ەلىمىزدەگى كاسىپكەرلەر تەڭگەنىڭ قۇنسىزدانۋىنان شىعىنعا باتىپ جاتىر. بۇل تۋرالى «قامشى» پورتالى كتك ارناسىنا سىلتەمە جاساي وتىرىپ حابارلايدى. قىزمەت كورسەتۋ سالاسىنداعى كومپانيالاردىڭ شىعىنى شاش ەتەكتەن. سىرتتاعى الىس-بەرىستە شەتەل اقشاسىمەن ەسەپ ايىرىساتىن ولار ەل ىشىندە بۇرىنعى باعانى ۇستاپ تۇرا المايمىز دەپ شاعىمدانۋدا.
نەگىزىنەن جاپا شەگى جاتقاندارعا ءىرى ساۋدا ورىندارىندا جەردى جالعا الاتىندار مەن قوعامدىق تاماقتاندىرۋ ورىندارى، ياعني كافە-مەيرامحانالار، سونداي-اق، دۇكەن يەلەرىن جاتقىزۋعا بولادى. سەبەبى جەردى جالعا العانى ءۇشىن ولار دوللاردىڭ قازىرگى باعامىمەن تولەيدى. ونىڭ ۇستىنە شەتەلدەن ءتۇرلى تەحنيكالاردى سول ەلدىڭ ۆاليۋتاسىمەن ساتىپ الادى.
ءبىراق ءوز ەلىمىزدە تەك تەڭگەمەن جۇمىس ىستەۋگە ءماجبۇر. ءارى بۇرىنعى باعانى ۇستاپ تۇرۋ كەرەك. بۇل، البەتتە، پايدا ەمەس، قۇر شىعىن اكەلەدى.
سوندىقتان، كاسىپكەرلەر وتاندىق ەكونوميكانى دوللارسىزداندىرۋ ءىسىن قولعا الىپ، ونى زاڭ جۇزىندە بەكىتۋدى سۇراپ وتىر. ايتپەسە، كوپ ۇزاماي ەلىمىزدە قىزمەت كورسەتۋ سالاسى مۇلدەم توقىراۋى مۇمكىن دەيدى.
