استانالىق پوليسەيلەر ماس كۇيىندە كولىك ايداپ كەتكەن كۇدىكتىنى ۇستادى. بۇل تۋرالى Qamshy.kz اقپارات اگەنتتىگى پوليسيا دەپارتامەنتىنىڭ سايتىنا سىلتەمە جاساي وتىرىپ حابارلايدى.

24 ناۋرىزدا ساعات 22.00 شاماسىندا جەدەل باسقارۋ ورتالىعىنان «Infiniti FX35» ماركالى كولىكتىڭ جۇرگىزۋشىسى جول ەرەجەسىن ورەسكەل بۇزىپ، ماس كۇيىندە بولۋ مۇمكىن دەگەن حابارلاما كەلىپ ءتۇستى. 
اۆتوكولىكتى توقتاتۋ كەزىندە اتالعان كولىكىتڭ جۇرگىزۋشىسى پوليسەيلەردىڭ زاڭدى تالاپتارىن ورىنداماي، جىلدامدىقتى اسىرا پايدالانىپ، جول قوزعالىسىنىڭ باسقا دا قاتىسۋشىلارىنىڭ ءومىرى مەن دەنساۋلىعىنا ءقاۋىپ توندىرگەن. 

قورعالجىن تاس جولى مەن اياگوز كوشەسىنىڭ قيىلىسىندا پوليسيا قىزمەتكەرلەرى كولىكتى ماجبۇرلەپ توقتاتۋدى شەشتى. تەك پوليسيا اۆتوەكيپاجىمەن سوقتىعىسقان اۆتوكولىك توقتاتىلدى. ونىڭ ناتيجەسىندە ءۇش پوليسيا قىزمەتكەرى دەنە جاراقاتىمەن اۋرۋحاناعا جەتكىزىلدى. "Infiniti FX35" اۆتوكولىگىنىڭ جۇرگىزۋشىسى دارىگەرلەردىڭ تەكسەرىسىنەن كەيىن (كەۋدە قۋىسىنىڭ سوعىلۋى) سارىارقا اۋدانىنىڭ پوليسيا بولىمىنە جەتكىزىلدى.

جەرگىلىكتى تۇرعىنعا تيەسىلى تقس اۋماعىنان اۆتوكولىكتى ايداپ اكەتكەن كۇدىكتى تەحنيكالىق قىزمەت كورسەتۋ ستانسياسىنىڭ 35 جاستاعى قىزمەتكەرى بولىپ تابىلادى. مەديسينالىق كۋالاندىرۋ اكتىسىنە سايكەس، جۇرگىزۋشى ماس كۇيىندە بولعان. اتالعان فاكتى بويىنشا ق ر قك 200-بابى ("ايداپ كەتۋ") بويىنشا سوتقا دەيىنگى تەرگەۋ جۇرگىزىلۋدە. ۇستالعان ازامات ۋاقىتشا ۇستاۋ يزولياتورىنا قامالدى.

ۇسىنعان: فاريزا جومارت قىزى