وتكەن جۇما كۇنى گەرمانيانىڭ ميۋنحەن قالاسىنداعى ۇيىندە جۇرەگى ۇستاپ اۋرۋحاناعا جاتكىزىلعان قاجى ءشارىپ نايمان اقساقال بۇگىن قاسيەتى ورازا ايىنىڭ قادىر ءتۇنىنىڭ كۇندىزىندە گەرمانيا ۋاقتى بويىنشا ساعات 18.45-تە ءوتتى. تەك تۇركيا مەن ەۋروپا ەمەس، اتامەكەن قازاقستان جانە باسقا بۇكىل دۇنيەجۇزىندەگى قازاقتارىنىڭ ارداقتىسى بولا بىلگەن ءشارىپ نايمان اقساقالدىڭ دۇنيەدەن قايتۋىمەن تۇركيا جانە ەۋروپا قازاقتارى ورنى تولماس قازاعا ۇشىرادى. مارقۇم اتامىزعا اللادان يمان تىلەيمىز. بارعان جەرى ۇجماق بولعاي! بالا-شاعاسىنا جاقىن تۋىستارىنا كوڭىل ايتىپ قايعىلارىنا ورتاقتاسامىز. اقساقالدىڭ سۇيەگىنىن ءبىر ەكى كۇن ىشىندە تۇركياعا اكەلىپ ىستامبۇل گۇنەشلى قازاقكەنت اۋلىنداعى وتباسىلىق بەيىتكە جەرلەنەتىنى حابارلاندى.

اتالارىشىعىسقازاقستانقاتونقاراعايدانشىققانجانەابدىكارىمبولىستىڭۇرپاعىبولعانءشارىپنايمان 1932 جىلىالتايداتۋىلعان. 1938 جىلى التايدان اۋا كوشىپ تيبەت-گيمالايا اسقان ەلىسحان باتىر باستاعان كوشپەن 1940 جىلى ءۇندىستانعا بارعان ءشارىپ قاجى بۇل جەردە 1967 جىلعا دەيىن تۇراقتاعان. كەيىن ىستامبۇلعا كەلگەن، ودان گەرمانيانىڭ ميۋنحەن قالاسىنا وتكەن ءشارىپ نايمان اقساقال باسىنان كوپتەگەن تاۋقىمەتتەردى وتكىزگەن. ميۋنحەن قالاسىندا قوناقجايلىلىعىمەن تانىلعان جانە قازاق دەسە ىشكەن اسىن جەرگە قوياتىن اقساقال قالاعا قىدىرىپ كەلگەن قوناقتارعا كەڭ داستارقانىنان ءدام تاتقىزباي جىبەرمەيتىن.

قازاقستان 1991 جىلى تاۋەلسىزدىك العاندا جۇرەگى جارىلا قۋانعان ءشارىپ نايمان دۇنيەجۇزى قازاقتارىنىڭ 1992 جىلعى تۇڭعىش قۇرىلتايعا، ودان كەيىنگى 2000 جىلعى تۇركىستان قۇرىلتايىنا جانە 2005 جىلعى استانا قۇرىلتايىنا قاتىسقان ەدى.

1994 جىلى گەرمانيانىڭ ميۋنحەن قالاسىندا وتكەن ەۋروپا قازاقتارىنىڭ تۇڭعىش قۇرىلتايىنا دەمەۋشى بولعان اقساقال ودان كەيىن ۇيىمداستىرىلعان ەۋروپا قازاقتارىنىڭ كىشى قۇرىلتايلارىنا دا ۇزبەي قاتىسىپ تۇردى.

ءقازىر اقساقالدىڭ بالالارى، نەمەرە-شوبەرەلەرى گەرمانيا مەن تۇركيادا ءومىر سۇرۋدە.

كەشە جانە بۇگىن سۇلق جاتقان مارقۇمعا بۇكىل ميۋنحەن قالاسىنداعى قازاقتار نەمىس دارىگەرلەرىنىڭ ۇلىقسات ەتۋىمەن بارىپ قوشتاسىپ شىققان. جاقىن تۋىستارى سوڭعى ءدامىن بەرگەنشە باسىندا تۇرىپ قۇران وقىعان جانە يمان ايتقان.

“وتاندى ءسۇيۋ يماندان” دەپ وتىراتىن ءشارىپ نايمان اقساقال ەلىنىڭ جانە حالقىنىڭ قالاۋلىسى بولا ءبىلدى. حالقىنا جاققان ادامنىڭ قۇدايعا دا جاعاتىنى حاق. اتامىزدىڭ توپىراعى تورقا، بارعان جەرى ۇجماق بولعاي!

ءابدىۋاقاپ قارا 

ىستامبۇل