بەلگىلى ءانشى ءالي وقاپوۆ «اق جەلكەن» جۋرنالىنا بەرگەن سۇحباتىندا بولاشاق جارى قانداي بولۋى كەرەك ەكەندىگىن جانە ءوز باسىنان وتكەن قىزىقتى جاعدايلارىمەن ءبولىستى.
ءالي بەتىن قايتارعان قىزدار تۋرالى ساۋالعا: “ەڭ ءبىرىنشى مەنى قايتارعان قىز – مەنىڭ العاشقى ماحابباتىم. ءبىرىنشى سىنىپتا سىنىپتاسىما عاشىق بولدىم. ەسىمى – ەڭلىك. ول سكريپكاشى ەدى، ءبىز مۋزىكا مەكتەبىندە وقىدىق قوي. سول قىز جەتىنشى سىنىپقا دەيىن بىرگە وقىعاندا، بىردە-بىر رەت ماعان كوز قيىعىن سالعان دا جوق. سوعان قاراپ، «ە-ە، مەن وعان ۇنامايدى ەكەنمىن» دەپ ءتۇيدىم دە قويدىم”، – دەپ جاۋاپ بەردى.
ءانشىنىڭ بەتىن قايتارعاندار بەرتىندە دە بولىپتى.
“بولدى. وسىدان ءۇش- ءتورت جىل بۇرىن… مەنىڭشە، ول ءار جىگىتتىڭ باسىندا كەزدەسەدى. سەن قانشالىقتى تانىمال، اقىلدى بولساڭ دا، ۇناتپايتىن ادام ۇناتپايدى”، – دەپ اعىنان جارىلدى ءانشى.
جاس ونەرپاز باسىلىمعا بولاشاق جارىنا دەگەن قويىلاتىن تالاپتارى تۋرالى دا جاسىرمادى.
“ەڭ ءبىرىنشى قازاقى تاربيە دەدىم بە، سوسىن اقىل. ارتىسپەن تۇرۋ ءتىپتى وڭاي ەمەس! ءانشى عانا ەمەس، مەن سازگەرمىن دە. سوندىقتان ماعان ءجيى وڭاشا قالۋ قاجەت بولادى. جاڭا ءان تۋۋى ءۇشىن. ونداي جاعدايدا جارىم مەنى ءتۇسىنىپ، قولداماسا، جاعداي قيىن. ال اقىلسىز قىز مەنىڭ مۇنىما كونبەك تۇگىلى، تۇسىنبەيدى دە. وتباسىندا كيكىلجىڭ سودان تۋادى”، – دەپ قايىردى ءانشى.
ءالي بويجەتكەندەرگە كەلگەندە تانىسۋعا قورقاقتاپ قالاتىنىن، قوبالجىپ كەتەتىنىن دە جاسىرمادى. سوندىقتان، ءانشىنىڭ ايتۋىنشا، قىزدار العاشقى تانىسۋ قادامىن وزدەرى جاساسا، قارسى بولمايتىن كورىنەدى.
ال ءاليدىڭ اناسى، قازاقستان حالىق ءارتىسى روزا رىمبايەۆانىڭ بولاشاق كەلىنگە قوياتىن تالاپتارى بار ما دەگەن ساۋالعا ءانشى:
“جوق، ەشقاشان ايتقان ەمەس. جالپى، بالا كۇنىمنەن باستاپ ۇلكەن جاۋاپكەرشىلىكتى قاجەت ەتەتىن تاڭداۋ جاساردا انام ماعان ەركىندىك بەرىپ كەلدى. مۋزىكانى ءوزىم تاڭدادىم. انشىلىكتى دە. مەكتەپ بىتىرگەن سوڭ، اقش-قا وقۋعا دا ءتۇستىم. ەلىمدى قاتتى ساعىنىپ، شەتەلدە جىراقتا ءجۇرۋ ماعان ۇناماي، قايتا ورالدىم. وندا دا ماعان ەشتەڭە دەگەن جوق. سوندىقتان دا ءبىر كۇنى ۇيگە قالىڭدىعىمدى جەتەكتەپ بارىپ، «وسى قىزعا ۇيلەنەمىن» دەپ جاريا ەتسەم، قارسى بولمايدى دەپ ويلايمىن”، – دەپ جاۋاپ بەردى.
