– بەرىك ءۋالي ۇلى، باسپا ءسوز قىزمەتكەرلەرىنىڭ كاسىبي مەرەكەسىنىڭ قارساڭىندا سۇحبات قۇرىپ وتىرعاندىقتان، اڭگىمەمىزدىڭ باسىندا وڭتۇستىك قازاقستان ءوڭىرىنىڭ بۇقارالىق اقپارات قۇرالدارىنىڭ تىنىس-تىرشىلىگىنە توقتالىپ وتسەڭىز. جۋرناليستەردىڭ ەڭبەگىن باعالاۋ، شىعارماشىلىقتارىنا قولداۋ كورسەتۋگە بايلانىستى قانداي ءىس-شارالار جاسالىپ جاتىر؟ – وبلىسىمىزدا بۇقارالىق اقپارات قۇرالدارى سانى جاعىنان باسقا وبلىستارمەن سالىستىرعاندا الماتى قالاسىنان كەيىن ەكىنشى ورىندا. وڭىرلىك باسپا ءسوز قۇرالدارى مەملەكەتتىڭ اقپاراتتىق ساياساتىن جۇزەگە اسىرۋدا، ايماقتاعى الەۋمەتتىك-ەكونوميكالىق جوبالار، اتقارىلىپ جاتقان يگىلىكتى ىستەر جايىندا ءوڭىر تۇرعىندارىنا عانا ەمەس، رەسپۋبليكا جۇرتشىلىعىن دا حاباردار ەتىپ كەلەدى. وسى ورايدا جۋرناليستەردىڭ ەڭبەگىن مەملەكەت تاراپىنان باعالاۋ مەن كوتەرمەلەۋ ماقساتىندا ارنايى ماراپاتتاۋلار، ءتۇرلى بايقاۋلار، سپارتاكيادالار، سەمينارلار ۇيىمداستىرىلىپ كەلەدى. داستۇرىمىزگە سايكەس، بيىل دا بايلانىس جانە اقپارات قىزمەتكەرلەرى كۇنىنە وراي كوپتەگەن ءىس-شارالار وتۋدە. ماسەلەن، وبلىستىق ىشكى ساياسات جانە ءدىن ىستەرى باسقارماسى تاراپىنان بۇقارالىق اقپارات قۇرالدارىنا ارنالعان بايقاۋدى اتاپ وتۋىمىزگە بولادى. بايقاۋدىڭ ناتيجەسى جۋرناليستەردىڭ كاسىبي مەرەكەسى كۇنى جاريا ەتىلمەك. بەرىلەتىن اقشالاي سىياقىنىڭ دا كولەمى قوماقتى بولعالى وتىر. اتاپ ايتساق، جەڭىمپازدارعا وبلىستىق «ۇزدىك تەلەارنا» اتالىمى بويىنشا – 1 000 000 تەڭگە، وبلىستىق «ۇزدىك باسىلىم» اتالىمى بويىنشا – 1 000 000 تەڭگە قارجىلاي سەرتيفيكات تابىس ەتىلەدى. بۇدان بولەك رەسپۋبليكالىق تەلەارنالار مەن گازەتتەردىڭ وبلىسىمىزداعى ۇزدىك مەنشىكتى تىلشىلەرى 500 000، «التىن ميكروفون»، «التىن قاۋىرسىن» يەگەرلەرى دە 500 000 تەڭگە اقشالاي سىيلىققا يە بولادى. ال جۋرناليستەردىڭ كاسىبي مەرەكەسىندە تاعايىندالاتىن سىيلىقتىڭ جالپى جۇلدە قورى – 4 ملن. تەڭگە. مۇنىڭ بارلىعى وڭىردەگى ءباسپاسوزدىڭ كەڭىنەن قانات جايۋىنا، سونداي-اق ءتورتىنشى بيلىك وكىلدەرىنە كورسەتىلىپ جاتقان قولداۋ دەپ تۇسىنگەنىمىز ابزال. – ءوزىڭىزدى كورەرمەن قاۋىم بىلىكتى تەلەجۋرناليست رەتىندە جاقسى تانيدى. وسىدان 3 جىل بۇرىن