اعىمداعى جىلعى 26-ساۋىردە ق ر پرەمەر-مينيسترىنىڭ ورىنباسارى گ. ءابدىقالىقوۆانىڭ جەتەكشىلىگىمەن ۇكىمەتتىك دەلەگاسيا الماتى قالاسىندا ەلباسىنىڭ "الەۋمەتتىك قامقورلىق" جاڭا الەۋمەتتىك شارالارىنىڭ نەگىزگى باعىتتارىن ءتۇسىندىرۋ جۇمىسىن جالعاستىردى دەپ حابارلايدى Qamshy.kz اقپارات اگەنتتىگى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي سايتىنا سىلتەمە جاساپ. 

تۇسكە دەيىن ۆيسە-پرەمەر گ. ءابدىقالىقوۆا، ق ر ەڭبەك جانە حالىقتى الەۋمەتتىك قورعاۋ ءمينيسترى ب. ساپاربايەۆ، قالا اكىمى ب. بايبەك "باقىتتى وتباسى" جانە "بەلسەندى ۇزاق ءومىر" جول كارتالارىنىڭ ىسكە اسىرىلۋى جونىندە كەڭەس وتكىزدى.

ق ر تۇڭعىش پرەزيدەنتى – ەلباسى ن. نازاربايەۆتىڭ تاپسىرماسى بويىنشا ەلىمىزدە جاڭا الەۋمەتتىك ساياسات ىسكە اسىرىلىپ جاتىر. باستى مىندەت — ازاماتتاردىڭ تۇرمىس ساپاسى مەن ءال-اۋقاتىن ارتتىرۋ.

بۇگىندە قالادا كوپ بالالى انالار مەن قارت ادامداردى قولداۋعا باعىتتالعان "باقىتتى وتباسى" جانە "بەلسەندى ۇزاق ءومىر" جول كارتالارى جۇزەگە اسىرىلىپ جاتىر. 13 شارا قاراستىرىلعان جول كارتاسى بەكىتىلدى. جۇمىسى "ءبىر تەرەزە" قاعيداسى بويىنشا جۇرگىزىلەتىن "باقىتتى وتباسى" ورتالىعى اشىلۋدا. وندا زاڭگەرلەر، پسيحولوگتار، جاتتىقتىرۋشىلار جانە ت.ب. جۇمىس ىستەيتىن بولادى. "باقىتتى وتباسى" قايىرىمدىلىق قورى قۇرىلىپ، مەسەناتتار مەن جۇرتشىلىقتىڭ ارقاسىندا 131 ملن تەڭگەدەن استام قاراجات جيناپ ۇلگەردى. 1 مىڭنان استام وتباسىعا ماتەريالدىق كومەك كورسەتىلدى.

الماتى ەلىمىزدە العاش بولىپ "باقىتتى وتباسى" جەڭىلدەتىلگەن تۇرعىن ءۇي باعدارلاماسىن ىسكە قوستى. مامىر ايىندا 30 وتباسىنى باسپانامەن قامتاماسىز ەتۋ جوسپارلانىپ وتىر. قازىرگى الەۋمەتتىك تولەمدەردىڭ مولشەرى ءوستى. اتاپ ايتقاندا، ءومىردىڭ قيىن جاعدايىنا تاپ بولعان ازاماتتارعا بەرىلەتىن ءبىر جولعى الەۋمەتتىك كومەك 10 ايلىق ەسەپتىك كورسەتكىشتەن (25 250 تەڭگە) 20 ايلىق ەسەپتىك كورسەتكىشكە دەيىن (50 500 تەڭگە) كوبەيدى. بۇل شارامەن 10 مىڭنان استام وتباسى قامتىلاتىن بولادى.

سودان كەيىن گ. ءابدىقالىقوۆا جانە ب. ساپاربايەۆ اۋدانداردىڭ اكىمدەرىمەن، ءىرى كاسىپورىنداردىڭ، بيزنەس-قۇرىلىمدار مەن كاسىپوداق ۇيىمدارىنىڭ باسشىلارىمەن كەزدەسۋ وتكىزىپ، وندا الەۋمەتتىك ارىپتەستىك ماسەلەلەرىن تالقىلادى.

2015 جىلدان باستاپ بيزنەستىڭ الەۋمەتتىك جاۋاپكەرشىلىگى اياسىندا 25،7 ملرد تەڭگەگە 40-تان استام جوبا ىسكە اسىرىلىپ كەلەدى. بۇگىندە 21،6 ملرد تەڭگە سوماسىنا 32 جوبا ىسكە اسىرىلدى. 7 بالاباقشا، 1 ەمحانا، فەلدشەرلىك-اكۋشەرلىك پۋنكت جانە ت.ب. سالىندى.

