29 ساۋىردە الماتى قالالىق مامانداندىرىلعان اۋدانارالىق اكىمشىلىك سوتى ءال-فارابي داڭعىلى بويىنداعى جاياۋ جۇرگىنشىلەر كوپىرىنە قازاقستان كونستيتۋسياسىنان سيتاتا ىلگەن رومان زاحاروۆتى ۇساق بۇزاقىلىق بابىمەن 5 تاۋلىككە قامادى. بۇل تۋرالى زاحاروۆتىڭ ادۆوكاتى ەرلان ەربولات ۇلى مالىمدەدى دەپ حابارلايدى Qamshy.kz اقپارات اگەنتتىگى ازاتتىق راديوسىنا سىلتەمە جاساپ.

الەۋمەتتىك جەلىدەگى سۋرەتتەرگە قاراعاندا، زاحاروۆ ىلگەن باننەردە كونستيتۋسيانىڭ 3-بابى 1-تارماعىنداعى "مەملەكەتتىك بيلىكتىڭ بىردەن-بىر باستاۋى - حالىق" دەگەن ءسوز جازىلعان.

ادۆوكات "ۇلگەرسەك زاحاروۆقا شىققان شەشىم ۇستىنەن بۇگىن شاعىم تۇسىرەمىز" دەدى. ەربولات ۇلىنىڭ ايتۋىنشا، ولار زاحاروۆتى قاماۋ تۋرالى سوت قاۋلىسىن ءالى الماعان.

"پوليسيا ۆيدەوباقىلاۋ كامەراسىنداعى بەينەنى دە، وزدەرىنىڭ ۆيدەوجەتوندارىنداعى جازبانى [سوتتا] كورسەتپەدى. ۆيدەو پوليسيانىڭ جەكە قۇرىلعىسىنان كورسەتىلدى"، - دەدى ادۆوكات. ونىڭ سوزىنشە، بۇل ۆيدەونى ىستە ايعاق دەپ تانىماۋ تۋرالى ادۆوكات ءوتىنىشىن سوت قاناعاتتاندىرماعان.

"سوت قاۋلىسىن الا سالا، شەشىم ۇستىنەن شاعىمدانامىز"، - دەدى ەربولات ۇلى.

ادۆوكاتتىڭ ايتۋىنشا، زاحاروۆ دۇيسەنبى كۇنى تاڭەرتەڭ ۇستالعان. الماتى قالالىق سوتىنىڭ باسپا ءسوز حاتشىسى دياس ماحامبەتوۆ بۇل اقپاراتتى راستادى.

"اكىمشىلىك قۇقىق بۇزۋشىلىق كودەكسىنىڭ 434-بابى 1-تارماعىمەن (قوعامدىق ورىنداردى لاستاۋ، ونىڭ iشiندە بەلگiلەنبەگەن ورىندارعا كوممۋنالدىق قالدىقتاردى تاستاۋ) 5 تاۋلىككە قامالدى. ادام جۇرەتىن جەرگە پلاستيك باۋ، سكوچ پەن اق ماتا سياقتى تۇرمىستىق قالدىق تاستاعان"، - دەدى ماحامبەتوۆ.

سوت الدىندا جۇرگەن ازاتتىق تىلشىسىنە زاحاروۆتىڭ دوستارى "سۋرەتشىنى پوليسيا بولىمشەسىنە 9 ساعات ۇستادى" دەگەن. قالالىق سوت ءتىلشىنىڭ "بۇل راس پا؟" دەگەن سۇراعىنا "بىلمەيمىن" دەپ جاۋاپ بەردى.

ۇسىنعان: ادىلەت مادەنيەت