ءسوزدىڭ ماگيالىق قۋاتى بار ەكەندىگىنە وسى ونەردى توڭىرەكتەگەن ادامداردىڭ ءبىرشاماسى قارسى كەلە قويمايدى. سويتە تۇرا ءبىز «جاقسى ءسوزدىڭ-جارىم ىرىس»  ەكەنىن قاپەردەن شىعارىپ الىپ جاتامىز. كەلەڭسىز سوزدى-كەلەڭسىز ويلاردى كوپ ويلايتىندىعىمىزدان  ايتاتىن بولۋىمىز كەرەك. ال نەگە «كەلەڭسىز» ويلايمىز؟ بىرەۋدىڭ ۇيىندە شىرىلداعان ءسابيدىڭ ءۇنى شىعىپ، پەرزەنتتى بولىپتى دەگەن جاڭالىقتان كورى، ءوز بالاسىن ءوزى ورتەپ جىبەرىپتى دەگەن اقپارات كوپ وقىلادى. ءبىرى ەلىمىزدىڭ باتىسىندا، ەندى ءبىرى شىعىسىندا ءجۇرىپ، ءبىر –بىرىنە ارەڭ قولى جەتكەن قوس عاشىق شاڭىراق كوتەرىپتى دەگەن جاڭالىققا قاراعاندا، سونشاما جىل وتاسقان الگىلەر ايىرىلىسىپ تىنىپتى  دەگەن سىڭايداعى اڭگىمەنىڭ عۇمىرى ۇزاق. كوپ تالقىعا تۇسەدى. ءبىز قايدا بارا جاتىرمىز؟ بۇرىن  جاعىمسىز جاڭالىقتى اۋزىنىڭ سۋى قۇرىپ ايتۋشىنى وسەكشى دەپ جاقتىرماۋشى ەدىك. ءقازىر ونى ايتۋدان دا، تىڭداۋدان دا شىمىرىكپەيتىن بولىپ بارامىز. ءبىزدىڭ جاناشىرلىق سەزىمىمىز بەن قابىلەتىمىز سەمىپ بارا جاتقانداي. ينتەرنەتتە ارى- بەرى سىلتەنىپ جاتاتىن جاڭالىقتارعا ۇيىعان حالىقتىڭ سامارقاۋ كەيىپى كىمدەرگە قولايلى؟ ول راس، عالامتور ءبىزدىڭ ءومىرىمىزدىڭ بولشەگىنە اينالىپ كەتتى. ونسىز دۇنيەدەن ماقۇرىم قالعانداي ءبىر كۇي كەشەسىڭ. دەسەدە، ەكرانعا ۇڭىلگەننىڭ بارلىعى ەرگىپ وتىر دەپ ايتۋعا تاعى كەلمەيدى. سولاي وتىرىپ تىرلىگىن بىتىرەتىندەر، بيزنەسىن جۇرگىزەتىندەر بارشىلىق. ءبىراق سول بارشىلىقتاردىڭ قاراسىندا ءبىزدىڭ  قانداستارىمىزدىڭ ۇلەسى قانشا ەكەن دەگەن سۇراق سۋماڭداي بەرەدى. جالپى جالپاق تىلدە قازاقتى جالقاۋ دەپ ايتۋعا قۇشتارمىز عوي. ءبىراق جەڭىل جۇمىستا جۇرگەن قازاقتىڭ سانى از سەكىلدى. ماسەلەن، ءوزىم بۇگە-شىگەسىنە دەيىن بىلەتىن بيۋتي يندۋستريادا ءبىر قازاق جوق. راس، بىزدە كوسمەتيكا ءوندىرىسى دامىماعان. دەسە دە تىستان كەلەتىن برەندتەردىڭ ماركەتولوگتارىنان باستاپ، ساتۋشىسىنا دەيىن باسقا ۇلتقا تيەسىلى. ال انىعىندا  بيۋتي يندۋستريا سونشالىقتى اۋىر سالا ەمەس. ول ەتيكا مەن ەستەتيكانى تالاپ ەتەتىن، تازا  ورتادا ويناپ-كۇلىپ جۇرەتىن بيزنەس ءتۇرى. مۇندا