قازاقتىڭ قايماعى بۇزىلماعان وڭتۇستىككە كەلىپ، مەملەكەتتىك جاۋاپتى قىزمەتكە كىرىسكەنىڭىزدە ارىپتەستەرىڭىز دە شىنايى تىلەكتەستىكپەن، قۋانا قارسى الدى. ويتكەنى ءجۋرناليستىڭ جان دۇنيەسىن وسى سالانىڭ بىلگىر مامانى، شىنايى جاناشىرى عانا تۇسىنەدى ەمەس پە؟! وبلىس اكىمىنىڭ باسپا ءسوز حاتشىسى ءارى وبلىس اكىمى اپپارات باسشىسىنىڭ ورىنباسارى بولىپ قىزمەت ەتكەن جىلداردا جەرگىلىكتى بيلىك پەن باق-تىڭ اراسىنداعى بايلانىس قانداي دەڭگەيدە دامىدى دەپ ايتا الاسىز؟ – بيلىك پەن ب ا ق اراسىنداعى بايلانىستىڭ نەگىزگى تەتىگى ول، ارينە، باسپا ءسوز قىزمەتى. ال باسپا ءسوز حاتشىسى ول ەكەۋىنىڭ اراسىنداعى التىن كوپىر ىسپەتتى. بۇل دانەكەرلىك مىندەتتى قالاي اتقارعانىمىزدى قاراپايىم حالىق پەن ارىپتەستەرىم ايتا جاتار. دەگەنمەن، بيلىك پەن بۇقارالىق اقپارات قۇرالدارى اراسىندا تىعىز بايلانىس ورناتۋ ماقساتىندا وڭتۇستىك قازاقستان وبلىسى اكىمدىگىنىڭ 2014 جىلعى 8-شىلدەدەگى №217 قاۋلىسىمەن «وڭتۇستىك قازاقستان وبلىسى اكىمدىگى جانىنداعى بۇقارالىق اقپارات قۇرالدارىمەن ءوزارا ءىس-قيمىل جونىندەگى» كەڭەس قۇرىلعان بولاتىن. كەڭەستىڭ نەگىزگى مىندەتتەرى ءوزارا ءىس-قيمىلدىڭ ءتيىمدى جولدارىن ىزدەۋ، قىزمەتتىك قۇزىرەت شەڭبەرىندەگى ماسەلەلەردى شەشۋگە باعىتتالعان شارالاردى ازىرلەۋ، بەلگىلى ءبىر ماسەلەلەر جونىندە ۇسىنىستار ەنگىزىپ وتىرۋ جانە تاعى باسقا. مەملەكەتتىك ورگانداردىڭ اشىقتىعىن قامتاماسىز ەتۋ، جۇمىستارىنان اقپارات بەرىپ وتىرۋ ءۇشىن «وڭتۇستىك» اقپارات ورتالىعىن اشتىق. ورتالىقتا لاۋازىمدى تۇلعالاردىڭ جۋرناليستەرگە باسپا ءسوز ءماسليحاتتارى، كۇن تارتىبىندە تۇرعان ماسەلەلەرگە پىكىر ءبىلدىرۋ شارالارى ۇيىمداستىرىلىپ وتىرادى. ءبىر ايتا كەتەرلىگى، جۋرناليستەر الدىنداعى مۇنداي ەسەپ بەرۋلەر كۇندەلىكتى ۇيىمداستىرىلۋدا. سونىمەن قاتار بىلتىردان بەرى ىشكى ساياسات جانە ءدىن ىستەرى باسقارماسىنىڭ ۇيىمداستىرۋىمەن جۋرناليستەرگە ارنالعان تۇراقتى سەمينار وتكىزىلىپ كەلەدى. ول سەمينارلارعا ەلىمىزگە تانىمال رەداكتورلار، بىلىكتى جۋرناليستەر، سايت جەتەكشىلەرى، ساراپشىلار قاتىسىپ، تاجىريبەلەرىمەن بولىسەدى. – جاقىندا ەلباسى «ۇلت جوسپارى – 100 ناقتى قادام» باعدارلاماسىن جاريا ەتكەنى بەلگىلى. اتالعان