ۆيسە-پرەمەر كوپ بالالى انالارمەن كەزدەسۋدە مەملەكەت ازاماتتاردىڭ از قامتىلعان ساناتتارىنا الەۋمەتتىك قولداۋ كورسەتۋگە باعىتتالعان شارالار قابىلداپ جاتقانىن اتاپ ءوتتى. 1 ساۋىردەن باستاپ اتاۋلى الەۋمەتتىك كومەك كورسەتۋ كريتەرييلەرى ەڭ تومەنگى كۇنكورىس دەڭگەيىنىڭ 70%-نا دەيىن ارتىپ، 20 789 تەڭگەنى قۇرادى، مامىر ايىنان باستاپ جالعا بەرىلەتىن تۇرعىن ءۇي بولىنە باستايدى، ال 1 ماۋسىمنان باستاپ بيۋدجەت سالاسىنىڭ جالاقىسى تومەن قىزمەتكەرلەرىنىڭ ەڭبەكاقىسى كوبەيەدى. ءبىلىم بەرۋ جانە دەنساۋلىق ساقتاۋ جۇيەسىندەگى قىزمەتتەردىڭ ساپاسىن ارتتىرۋ بويىنشا شارالار قابىلداناتىن بولادى. سونداي-اق جۇمىس توبىنىڭ مۇشەلەرى جاڭا الەۋمەتتىك ساياسات اياسىندا ىسكە اسىرىلىپ جاتقان جاڭالىقتار تۋرالى اقپارات بەردى.

س. اسفەندياروۆ اتىنداعى ۇلتتىق مەديسينا ۋنيۆەرسيتەتىنىڭ جاتاقحاناسىن ارالاۋ بارىسىندا پرەمەر-مينيستردىڭ ورىنباسارى "ەلباسىنىڭ بەس الەۋمەتتىك باستاماسىن" ىسكە اسىرۋ اياسىندا ق ر تۇڭعىش پرەزيدەنتىنىڭ تاپسىرماسىنىڭ ورىندالۋ بارىسىمەن تانىستى.

گۇلشارا ءابدىقالىقوۆا جۇمىس ساپارىنىڭ سوڭىندا جوعارى وقۋ ورىندارىنىڭ رەكتورلارىمەن كەزدەسۋ وتكىزدى. كەزدەسۋدە ستۋدەنت جاستاردىڭ ءومىر ءسۇرۋ جاعدايىن جاقسارتۋ جونىندەگى ءۇشىنشى باستامانىڭ ىسكە اسىرىلۋى تۋرالى اقپارات تىڭدالدى، جوعارى ءبىلىم بەرۋدەگى وزەكتى ماسەلەلەر تالقىلاندى.

جوعارىدا اتالعان باستامانى ورىنداۋ ءۇشىن قالادا ستۋدەنتتەر جاتاقحانالارىن سالۋ جۇمىسى جالعاسۋدا. 39 جوعارى وقۋ ورنى جۇمىس ىستەيدى، وندا 149 مىڭ ادام ءبىلىم الادى، ونىڭ 92 مىڭنان استامى باسقا قالالاردان كەلگەن ستۋدەنتتەر. بارلىعى 95 جاتاقحانادا 30 مىڭ (33%) ستۋدەنت تۇرادى. 

2018 جىلى جوعارى وقۋ ورىندارىنىڭ ءوز قاراجاتىنىڭ ەسەبىنەن 1200 ورىنعا ارنالعان 3 جاتاقحانا پايدالانۋعا بەرىلدى. 2019 جىلى دا ءوز قاراجاتتارى ەسەبىنەن 2 340 ورىنعا ارنالعان 5 جاتاقحانانى اياقتاۋ جوسپاردا بار.

كەزدەسۋدىڭ قورىتىندىسى بويىنشا ق ر پرەمەر-مينيسترىنىڭ ورىنباسارى گ. ءابدىقالىقوۆا جاتاقحانالاردى ۋاقىتىلى جانە ساپالى پايدالانۋعا بەرۋدى قامتاماسىز ەتۋ، ستۋدەنتتەرگە قولايلى جاعدايلار جاساۋ ءۇشىن قاجەتتى شارالار قابىلداۋ جونىندە جوعارى وقۋ ورىندارىنىڭ رەكتورلارىنا، مەملەكەتتىك ورگانداردىڭ باسشىلارىنا ءبىرقاتار ناقتى تاپسىرمالار بەردى.

ۇسىنعان: ادىلەت مادەنيەت