قىتايدىڭ نانچان قالاسىنداعى ينتەرنەت-كافەدە قىز بالا دۇنيەگە كەلدى. ال ونىڭ اناسى ويناپ جاتقان كومپيۋتەر ويىنىن توقتاتۋعا قيماعاندىقتان، بالانى ەدەنگە تۋا سالىسىمەن قايتادان ويىنعا كىرىسىپ كەتىپتى، دەپ جازادى قىتايلىق باسىلىمدارعا سىلتەمە جاساعان newsru.com. سول كەزدە ينتەرنەت-كافەدە وتىرعان وزگە كەلۋشىلەر جىلاعان ءسابيدىڭ داۋىسىن ەستىپ كەلىپ، نە بولعاندىعىن بىردەن تۇسىنە قويعان. ولار جاڭا تۋعان بالانى كيىمگە وراپ، جەدەل جاردەم شاقىرتقان. ەڭ سوراقىسى، وسى ۋاقىت بويى 24 جاستاعى انا قۇرساعىنان شىققان شاقالاققا قاراماستان، ويىندى ودان سايىن قىزدىرا تۇسكەن ەكەن. ارتىنشا بەلگىلى بولعانىنداي، ول وتباسىمەن بولعان كيكىلجىڭنەن سوڭ اشۋلانىپ، ۇيىنەن كەتىپ قالعان. ال ينتەرنەت-كافەگە ول جىگىتىن كۇتە تۇرۋ ءۇشىن باس سۇعىپتى. ابىروي بولعاندا، وقيعا سوڭىندا ونىڭ تۋىستارى مەن بالانىڭ اكەسى حاباردى ەستي سالىسىمەن، بىردەن اۋرۋحاناعا قاراي بەت الىپتى.