قانداستارىمىزدىڭ تۇراقتى تىركەۋگە تۇرۋىنا كەدەرگى بولىپ كەلگەن ۇكىمەتتىڭ №111 قاۋلىسىنداعى  اتى شۋلى ەكى انىقتاماعا، ونىڭ ىشىندە «سوتتىلىع» جونىندەگى قۇجاتقا بايلانىسى «دات» گازەتى ارقىلى ۇقك-نىڭ ءتوراعاسى  نۇرتاي ابىقايەۆتىڭ اتىنا اشىق حات جازعان بولاتىنبىز. اشىق حات جازۋعا ەكى انىقتامانى ماجىلىستە جۇمىس توبى تالقىلاپ  جاتقان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنان الىپ تاستاۋعا ۇقك-نىڭ دە قاتىسى بار دەگەن الدەكىمدەردىڭ ءسوزى سەبەپ بولعان ەدى.

ولاي ەمەس ەكەن. مىنە، جاقىندا سول حاتىمىزعا ۇقك-نەن جاۋاپ كەلدى.

حاتتا ءبىز تاراپىنان قويىلعان ۇسىنىستى قاراعانىن ايتا كەلىپ، «ءوز تاراپىڭىزدان كوتەرىلىپ وتىرعان سۇراقتاردى قاراستىرۋ ۇلتتىق قاۋىپسىزدىك كوميتەتىنىڭ قۇزىرىنا جاتپايدى» دەپتى دەپارتامەت وكىلى ا.قايىروۆ. سونىمەن بىرگە، «قازاقستاندا كوشى-قون سالاسىندا مەملەكەتتىك سايااتتى قالىپتاستىرۋ قازاقستان رەسپۋبليكاسىنىڭ ۇلتتىق ەكونوميكا مينيسترلىگىنە جۇكتەلگەن (2014ج.24.09 №1011 ق ر ۇكىمەت قاۋلىسى). وسىعان وراي، ءوز ۇسىنىستارىڭىز بويىنشا تولىق تۇسىنىك الۋ ءۇشىن جوعارىدا كورسەتىلگەن قۇزىرلى مەملەكەتتىك ورگانعا جۇگىنۋ كەرەكتىگىن ەسكەرتەمىز» دەلىنىپتى جاۋاپ حاتتا.

وسى ارالىقتا «سوتتىلىققا» قاتىستى ماسەلەنىڭ ماجىلىستەگى جۇمىس توبىنىڭ سەگىزىنشى وتىرىسىندا وڭ شەشىلگەنىن «قامشى.كز» سايىتى ارقىلى ايتقامىز. ەگەر، وسى جاڭا زاڭ جوباسى وسى ماقۇلدانعان تولىقتىرۋلار مەن وزگەرىستەر بويىنشا الداعى كۇندەردە سەناتتىڭ ماقۇلداۋىنان امان ءوتىپ، ەلباسىنىڭ قولى قويىلسا، قانداستارىمىزدان «سوتتىلىعى» جايلى انىقتاما دا تالاپ ەتىلمەيدى.

ءسوز سوڭىندا حاتىمدى قاداعالاپ، تۇسىنىك جاساپ، جاۋاپ بەرگەن ۇقك-نە شىن جۇرەكتەن العىس ايتامىن. ۇلت كوشباسشىسى نۇرسۇلتان نازاربايەۆتىڭ وسىناۋ زاڭ جوباسى جونىندەگى تاپسىرماسىنىڭ قالتقىسىز ورىندالاتىنىنا، قازاق كوشىنىڭ جولى اشىلاتىنىنا سەنەمىن!

قۇرمەتپەن،

اۋىت مۇقيبەك

23.06.2015

استانا