جازۋشى دۋمان رامازان مىرزانىڭ ءجون-جوسىقسىز، بايلام-باعدارسىز شقو اكىمىنىڭ ورىنباسارى جاقسىلىق ومارعا شۇيلىگىپ، بۇكىل ەلدى دۇرلىكتىرگەنىنە تاڭىرقاپ وتىرمىن. وزىنە تىكەلەي حابارلاسىپ، سەبەبىن سۇراۋدىڭ ورنىنا، شوۋ جاساپ، تاقىرىبىن ايعايلاتىپ قويىپ، تۋرا ءبىر حالىق جاۋىن تاپقانداي اتتانداعانىنا قاراپ: "ءوز مۇددەسى ءۇشىن ايانبايتىن ەرلەر 37 جىلدارمەن بىتپەپتى عوي" دەگەن ويعا كەلدىك. ەڭ سوڭىندا كەلىستىك، تۇسىنبەستىك بولىپتى دەيدى. سول تۇسىنبەستىكتىڭ الدىن الۋ ءۇشىن جالپاق جۇرتقا جاريا سالۋ كەرەك پە ەدى؟ اۋەلى، وسى بىزدە دراماتۋرگيانىڭ دا ناۋقاندىق شاراعا اينالىپ بارا جاتقانىنا قىنجىلامىن. ءمۇشايرالاردى پالەنشە جىلدىقتار مەن مەرەكەلەردىڭ قۇرمەتىنە ارناپ، حاس ولەڭنىڭ ءقادىرىن قاشىرىپ ەدىك. ەندى سول دەرت دراماتۋرگياعا دا جەتىپتى. "قازاق حاندىعىنىڭ 550 جىلدىعى" دەگەن جەلەۋ جاقسى بولدى. "كەرەي-جانىبەك"، "قابانباي-بوگەنباي"، "شاپىراشتى ناۋرىزباي" دەپ ات قويىڭىزدا، ديالوگتاردان تۇراتىن 20 بەتتىك پەساڭىزدى جونەلتىڭىز (ءبىزدىڭ كوپتەگەن ادەبيەتشىلەر درماتۋرگيانى ديالوگتاردىڭ تىزبەگى دەپ تۇسىنەدى). سوسىن اتتانداڭىز، مەنىكىن قويماي جاتىر، قازاقتى قورلاپ جاتىر دەپ. شىن دراماتۋرگيا ۋاقىت يىرىمىنە مالتىقپايتىن بولۋى كەرەك. تاريحي وقيعالاردى ساحنالاۋ، كوركەم ءسوز جۇلگەسىنە ءتۇسىرۋ ادەبيەت ەمەس، قايتا تاريحي وقيعالاردان تۋىنداعان بولمىستى، ونىڭ بۇگىنگە ىقپالىن كوركەم ماتىنگە اينالدىرۋ - ادەبيەت! ءبىز تاريحي وقۋلىقتارداعى دەرەكتەردى جيناقتاپ، كوركەم شىعارما جازدىق دەپ ءجۇرمىز. ادەبي سانانىڭ ءالى دە كەڭەستىك كەڭىستىكتە تۇرعاندىعىنىڭ ءبىر كورىنىسى وسى. بىزدەگى تاريحي شىعارمالاردىڭ تاقىرىبىنا قاراپ-اق، نە ايتقىسى كەلەتىنىن ءبىلىپ تۇراسىڭ...

ءتوقتارالى تاڭجارىق، facebook