قىزىلوردادا قارجىسى بار، پەيىلى كەڭ، ءبىراق ۋاقىتى تىعىز كاسىپكەر-مەسەناتتاردىڭ قايىرىمدىلىق جوبالارىن ەرىكتىلەر توبى جۇزەگە اسىرادى دەپ حابارلايدى Qamshy.kz اقپارات اگەنتتىگى "حابار 24" ارناسىنا سىلتەمە جاساپ.

جابىرقاعان جانداردىڭ جانىنان تابىلاتىنداردىڭ ءبىرى – گۇلنار سارسەنباي. ول 2 ءبۇلدىرشىننىڭ ەمىنە قارجى جيناۋعا ۇلەس قوسىپ، بىرنەشە وتباسىنى ۇدايى ازىق-تۇلىكپەن قامتىپ كەلەدى.

5 جىلدان بەرى مەملەكەتتىك مەكەمەدە ەڭبەك ەتىپ كەلە جاتقان ەرىكتى "وڭ قولىڭ بەرگەندى سول قولىڭ بىلمەسىن" دەگەن ءتامسىلدى بەرىك ۇستانادى. گۇلنار بالعىنداردىڭ كوڭىلىن كوتەرۋ ءۇشىن ءتۇرلى ەرتەگى قويىلىمدارىن، مۋلتفيلم كورسەتىلىمدەرىن ۇيىمداستىرىپ ءجۇر.

جومارت جانداردى يگى شارالارعا ۇيىستىرا بىلگەن ول وڭىردەگى بارلىق مۇقتاج وتباسىلار ەرىكتىلەر نازارىنان تىس قالمايتىنىن ايتادى.

"الەۋمەتتىك كومەكتى قاجەت ەتەتىن وتباسىلاردىڭ ءتىزىمى بار بازاسى جاساقتالعان. سول وتباسىلارعا مۇمكىندىككە قاراي ازىق-تۇلىك سەبەتىن اپارىپ بەرەمىز. مەرەكەلەردە ول ۇيلەردە ناۋقاس، ەرەكشە جاعدايدى قاجەت ەتەتىن بالالار بولسا، ءبىز مەرەكەلىك كوڭىل-كۇي سىيلاۋ ماقساتىندا ءارتۇرلى قويىلىمدار قويۋعا تىرىسامىز. ولارعا سىيلىقتار اپارۋعا، ويىنشىقتار، بالا تەك تاماقپەن عانا كۇن كورمەيدى عوي. وعان ويىنشىق، ەرەكشە ەموسيا كەرەك. ءبىز سولاردى سىيلاۋعا تىرىسامىز" ،- دەيدى وبلىستىق جاستار ساياساتى ماسەلەلەرى باسقارماسىنىڭ ءبولىم باسشىسى گۇلنار سارسەنباي.

ۇسىنعان: ادىلەت مادەنيەت