تۇلكىباس اۋدانى، پىستەلى اۋىلىندا «تاۋپىستەلى تاعىلىمى – 2019: شەرحان مەن ناسىر باۋىندا» باسقوسۋ ءوتتى دەپ جازادى Qamshy.kz اقپارات اگەنتتىگى.  بۇل تۋرالى تۇركىستان وبلىستىق وڭىرلىك كوممۋنيكاسيالار قىزمەتى حابارلادى.

ءاربىر ءۇش جىل سايىن وتەتىن باسقوسۋدىڭ ماقساتى – ءتۇبى ءبىر تۇركىلەر تۋىستىعى، ادەبيەت پەن جۋرناليستيكا، جاس ۇرپاق تاربيەسى تۋرالى وي قوزعاۋ، رۋحاني بايلانىستى تەرەڭدەتۋ. «رۋحاني جاڭعىرۋ» باعدارلاماسى اياسىندا وتكىزىلگەن بيىلعى باسقوسۋ قازاق جانە وزبەك حالقىنىڭ شەرحان مۇرتازا مەن ناسىر فازىل سىندى ءسوز زەرگەرلەرىنىڭ شىعارماشىلىعىنا ارنالدى. «مارحابات-ميراس» قوعامدىق قورى مەن تۇلكىباس اۋدانى اكىمدىگى قولعا العان باستاماعا تۇركىستان وبلىسى اكىمدىگى قولداۋ كورسەتتى.

جيىنعا ارداگەرلەر، زيالى قاۋىم وكىلدەرى، قازاقستان، تۇركيا، وزبەكستان مەملەكەتتەرىنىڭ قالامگەرلەرى، بۇقارالىق اقپارات قۇرالدارى وكىلدەرى جانە شىعارماشىل جاستار قاتىستى.  قاتىسۋشىلار الدىمەن تۇلكىباس اۋدانىنىڭ ورتالىعىنداعى تۇرار رىسقۇلوۆ ەسكەرتكىشىنە گۇل شوعىن قويىپ، تۇركىباسى اۋليە كەسەنەسىنە ايالدادى. ودان سوڭ تاۋپىستەلىدەگى شەرحان مەن ناسىر باۋىنا  جينالدى.

جيىندى جازۋشى، حالىقارالىق «الاش» ادەبي سىيلىعىنىڭ لاۋرەاتى بايعۇت مارحابات جۇرگىزدى. تۇركىستان وبلىسى اكىمىنىڭ ورىنباسارى ءارى ادەبيەت سالاسىنىڭ وكىلى مالىك وتاربايەۆ جيىنعا ارنايى قاتىسىپ، وبلىس اكىمى ءومىرزاق شوكەيەۆتىڭ قۇتتىقتاۋ حاتىن تاپسىردى. ادەبيەت پەن رۋحانيات سالاسىنا قولداۋ كورسەتىلەتىنىن، مۇنداي باسقوسۋلاردىڭ جاس ۇرپاق ءۇشىن بەرەرى مول ەكەنىن جەتكىزدى.

تۇلكىباس اۋدانىنىڭ اكىمى نۇربول تۇراشبەكوۆ  تابيعاتى تامىلجىعان تۇلكىباسقا  ادەبيەتشىلەردىڭ كەلگەنىنە قۋانىشتى ەكەنىن ءبىلدىردى.

تاعىلىمدى كەزدەسۋدە قازاقستان جازۋشىلار وداعى باسقارماسىنىڭ حاتشىسى، مەملەكەتتىك سىيلىقتىڭ لاۋرەاتى ەسەنعالي راۋشانوۆ، وزبەكستان جازۋشىلار وداعى قازاق ادەبيەتى كەڭەسىنىڭ حاتشىسى، جازۋشى، اۋدارماشى مەحمانقۇل يسلامقۇلوۆ، قازاقستاننىڭ قۇرمەتتى ءجۋرناليسى بايدۋللا قونىسبەك، تۇركيا رەسپۋبليكاسىنىڭ وكىلى، بەلگىلى عالىم ق.ا.ياساۋي اتىنداعى حقتۋ-دىڭ تۇرىك فيلولوگياسى كافەدراسىنىڭ مەڭگەرۋشىسى اسىل شەنگۇن، حالىقارالىق «الاش» سىيلىعىنىڭ لاۋرەاتى، ك.سيمونوۆ مەدالىنىڭ يەگەرى نارماحان بەگالى ۇلى جانە نەسىپبەك ءداۋتاي ۇلى جانە وزگە دە اقىن-جازۋشىلار قوس قالامگەر جايلى تولعانىستارىن، قوعام، ادەبيەت، رۋحانيات تۋرالى كەلەلى ويلارىن ايتتى. ادەبيەت، جۋرناليستيكا جايلى ۇسىنىستارىن، جاس تالانتتار تۋرالى وي-پىكىرلەرىن ءبىلدىردى.

اسەرلى جۇزدەسۋدە قالامگەر اعالار ادەبيەتكە قادام باسقان جاستارعا باتا بەرىپ، اق جول تىلەدى. باسقوسۋ بارىسىندا شەرحان مۇرتازا مەن ناسىر فازىلدىڭ شىعارمالارىنان ۇزىندىلەر ۇسىنىلىپ، كونسەرتتىك باعدارلامامەن سۇيەمەلدەندى. ادەبي جيىن سوڭىندا قالامگەرلەر بوزتورعاي اسۋىنا ساياحات جاسادى.

ۇسىنعان: اسەل بولات قىزى