەن، كۇندىز دۇرىستاپ سۋرەتكە ءتۇسىرىپ تە ۇلگەرمەدىك. ءسويتىپ، ىمىرت كىرە ديماشتىڭ قۋىرشاعىنا كوتەرىپ الىپ، سۋرەتكە تۇسىرەتىن ادەمى جەر ىزدەپ اينالانى شارلادىق. جەرگىلىكتى تۇرعىندار كىشكەنتاي ديماشتىڭ فوتوسەسسياسىنا قىزىعا قاراپ ءجۇردى.
بۇل قيىندىقتاردى وقۋ سىزدەر ءۇشىن قىزىق شىعار. ءبىراق بۇل سىناق بوتەن ەلدە جۇرگەن ادام ءۇشىن ءباليدى جاقسى تانۋعا كوپ سەپتىگىن تيگىزگەن سىناق بولدى.
وسى جازباممەن ماعان سەنىم ارتىپ، قۋىرشاققا تاپسىرىس بەرگەن لەنا مەن بارلىق فان كلۋبتارعا العىسىمدى بىلدىرگىم كەلەدى. بۇل تاجىريبە ماعان ومىرلىك ساباق بولدى. دارىندى ديماشتىڭ ونەرىمەن تانىسقانىما وتە قۋانىشتىمىن» دەپ جازدى قولونەر شەبەرى ءوزىنىڭ ينستاگرامداعى پاراقشاسىندا.
ياكۋتيالىق قولونەر شەبەرى "تاپسىرىستى جىبەرمەس بۇرىن ديماشپەن سۋرەتكە ءتۇسىپ ۇلگەردىم" دەپ قۋىرشاقپەن تۇسكەن سۋرەتىن دە سالعان ەكەن جەكە پاراقشاسىندا.
ۇسىنعان: ماقپال سەمباي
