تۇركىستان وبلىسى، قازىعۇرت اۋدانىنداعى "بابالار رۋحىنا تاعزىم" كەشەنىندە قازاقتىڭ ءۇش ءبيىنىڭ ەڭسەلى ەسكەرتكىشى اشىلدى دەپ جازادى Qamshy.kz اقپارات اگەنتتىگى تۇركىستان وبلىسى اكىمىنىڭ باسپا ءسوز قىزمەتىنىڭ دەرەگىن نەگىزگە الىپ. 

شاراپحانا اۋىلىندا وتكەن سالتاناتتى شاراعا وبلىس اكىمى ءومىرزاق شوكەيەۆ پەن ق ر مەملەكەتتىك سىيلىعىنىڭ يگەرى ءاسانالى ءاشىموۆ، ق ر پارلامەنتى ءماجىلىسىنىڭ دەپۋتاتى ساۋىتبەك ءابدىراحمانوۆ پەن مەملەكەت جانە قوعام قايراتكەرى قۋانىش ايتاحانوۆ سىندى ازاماتتار قاتىستى. ەڭسەلى ەسكەرتكىش مەملەكەت قايراتكەرى، "جەتى جارعى" جانە "قوجابەرگەن جىراۋ" قورىنىڭ ءتوراعاسى بەكەت تۇرعارايەۆتىڭ باستاماسىمەن جانە "تۇگەيبولات بابا" قورىنىڭ ەسەبىنەن ورناتىلدى. ۇلى دالا دانالارىنىڭ ءبىرى - ايتەكە بي بايبەك ۇلىنىڭ 375 جىلدىق مەرەي تويىنا وراي ۇلتتىڭ ۇلى بيلەرى تولە، قازىبەك جانە ايتەكە بيگە ورناتىلعان تاس مۇسىندەردىڭ اشىلۋ سالتاناتىندا ايماق باسشىسى قۇتتىقتاۋ ءسوز سويلەپ، ايتۋلى شارانىڭ ماڭىزىنا توقتالىپ ءوتتى.

"بۇگىنگى وتكىزىلىپ جاتقان شارانىڭ ماڭىزى وراسان زور. ويتكەنى، تاريح قويناۋىنداعى اتاقتى بيلەردىڭ ەسىمىن قايتا جاڭعىرتىپ، ونەگەلى ءومىرىن وسكەلەڭ ۇرپاققا ۇلگى ەتۋدىڭ ءوزى ۇلكەن تاربيە ەكەنىن ۇمىتپاۋىمىز كەرەك. قازاقستان رەسپۋبليكاسىنىڭ تۇڭعىش پرەزيدەنتى، ەلباسى نۇرسۇلتان نازاربايەۆتىڭ ەل تاۋەلسىزدىگىن نىعايتۋ جولىنداعى قاجىرلى ەڭبەگى - "بولاشاققا باعدار: رۋحاني جاڭعىرۋ"، "ۇلى دالانىڭ جەتى قىرى" اتتى ماقالالارى قازاقستاندىقتار اراسىندا زور سەرپىلىس تۋعىزىپ، اۋقىمدى جۇمىستاردىڭ جۇرگىزىلۋىنە جول اشتى. مادەنيەت، ءبىلىم، ونەر سالالارىندا بۇرىن-سوڭدى بولماعان باستامالار جۇزەگە استى. قازاق حالقىنىڭ بىرلىگىن نىعايتۋعا زور ۇلەس قوسقان اتاقتى ءۇش ءبيدى بىر-بىرىنەن ءبولىپ قاراۋعا بولمايدى. ولاردىڭ باستى ماقساتى - ەل تاۋەلسىزدىگىنە قول جەتكىزۋ، قازاق حالقىنىڭ ىنتىماعى مەن بىرلىگىن نىعايتۋ ەدى. "بابالار رۋحىنا تاعزىم" كەشەنى توعىز جولدىڭ توعىسىندا ورنالاسقاندىقتان، بۇل نىساندار وسىندا كەلۋشى تۋريستەردىڭ دە نازارىن اۋداراتىنىنا سەنىمدىمىن"،- دەدى ءومىرزاق شوكەيەۆ.

شامامەن 100 ملن. تەڭگەگە تۇرعىزىلعان ەسكەرتكىشتەر قازىعۇرت اۋدانى ارقىلى وتەتىن شىمكەنت - تاشكەنت حالىقارالىق كۇرە جولىنىڭ بويىندا، "بابالار رۋحىنا تاعزىم" كەشەنىندە بوي كوتەردى. وسىعان وراي ۇيىمداستىرىلعان شارادا قازاقتىڭ بەتكە ۇستار ەل اعالارى مەن زيالى قاۋىم وكىلدەرى ءۇش ءبيدىڭ تاريحىمىزداعى الار ورنى ەرەكشە ەكەنىن اتاپ ءوتتى.

"ءۇش ءبيدىڭ ەسكەرتكىشىن ساياباقتىڭ قاق ورتاسىنا، كۇنشىعىسقا قاراتىپ ورناتتىق. شىمكەنت-تاشكەنت جولىنىڭ بويىندا الىستان مەنمۇندالاپ تۇرادى. ەسكەرتكىشتىڭ ماڭدايىنا "ۇلى دالا دانالارى"، "ۇلتتىڭ ۇلى بيلەرى" دەپ جازىپ قويدىق. ارينە، قازاقتا بيلەر كوپ بولعان. ءبىراق وسى ءۇش ءبيدى بۇكىل قازاق مويىنداعان. بۇل ورناتىلعان ەسكەركىش ەلدىگىمىز بەن بىرلىگىمىزدى ايقىنداپ تۇرادى دەپ سەنەمىن"،- دەيدى مەملەكەت قايراتكەرى، "جەتى جارعى" جانە "قوجابەرگەن جىراۋ" قورىنىڭ ءتوراعاسى بەكەت تۇرعارايەۆ. جيىن سوڭى رەسپۋبليكاعا ەڭبەگى سىڭگەن تانىمال انشىلەردىڭ كونسەرتتىك باعدارلاماسىمەن جانە ۇلتتىق سپورت ويىندارىمەن جالعاستى. ۇلى بيلەرگە ارناپ قۇران باعىشتالىپ، اس بەرىلدى.

ۇسىنعان: اسەل بولات قىزى