رەسمي قۇجاتتا «كاسىبي مەملەكەتتىك اپپارات قۇرۋ» دەپ اتالاتىن ءبولىم بار. وسى ماسەلەگە بايلانىستى وي-پىكىرىڭىزدى بىلسەك. – ەلباسىنىڭ بەس ينستيتۋتتىق رەفورماسى 100 ناقتى قادام نەگىزىندە جۇزەگە اسىرىلاتىنى ءمالىم. وعان بارلىق مەملەكەتتىك ورگاندارمەن وبلىستىڭ ىشكى ساياسات باسقارماسى دا تىكەلەي اتسالىسۋدا. ۇلت جوسپارىنىڭ العاشقى باعىتى – كاسىبي مەملەكەتتىك اپپارات قۇرۋ بولىمىندە باستى باعدار زاماناۋي، كاسىبي مەملەكەتتىك اپپارات قۇرۋعا نەگىزدەلىپ وتىر. وسى باعىتتىڭ ءتۇپ ماقساتى – مەملەكەتتىك قىزمەتكەرلەردىڭ كورپۋسىن كاسىبي جانە اۆتونومدى دارەجەگە جەتكىزۋ. مەملەكەتتىك قىزمەتكەرلەر كورپۋسىنىڭ، اسىرەسە، اكىمشىلىك مەملەكەتتىك قىزمەتكەرلەردىڭ اۆتونومدى بولۋى دەگەنىمىز سايلاۋ، مينيسترلەر مەن اكىمدەردىڭ جانە باسقا دا جەتەكشىلەردىڭ اۋىسۋى كەزىندە وعان اسەر ەتپەۋى بولىپ سانالادى. سونىمەن قاتار مەملەكەتتىك قىزمەتشىلەردىڭ مانساپتىق وسۋىندە لاۋازىمدىق ساتىلاردان ءوتىپ، كاسىبي بىلىكتىلىگىن ناقتى تاجىريبەدە جيناقتاۋىنا كوڭىل ءبولۋ دە اتالعان رەفورمانىڭ مازمۇنىندا كورىنىس تاپقان. وسى ورايدا ايتايىن دەگەنىم، مەملەكەتتىك قىزمەتتە كاسىبي ورىنداۋشىلار عانا ەمەس، مەملەكەتشىل ءازاماتتاردىڭ كوبىرەك بولعانى دۇرىس. ويتكەنى بولاشاعىن، وتكەنى مەن كەلەشەگىن بولجاي الاتىن مەملەكەتشىل ادامدار كوپ بولسا عانا، بۇل قىزمەتتىڭ الەۋەتى ارتىپ، مارتەبەسى بيىكتەي تۇسەدى. – «100 قادام» ۇلت جوسپارىن جۇزەگە اسىرۋعا باعىتتالعان شارالارعا توقتالىپ وتسەڭىز. – ۇستىمىزدەگى جىلدىڭ 14ء-ساۋىر كۇنى قازاقستان رەسپۋبليكاسى پرەزيدەنتى جانىنداعى قازاقستان ستراتەگيالىق زەرتتەۋلەر ينيستيتۋتىمەن بىرلەسىپ، «بەس ينستيتۋتتىق رەفورما: دامۋعا قارقىن قوسىپ، ماڭگىلىك ەل بولۋ» تاقىرىبىندا وڭىرلىك فورۋمىن وتكىزدىك. ال جۋىردا «بەس ينستيتۋتتىق رەفورما. 100 ناقتى قادام: اقپاراتتىق قامتۋ جانە ىلگەرىتۋ» اتتى ايماقتىق جۋرناليستەر فورۋمى وتكىزىلدى. فورۋمعا قاتىسۋشىلار «اقپاراتتىق قامتۋ جانە ىلگەرىلەتۋ»، «ماڭگىلىك ەل قازاقستاندىق بىرتەكتىلىك يدەيالارىن جۇزەگە اسىرۋ»، «باق-عى ينتەرنەتتەگى بۇقارالىق اقپاراتتىڭ جاڭا بۋىندارىن قالىپتاستىرۋ»، «بارشاعا ارنالعان قازىرگى زامانعى يدەيانى جۇزەگە اسىرۋدىڭ نەگىزدەرى» تاقىرىپتارى بويىنشا باياندامالار جاساپ، پىكىر الماستى. بەس حالىقتىق رەفورمانىڭ ماڭىزدىلىعى تۋرالى ويلارىمەن ءبولىستى. – بيىلعى مەرەكەلەر جىلى اياسىندا اتقارىلعان كەيبىر شارالار تۋرالى ايتىپ بەرسەڭىز. – رەسمي ستاتيستيكاعا جۇگىنسەك، وڭتۇستىك قازاقستان وبلىسىندا 108 ەتنوس وكىلدەرى تۇرادى. وبلىس اۋماعىندا قوعامدىق-ساياسي احۋال تۇراقتى. جەرگىلىكتى باسقارۋ ورگاندارىنىڭ ازاماتتىق قوعام ينستيتۋتتارىمەن بىرلەسە جۇرگىزىپ وتىرعان جۇيەلى جانە ماقساتتى جۇمىستارى بار. ولاردىڭ بارلىعى ۇلتارالىق كەلىسىم مەن كونفەسسياارالىق تاتۋلىق پەن ىنتىماقتاستىققا نەگىزدەلگەن. ەتنوسارالىق قاتىناستاردى نىعايتۋ ماقساتىندا 2014 جىلى وبلىستىق ىشكى ساياسات جانە ءدىن ىستەرى باسقارماسى وبلىستىق ەتنومادەنيورتالىقتار، قوعامدىق ۇيىمدار وكىلدەرىمەن بىرلەسە وتىرىپ ەتنوس وكىلدەرى كوپ شوعىرلانعان ماقتارال، سارىاعاش اۋداندارى مەن تۇركىستان، كەنتاۋ قالالارى تۇرعىندارىمەن كەزدەسۋلەر وتكىزدى. مۇنداي كەزدەسۋلەر وتكىزۋ بيىل دا جوسپارلانىپ وتىر. قازاقستان حالقى اسسامبلەياسىنىڭ 20 جىلدىعىنا ارنالعان قازاقستان حالقى اسسامبلەياسى — 20 ىزگى ءىس» رەسپۋبليكالىق ەستافەتاسىنىڭ باس بەلگىسى «تايقازان» كيەلى تۇركىستان قالاسىنان باستاۋ الدى. وبلىستىق ىشكى ساياسات جانە ءدىن ىستەرى باسقارماسىنىڭ تاپسىرىسى بويىنشا قازىرگى تاڭدا قازاقستان حالقى اسسامبلەياسىنىڭ 20 جىلدىعىنا ارنالعان «بالالار سوققان دوستىق ءۇيى» تاقىرىبىندا انيماسيالىق فيلم ءتۇسىرىلدى. بۇل انيماسيالىق تۋىندىلاردىڭ ءمانى مەن ماڭىزى ەرەكشە. ول جاس ۇرپاقتى وتاندى قۇرمەتتەۋگە ۇيرەتەدى. بىرلىكتى ناسيحاتتايدى، جاستاردى ادامگەرشىلىك پەن باۋىرمالدىققا تاربيەلەيدى. حالىقتار اراسىندا ىنتىماقتاستىق پەن دوستىقتى نىعايتادى. 1-ماۋسىم — حالىقارالىق بالالاردى قورعاۋ كۇنىنە ورايلاستىرىلىپ انيماسيالىق ءفيلمنىڭ تۇساۋكەسەر شاراسىن ۇيىمداستىردىق. ءقازىردىڭ وزىندە بالالارعا ارنالعان «بالاپان» تەلەارناسى بۇل تۋىندىنى كورسەتۋگە نيەت تانىتىپ وتىر. – حالقىمىزدىڭ باي رۋحاني دۇنيەسىن، بويىنا جيعان بارلىق قازىناسىن، اسىل مۇراسىن بۇگىنگە جەتكىزگەن ول انا ءتىلىمىزدىڭ قۇدىرەتى ەكەنى بەلگىلى. انا تىلىنە قۇرمەت كورسەتۋدە وڭتۇستىك ءوڭىرىنىڭ ورنى