قازاقستاندا “حالال جەزوكشەلىك” دەگەن ۇعىم پايدا بولدى. ايەلدەر راديكالدى يسلام اعىمىنا تۇسكەن ەر ازاماتتارعا تۇرمىسقا شىعىپ، كەيىننەن كۇيەۋلەرى “تالاق” (اجىراسۋ) ارقىلى ايىرىلىسىپ، ايەلدەرىن دوستارىنا وتكىزىپ جاتادى. ءدىنشىل ەر ازاماتتار ايەلدەرىنەن اجىراسىپ، دوستارىنا ايەل ەتىپ تابىستاۋ ءۇشىن “تالاق” ءسوزىن ايتادى ەكەن.  بۇل جۇيەگە تاپ بولعان ايەلدەر كەمىندە 3-5 رەت كۇيەۋگە شىعىپ جاتاتىنى بەلگىلى بولدى. سول ارالىقتا جۇكتى بولىپ جاتقان ايەلدەر، ءتىپتى بالالارىنىڭ اكەسى كىم ەكەنىن بىلمەيتىندەرىن ايتۋدا. “حالال جەزوكشەلىكتىڭ” قۇربانى بولعان اتىراۋ قالاسىنىڭ 35 جاستاعى تۇرعىنى 9 رەت كۇيەۋگە شىققانىن “راديوتوچكاعا” ايتىپ بەرگەن. ءوزى اۋقاتتى تۇراتىنىنا قاراماستان، 5 جىل ىشىندە 9 رەت اجىراسىپ ۇلگەرگەن. بۇگىندە ول تۋعان ۇلىنىڭ اكەسى كىم ەكەنىن ءدوپ باسىپ ايتا الماي وتىر. “5 جىل بۇرىن مەن نامازحان جىگىتتى كەزدەستىردىم. ءبىز وتباسىلى بولىپ، 1 جىل بىرگە تۇردىق. ءبىراق ءبىر كۇنى ەكەۋىمىز سوزگە كەلىسكەندە، كۇيەۋىم اجىراساتىنىن مالىمدەدى. ول دوسىنا حابارلاسىپ، مەنى وعان ايەلدىككە وتكىزەتىنىن ايتتى. مەن قارسى بولسام دا، اقىرى كەلىسىمىمدى الدى. ءسويتىپ دوسىنىڭ ايەلى بولىپ شىعا كەلدىم. كەيىن ول دا مەنى وزگە دوسىنا وتكىزدى”،- دەيدى اتىراۋلىق ايەل. قازاقستاندىق ءدىنتانۋشىلاردىڭ ايتۋىنشا، مۇنداي قادامعا باراتىنداردىڭ كوبى راديكالدى يسلام اعىمىنىڭ وكىلدەرى. ناتيجەسىندە ەلىمىزدە جۇزدەگەن بالا اكەسىنىڭ كىم ەكەنىن بىلمەي وسۋدە. “يسلام قاعيدالارىنا سايكەس “تالاق” ءسوزىن تەك جاعداي قاتتى ۋشىققان كەزدە عانا ايتادى. بۇل ءۇردىستىڭ ءوز قاتاڭ ەرەجەلەرى بار. ارنايى حاديستەر دە كەلتىرىلگەن. “تالاق” ءسوزىن ايتقاننىڭ وزىندە، مۇسىلماندار ءۇش اي ون كۇن كۇتىپ، سودان كەيىن عانا ەكى بولەك كەتەد”، – دەپ ءتۇسىندىردى ءدىنتانۋشى مۇحيددين پاتتەيەۆ. مۇنداي جاعدايعا دۋشار بولعان ايەلدەر اسىرەسە باتىس قازاقستان مەن الماتىدا ءجيى كەزدەسەدى ەكەن. ءدىنتانۋشىلار ولاردىڭ كوبى ءدىن تۇرعىسىنان ساۋاتى جوق بولعاندىقتان، وسىنداي الداۋدىڭ قۇربانىنا اينالىپ وتىرعاندارىن ايتۋدا.

Nur.kz