ەرلەر دە، نازىك جاندىلار دا ءناپاقاسىن ايىرا الادى. بۇل سالاعا بارۋ ءۇشىن  ارنايى وقۋ ورنىن ءتامامداۋدىڭ دا قاجەتى شامالى. ءبىراق تابىس كوزى باسقا ماماندىقتارعا قاراعاندا جوعارى. سەبەبى بۇگىنگى تاڭدا سۇلۋلىق پەن سانگە نازار اۋدارىلىپ جاتىر. بيۋتي سالاسىنىڭ كوسمەتيكالىق  كاسىبىن بىلاي ىسىرعاندا، ءبىزدىڭ ۇلت وكىلدەرىنىڭ اراسىنان شىققان ۆيزاجيستەردى دە از جولىقتىرامىز. ال تويشىل قازاقتىڭ قىز-كەلىنشەكتەرى سالتاناتقا ساندەنىپ باراتىنى جاسىرىن ەمەس قوي. جوعارىدا اتاپ وتكەنىمىزدەي، ۆيزاجيست بولۋ سونشالىقتى قيىن ەمەس. كوسمەتيكا ءونىمىنىڭ كاسىبىمەن اينالىسۋ دا اسا اۋىر شارۋا ەمەس. ءدال سول سەكىلدى تالعامى بار ادامدار-ستيليست تە بولا الادى. بار بولاعانى وسى سالاعا قىزىعۋشىلىق قاجەت. ۇبت-دان وتە الماي قالسا، ءومىر دە سول جەردەن توقتايدى دەپ ويلايتىن دا قازاق قانا. ال باسقا جۇرت وسىنداي جەڭىل ءارى وڭاي ولجا تاباتىن جەردى توڭىرەكتەيدى. بىلىمگە قۇشتار بولعاندا دۇرىس شىعار. ءبىراق 11 جىل بويى وقىماعان بالانى، « تىم بولماسا، ءمۇعالىم بول»،- دەپ كوللەدجگە سۇيرەلەگەنشە زامان تالابىنا ساي ماماندىقتارعا الىپ كەلگەن ءجون.  قازاقستانعا  ەندى كەلگەن ءبىر كوسمەتيكالىق ءونىمنىڭ تۇساۋكەسەرىنە بارا قالساڭ، ول جەردەن  ءقازاقتىلدى ارىپتەسىمدى تابا الماي ابىگەر بولامىن. ارىپتەستى قويشى، وسى بيزنەستە جۇرگەندەردىڭ اراسىندا ءجۇرىپ تۋعان ءتىلىڭدى ساعىنىپ، سىرتقا اتىپ شىعاسىڭ.. ماسەلەن بلوگەرمىز دەيتىندەر دە الەمدىك تاجىريبە  كورسەتكەندەي بەلگىلى ءبىر سالانىڭ ساۋساعىن ۇستاۋى ءتيىس. ينتەرنەت الەمىندە  ءقازاقتىلدى بيۋتي رەداكتورلار مەن بلوگەرلەر  ءالى قالىپتاسپاعان. سول دا كاسىپ بولىپ پا؟ بەتكە انانى جاعىپ، مىنانى سيپاعان ءۇشىن جازعىش بولماي-اق قويدىم دەپ ويلاۋىمىز مۇمكىن. ويلاي سالۋ وپ-وڭاي عوي. ال سول قادامعا بارۋ ارقىلى ءسىز ەكى كۇردەلى ماسەلەنى شەشە الاسىز. ەڭ الدىمەن بيۋتي بيزنەستەگى قازاق ءتىلىنىڭ تىنىسى اشىلادى.  ەكىنشىدەن جەڭىل ءارى پاڭ كاسىپتىڭ يەسى اتاناسىز. ال ءبىز ءبىر سالاعا جابىسىپ الىپ، ودان سوڭ ءبىرىمىزدى-بىرىمىز كورە الماي، اياعىمىزدان شالىپ الەكپىز.

اينۇر تولەۋ