قاشاندا بولەك، ۇلگى بولارلىقتاي. ءىس قاعازداردى مەملەكەتتىك تىلگە تولىقتاي كوشىرۋدە وبلىستارىڭىز كوش باستاپ تۇر. وبلىستا بۇقارالىق اقپارات قۇرالدارى، ونىڭ ىشىندە ءقازاقتىلدى باسىلىمدار كوپتەپ جارىق كورۋدە. دەسەك تە، مەملەكەتتىك تىلگە قاتىستى بارلىق ماسەلەلەر وڭىردە وڭ شەشىمىن تاپقان دەپ تولىق سەنىممەن ايتا الاسىز با؟ – ءتىل – ۇلتتىڭ وزىندىك بەينەسىن انىقتايتىن، رۋحاني كەلبەتىن كورسەتەتىن ءتولقۇجات دەپ ايتۋىمىزعا بولادى. ول ۇلتتىڭ وزگەدەن ەرەك دارالىعىن انىقتايتىن ەرەكشە بەلگى. انا ءتىلى ارقىلى ورنىعاتىن ۇلتتىق سانانى قالىپتاستىرۋشى اباي، شاكارىم، سۇلتانماحمۇت، احمەت، ت.ب. دانالاردىڭ شىعارماشىلىعىندا ناعىز زياتكەرلىكتىڭ ۇلگىسى بار. ەلباسىنىڭ: «ءبىز بارشا قازاقستاندىقتاردى بىرىكتىرۋشى باستى فاكتورلارىنىڭ ءبىرى – ەلىمىزدىڭ مەملەكەتتىك ءتىلىن، بارلىق قازاقتاردىڭ انا ءتىلىن ودان ءارى دامىتۋعا بار كۇش-جىگەرىمىزدى جۇمساۋىمىز كەرەك» دەگەن پىكىرى قوعامدا قازاق ءتىلىنىڭ قانشالىقتى ماڭىزدى ورىنعا يە ەكەنىن ءبىلدىرىپ تۇر. ەندەشە، قازاق ءتىلىنىڭ يدەولوگيالىق قۇرال بولا الارى ءسوزسىز. مەملەكەتتىك ءتىل – مەملەكەتتىك ماڭىزى بار ماسەلە. وسى باعىتتا قۇزىرلى ورىندارمەن بىرگە كەز كەلگەن قازاق ازاماتى بولسىن، وتباسى بولسىن قىزمەت اتقارسا، تىلگە بايلانىستى ماسەلەلەر وزىنەن-وزى شەشىلەتىنى بەلگىلى. وڭتۇستىك قازاقستان وبلىسى حالقىنىڭ 90 پايىزدان استامى مەملەكەتتىك ءتىلدى مەڭگەرگەن دەپ ايتا الامىز. وبلىس اۋماعىندا 15 وقىتۋ ورتالىعى جۇمىس اتقارۋدا، تىلدەردى قولدانۋ مەن دامىتۋعا باعىتتالعان ءىس-شارالاردىڭ ناتيجەسىندە مەملەكەتتىك ءتىلدى مەڭگەرگەن ەرەسەك تۇرعىنداردىڭ ۇلەسى 89،5 پايىزعا جەتكەن. سوندىقتان مەملەكەتتىك تىلگە قاتىستى ماسەلەلەر وڭتۇستىك وڭىردە وڭ شەشىمىن تاپقان دەۋگە تولىق نەگىز بار. – انا ءتىلىمىز تۋرالى ءسوز قوزعاعاندا سىزگە كاسىبي تەلەجۋرناليست رەتىندە تاعى ءبىر سۇراق قويعىمىز كەلىپ وتىر. ەلىمىزدەگى تەلەارنالاردىڭ بۇگىنگى دەڭگەيىنە كوڭىلىڭىز تولا ما؟ قانداي باعدارلامالارعا جوعارى باعا بەرەر ەدىڭىز؟ تەلەارنالارداعى ءتىل مادەنيەتى، سويلەۋ مادەنيەتى، تەلەجۇرگىزۋشىلەردىڭ بىلىكتىلىگى مەن ۇستانىمىنا قاتىستى قانداي ويلارىڭىز بار؟ – بۇقارالىق اقپارات قۇرالدارىندا، اسىرەسە تەلەارنالاردا ءتىل مادەنيەتىنىڭ، سويلەۋ مادەنيەتىنىڭ، اسىرەسە تەلەجۇرگىزۋشىلەرگە كەلگەندە وسى ماسەلەنىڭ قايتا-قايتا الدىمىزدان شىعۋىنىڭ ءوزى ءالى دە بولسا بۇعان قاتىستى شەشىمىن تاپپاعان ساۋالداردىڭ بار ەكەندىگىن كورسەتسە كەرەك. دەگەنمەن، اۋىزدى قۋ شوپپەن سۇرتۋگە بولماس. «استانا» تەلەارناسىنداعى جاينا سلامبەكتىڭ «ءبىزدىڭ ۋاقىت» جانە قالقامان ءساريننىڭ «كەش ەمەس..»، سونداي-اق «قازاقستان» ۇلتتىق ارناسىنداعى مەيىرجان الىبەك جۇرگىزەتىن «اپتا.kz» پەن بەيسەن قۇرانبەكتىڭ «ايتۋعا وڭاي» باعدارلاماسىن اتاپ وتەر ەدىم. جالپى العاندا، ءتىل مادەنيەتىن قالىپتاستىراتىن بىردەن-بىر ورتا بۇگىندە تەلەديدار مەن باسپا ءسوز قۇرالدارى بولىپ وتىر. سوندىقتان تەلەديدارعا، اسىرەسە قازاق ءتىلىن جاقسى مەڭگەرگەن ادامدار شىعۋ كەرەك دەپ ەسەپتەيمىن. ءوزى ءتىلدى اۋىزەكى ديالەكت اياسىندا مەڭگەرگەن، سوزدىك قورى از، كەيبىر سوزدەردى دۇرىس ايتا المايتىن، تىلىندە مۇكىستىگى بار ادامدارى، تەلەديدارعا شىعارعاننان ۇتپاسىمىز انىق. – سوڭعى جىلدارى وڭتۇستىك قازاقستان وبلىسى الەۋمەتتىك-ەكونوميكالىق جاعىنان قارقىندى دامىپ كەلەدى. مەملەكەت باسشىسى شىمكەنت قالاسىن قازاقستانداعى ءۇشىنشى مەگاپوليس بولادى دەپ باعالادى. بۇل رەتتە قالانى وسى مەجەگە جەتكىزۋ جولىندا قانداي جۇمىستار اتقارىلۋدا؟ – بيىل ەلباسى وبلىسىمىزعا ىسساپارىمەن ەكى رەت كەلدى. ءاربىر ساپارىندا مەملەكەت باسشىسى ءوڭىردىڭ دامۋىنا جوعارى باعا بەرىپ كەلەدى. وبلىستا ىسكە قوسىلىپ جاتقان جاڭا نىساندار، بوي كوتەرىپ جاتقان عيماراتتار، جاڭا جۇمىس ورىندارىنىڭ اشىلۋى ەلىمىزدەگى الەۋمەتتىك-ەكونوميكالىق ساياساتتىڭ وڭ ناتيجەسى ەكەنى داۋسىز. ەلباسى بىلتىر جەلتوقسان ايىندا جاساعان ساپارىندا وبلىس ورتالىعىنداعى ءبىرقاتار نىسانداردى اشىپ، اتقارىلىپ جاتقان جۇمىستارمەن ەگجەي-تەگجەيلى تانىسقان بولاتىن. بۇگىندە شىمكەنتتى رەسپۋبليكامىزداعى ءۇشىنشى قالا ەتۋ بويىنشا قىرۋار جۇمىستار اتقارىلۋدا. سولاردىڭ ءبىرى — شىمكەنت قالاسىنداعى جاڭا اكىمشىلىك ىسكەرلىك ورتالىعى. وندا بۇگىنگى تاڭدا ءبىرقاتار نىساندار وبلىستىق بيۋدجەت ەسەبىنەن سالىنىپ، پايدالانۋعا بەرىلدى. اتاپ ايتقاندا، ورتالىقتىڭ اۋماعىندا وبلىس اكىمدىگى عيماراتىنىڭ قۇرىلىس جۇمىستارى اياقتالىپ، 16 قاباتتى عيمارات بوي كوتەردى. سونىمەن قاتار ورتالىقتا مادەني وشاقتار وبلىستىق «وتىرار» كىتاپحاناسى، «كورمە» ورتالىعى، ج.