بۇگىن الماتىداعى جامبىل اتىنداعى جاسوسپىرىمدەر كىتاپحاناسىندا اقىن، سازگەر جانبولات قۇرماننىڭ "قوس كۇرەڭ" اتتى كىتابىنىڭ تۇساۋكەسەر ءراسىمى ءوتتى. 

"قوس كۇرەڭ" كىتابىندا اقىننىڭ ءار جىلدارى جازعان ولەڭدەرى توپتاستىرىلعان. سونداي-اق اقىننىڭ بالا كەزىنەن باستاپ، بوزبالا شاعى دا، وقۋ وقىپ، قىزمەتكە ورنالاسقان كەزەڭدەرى دە كىتاپتا سىر شەرتەدى. اتامەكەندى اڭساعان قانداستار تاعدىرى دا نازاردان تىس قالماعان.

تۇساۋكەسەر ءراسىمىن جامبىل اتىنداعى جاسوسپىرىمدەر كىتاپحاناسىنىڭ مەڭگەرۋشىسى عازيزا قۇدايبەرگەن اشىپ، قازىرگى قازاق جاستارىنىڭ كىتاپ وقۋعا دەگەن قىزىعۋشىلىعى ارتىپ كەلە جاتقانىن ايتتى. 

– ءقازىر جاستار اراسىندا جاقسى ءۇردىس قالىپتاسىپ كەلەدى. كىتاپ وقۋ، كىتاپ ساتىپ الۋ ترەندكە اينالىپ كەلەدى. بۇگىن كىتاپحانامىزداعى كىتاپتاردىڭ قاتارى كوبەيدى. "قوس كۇرەڭ" كىتابىنىڭ وقىرمانى كوپ بولسىن، – دەپ ىزگى تىلەگىن جەتكىزدى عازيزا قۇدايبەرگەن.

اقىن داۋلەتبەك بايتۇرسىن ۇلى مەن ادەبيەتتانۋشى، اقىن بەكقوجا جىلقىبەك ۇلى كىتاپتىڭ تۇساۋىن كەسىپ، كەش يەسى تۋرالى ەستەلىكتەرىن ءبولىستى. 

– جانبولات قۇرماننىڭ جاراتىلىسى – اقىن. جانبولات قۇرمانمەن 30 جىلدان استام ۋاقىت تانىسپىن. ول 40 جىلدان بەرى ولەڭ جازىپ كەلەدى. ولەڭدەرى "ىلە" جانە "شىڭجاڭ" گازەتتەرىنە جاريالانىپ وتىردى. سودان بۇگىنگە دەيىن ولەڭ جازۋدى تاستامادى. الايدا قازاقستانعا كەلگەن سوڭ ەكونوميكا سالاسىندا ءبىلىم الدى. ءبىلىمىن جەتىلدىردى. كەيىنىرەك ىسكەرلىكپەن، كاسىپكەرلىكپەن اينالىستى. وسى ۋاقىتقا دەيىن شىعارمالارى مەن سۇبەلى ويلارىن facebook الەۋمەتتىك جەلىسىنە جاريالاپ كەلدى. ەندى، مىنە، 60 جاسقا تولعان كەزدە "قوس كۇرەڭ" كىتابىن جارىققا شىعارىپ وتىر، – دەدى داۋلەتبەك بايتۇرسىن ۇلى. 

ال بەكقوجا جىلقىبەك ۇلى اقىننىڭ ولەڭدەرىنە تالداۋ جاساپ، جوعارى باعاسىن بەردى. 

– جانبولات ولەڭدەرىن باسىم بولىگى جالاڭ ۇيقاس پەن ىرعاقتان عانا تۇرمايدى. ول ايتار وي-سەزىم تاجىريبەسىن سۋرەتكەرلىك پەن كوركەم وبرازدىڭ قالتارىسىنا جاسىرىپ، وقىرماننىڭ قايتا جاسامپازدىق جاراتۋىنا وراي قالدىرادى، – دەدى ادەبيەتتانۋشى.

كەش سوڭىندا اقىننىڭ سوزىنە جازىلعان اندەر شىرقالىپ، ولەڭى وقىلدى.