قازاقستاندىق ءانشى لۋينا بەلگىلى « Rising Star Turkey» شوۋىنا قاتىسىپ جاتىر. بۇل تۋرالى "قامشى" پورتالى Tengrinews.kz-كە سىلتەمە جاساي وتىرىپ حابارلايدى.
«Rising Star» شوۋى قىركۇيەكتەن باستاپ تۋرىكتىڭ TV8 تەلەارناسىنان كورسەتىلىپ جاتىر. ۇيىمداستىرۋشىلار لۋينانى الدىن الا وتەتىن كاستينگكە شاقىرعان. قازاقستاندىق ءانشى مىڭداعان قاتىسۋشىنىڭ ىشىنەن سۋىرىلىپ العا شىقتى.
ايتا كەتەيىك، Rising Star - جاڭا فورماتتا وتكىزىلەتىن ينتەراكتيۆ شوۋى. ءانشى ساحناعا شىققان كەزدە الدىندا قابىرعا تۇرادى، ول قازىلار القاسىن كورە المايدى. قاتىسۋشى 70 پايىزدان جوعارى داۋىس جيناعاندا عانا قابىرعا كوتەرىلەدى.
ءانشى لۋينا Halo Beyonce كومپوزيسياسىن ورىنداپ، 86 پايىز داۋىس جينادى. ءانشىنىڭ قويىلىمى قۇرامىنا تانىمال تۇلعا مۋستافا ساندال، ءانشى دەمەت اكالىن، ويكۋ سەرتەر جانە فۋات كىرەتىن قازىلار القاسىنا ۇنادى جانە تورتەۋى دە "ءيا" دەدى. ەندى ەكىنشى اينالىمدا لۋينا باسقا قاتىسۋشىلارمەن كەزدەسىپ، جوبانىڭ جارتىلاي فينالىنا ءوتۋ ءۇشىن ونەر كورسەتەدى.
"مۇنداي ۇلكەن شاراعا قاتىسۋ جاۋاپكەرشىلىكتى تالاپ ەتەدى جانە بۇل مەن ءۇشىن باقىت. ازداپ قوبالجىپ تۇرعانىم راس، دەگەنمەن ميلليونداعان تەلەكورەرمەننىڭ الدىندا تۇرىپ ءان ايتۋ ۇلكەن تاجىريبە"، - دەدى لۋينا.