شانين اتىنداعى قازاق دراما تەاترى، «تۇركىستان» سارايى جانە 500 ادامدى قابىلداي الاتىن جاڭا ەمحانا پايدالانۋعا بەرىلدى. جاڭا اۋداندا قازىرگى تاڭدا كوپتەگەن كوپقاباتتى تۇرعىن ۇيلەردىڭ قۇرىلىسى جۇرگىزىلۋدە. «قازىنا» ەتنو-مادەني كەشەنى سالىندى. وندا ناۋرىز الاڭى، وبلىستىق ولكەتانۋ مۇراجايى، ادەت-عۇرىپ ءسالت-داستۇر ورتالىعى جانە قازاق حاندىعىنىڭ 550 جىلدىعىنا وراي ەسكەرتكىش تە وسى كەشەننىڭ اۋماعىندا بوي كوتەردى. مەن مۇنى وسى قالانىڭ تۇرعىنى رەتىندە زور ماقتانىشپەن ايتا الامىن. ويتكەنى وسى ءوڭىر ماعان رۋح پەن كۇش بەرىپ تۇراتىنداي. ەكى بالام وسى قالادا دۇنيەگە كەلدى. ءوڭىردىڭ اسەمدىككە تولى تابيعاتى، اتا-بابامىزدىڭ قالدىرعان ءسالت-داستۇرى مەن مول مۇراسى بۇل وڭىردە ءالى كۇنگە دەيىن ساقتالعان. – ەركىندىكتى قالايتىن شىعارماشىلىق ادامى ءۇشىن ۋاقىتپەن ساناسپايتىن، قاتاڭ تارتىپكە باعىناتىن مەملەكەتتىك قىزمەتتى اتقارۋ قانشالىقتى وڭاي نەمەسە قيىن؟ – مەملەكەتتىك قىزمەتتى اتقارۋ، حالىق ءۇشىن قىزمەت ەتۋ – تۇسىنە بىلگەنگە زور باقىت دەر ەدىم. بۇرىن وسى مەملەكەتتىك قىزمەتكەرلەر نە بىتىرەدى دەپ سىني كوزبەن قاراۋشى ەدىم. سىرتتان تون ءپىشۋ، ارينە، وڭاي. ءوزىڭىز ايتپاقشى، شىعارماشىلىقتان قاتاڭ تارتىپكە باعىناتىن مەملەكەتتىك قىزمەتكە اۋىسقانىما 3 جىل بولىپتى. وسى 3 جىلدا مەملەكەتتىك قىزمەتتىڭ كۇردەلىلىگى، قيىندىعى، ەرەكشەلىگى، جاۋاپكەرشىلىگى قانداي بولاتىنىن ءتۇسىندىم. توقەتەرىنە كەلگەندە، مەملەكەتتىك قىزمەتكەردىڭ ەڭ باستى مىندەتى مەملەكەتكە، حالىققا ادال قىزمەت ەتۋ. تاڭنىڭ اتىسى، كۇننىڭ باتىسى جۇمىستا ءجۇرۋ ءبىر بولەك. ءارتۇرلى وزەكتى ماسەلەلەردىڭ شەشىلۋىنە اتسالىسۋ، ول شەشىمدەردىڭ قابىلدانۋىنا ىقپال ەتۋ، قاراپايىم حالىقپەن جۇمىس ىستەۋ قاشاندا ماڭىزدى. ءوزىم تىكەلەي اينالىساتىن ىشكى ساياسات سالاسىنداعى ءدىن ماسەلەسى، قوعامدىق-ساياسي احۋال، قوعامدىق قاتىناستار، اقپاراتتىق ساياسات باعىتىنداعى جۇمىستاردى جۇرگىزۋ ۇلكەن جاۋاپكەرشىلىكتى قاجەت ەتەدى. – اڭگىمەڭىزگە راقمەت!
سۇحباتتاسقان ل.ابىجەت قىزى
