رەسەيدىڭ جوعارى وقۋ ورىندارىندا 70 مىڭنان استام قازاقستاندىق ستۋدەنت ءبىلىم الۋدا دەپ حابارلايدى Qamshy.kz اقپارات اگەنتتىگى سپۋتنيك پورتالىنا سىلتەمە جاساپ.
"جىل سايىن 12 مىڭعا جۋىق قازاقستاندىق رەسەيگە وقۋعا تۇسەدى"، - دەدى "روسسوترۋدنيچەستۆو" جەتەكشىسىنىڭ ورىنباسارى پاۆەل شيەۆسوۆ.
"روسسوترۋدنيچەستۆو" 450 ورىنعا كۆوتا ۇسىنادى. وسى ورىنعا 3 مىڭعا جۋىق ادام ءوتىنىش تاپسىردى. بۇل قازاقستاندىقتار اراسىندا رەسەيدىڭ جوعارى وقۋ ورىندارىنا قىزىعۋشىلىق بار ەكەنىن كورسەتەدى"،- دەدى پاۆەل شيەۆسوۆ.
ايتا كەتسەك، بۇگىن ەلوردادا ورىس ءتىلى مەن ادەبيەتى وقىتۋشىلارى قاۋىمداستىعىنىڭ XIV حالىقارالىق كونگرەسى باستالدى. جيىندا "كوپتىلدى الەمدەگى ورىس ءتىلى" ماسەلەسى تالقىلاناتىن بولادى.
"كونگرەستى نۇر-سۇلتان قالاسىندا وتكىزۋ شەشىمى قابىلداندى. بۇل قازاقستاننىڭ حالىقتار اراسىنداعى بەيبىتشىلىك پەن تاتۋلىقتى ساقتاۋ ۇستانىمىن قولداۋدى بىلدىرەدى. قازاقستاندىقتار قازاق جانە ورىس تىلدەرىندە ەركىن سويلەيدى"،- دەدى "روسسوترۋدنيچەستۆو" وكىلى.
پاۆەل شيەۆسوۆتىڭ ايتۋىنشا، قازاقستاندا رۋسيستيكانىڭ ەرەكشە مەكتەبى قالىپتاسقان. ەلەونورا سۇلەيمەنوۆا، گالينا ۆلاسوۆا، شولپان جارقىنبەكوۆا، نۇرسۇلۋ شايمەردەنوۆا، تامارا كوتلياروۆا، ەۆگەنيا جۋراۆليەۆا، تاتيانا كريۆوششاپوۆا سىندى فيلولوگتار بارشا الەمگە تانىلعان.
ورىس ءتىلى مەن ادەبيەتى وقىتۋشىلارى قاۋىمداستىعىنىڭ العاشقى كونگرەسى وسىدان 50 جىل بۇرىن وتكەن. فورۋم بۇعان دەيىن بىرنەشە ەلدە ۇيىمداستىرىلدى.
ۇسىنعان: ادىلەت مادەنيەت
