مىنا مەن كۇندەلىكتى قىز­مە­ءتىمدى اتقارىپ، ەرتەڭگى جوس­پا­رىمدى تۇجىرىمداپ دەمالىپ وتىرعاندا ءوزىمدى جايسىزداۋ سە­ءزىندىم. دەگ­بىرسىزدەنگەندەي بول­عان سوڭ، جۇ­بايىم ەش الاڭسىز جەدەل جاردەم شاقىرا سالدى. مەيىربيكە ءتول مىندەتىنە ساي قان قىسىمىن تەكسەرىپ، بىرەر ساۋالىنا قاناعاتتانارلىق جاۋاپ العاننان كەيىن: «جاقپايتىن ءبىر تاعامنان ۋلانىپ قالعان شىعارسىز، قالاي-قالاي ەمەس، جوعارى ءبىلىمدى ءدارى­گەرگە كورىنگەنىڭىز ءجون بولار. كەلىسسەڭىز بىرگە جۇرىڭىزدەر» دەدى. سودان تالدىقورعانداعى جان ساقتاۋ بولىمىندە 11 كۇن-تۇن جاتتىم. جاعداي ناشار. ول كۇندەردى دوسىڭ تۇگىلى دۇشپانىڭنىڭ باسىنا بەرمەسىن، تىزبەلەپ ايتۋدىڭ ءوزى ارتىق.

سودان قۇدايدىڭ قۇدىرەتىمەن جەكسەنبى كۇنى بەسىن ۋاقىتىندا بۇرىن ەش جەردەن كورمەگەن ءۇش دارىگەر كىرىپ كەلىپ، ءارقايسىسى ءوز سالاسى بويىنشا تەكسەرىپ، باي­سالدىلىقتان تايماي، سەنىممەن ۇشاققا مىنگىزىپ، الماتىداعى «ا.ن.سىزعانوۆ اتىنداعى حيرۋرگيا ۇلتتىق عىلىمي ورتالىعى» اق ەمحاناسىنا جەتكىزدى. جاڭا ورتانىڭ اسەرى مە، الدە مەديسينا قىزمەتكەرلەرىنىڭ ءىلتيپاتى ىقپال ەتتى مە، قۇددى سونى سوقپاقپەن جا­ڭا الەمگە ەنگەندەي سەزىندىم. قالاي ەكەنى، ايتەۋىر، ءبىر شيپا جانىما بولاتىنى بىلىنگەن دە ءتارىزدى. حيرۋرگيا ۇلتتىق عىلىمي ورتالىعىنىڭ رەانيماتولوگ-انەس­تەزيولوگى سالتانات رات قىزى اپ-ساتتە ديوگنوزدى ءدال قويىپ بە­ءرى­سىمەن، ىلەزدە باس دارىگەردىڭ دياگ­نوستيكا جونىندەگى ورىنباسارى، فۋنكسيونالدى دياگنوستيكا جانە ەندوسكوپيا ءبولىمىنىڭ مەڭگەرۋشىسى، جوعارى ساناتتى دارىگەر، ەرلان ابدىرەشوۆكە جەت­كىزدى. دەرەۋ شەت­­ەلدىك قون­دىرعىنىڭ تۇبىنە جاي­لاس­تىرا وتىرعىزىپ، جەلىم تۇتىق­شانى تاناۋ قۋىسىنان كىرگىزە تۇ­رىپ، بىردەن قاي جەرگە ساقينا قويۋ كەرەكتىگىن انىقتاپ ءارى سول زاماتىندا ورنالاس­تىرىپ جانىمدى راحات ءبىر كۇيگە ەنگىزدى. ءسويتىپ، اتال­عان ورتالىقتىڭ اق حالاتتى اب­زال جاندارى ىزەتتىلىگى مەن مەيى­رىمىنە بولەپ تە، ەمدەپ تە اپتا بويى اعزادان اققان قىزىل قاندى ساناۋلى ساعاتتاردا توقتاتتى. مۇنى كاسىبي بىلىكتىلىكتىڭ ارتۋى ءھام زاماناۋي مەديسينالىق قوندىرعىلاردى جەتىك مەڭگەرىپ، پايدالانا ءبىلۋ دەمەسكە ءاددىڭىز قالمايدى. سۇيسىنەسىز. ريزا بولىپ ىشكى ويىڭىزدى اقتارۋعا كومپيۋتەردىڭ الدىنا وتىرعاندا رەت-رەتىمەن ءتىزىلىپ بەرگەندە ءتانتى بولاسىز. العاۋسىز اق تىلەك اعىتىلا بەرەدى.

البەتتە، «بۇلاق باسىنان تۇ­نادى» دەگەن دانالىقتى ۇستا­نا­سىز. سەبەبى، تاياۋ كۇندەرى «ا.ن.سىز­عانوۆ اتىنداعى حيرۋرگيا ۇلت­تىق عىلىمي ورتالىعى» اق باس ديرەكتورى جەتكەرگەن ارزىقۇلوۆتىڭ قابىلداۋىنا ارنايى باردىم. كەزەگىم كەلگەندە كىردىم. باس دي­رەكتوردىڭ تىك تۇرىپ، قول الىسىپ امانداسۋىنىڭ ءوزى ءىشىڭدى جىلىتىپ، كىسىلىك كەلبەتىن اشىپ تۇر. ناعىز ءدا­ءرى­گەرگە ءتان سىمباتتىلىق. قارا­پايىم جاندارعا قاشاندا قۇرمەت كورسەتە بىلەتىندىگىمەن ادامي قۇندىلىعىن انىق اڭعارتىپ تۇر. يمانجۇزدىلىگى، جالپى كابينەت كەڭىستىگىنىڭ جايماشۋاقتىعى بولار، نەبارى ءۇش مينۋتتا جەت­كەرگەن انەس ۇلى باسقارىپ وتىر­عان دارىگەرلەرگە دەگەن شەكسىز العىسىمدى، وسى ورتالىققا قا­شان، كىمدەر ارقىلى قالاي ءتۇسىپ، ەمدەلىپ شىققانىمدى جانە ماعان ءومىر سىيلاي بىلگەن جاندار الدىنداعى پارىزىمدى باس باسىلىم ارقىلى ەلگە جەتكىزەتىنىمدى ايتىپ بەردىم. ءار سوزىمە زەيىن قويا مۇقيات تىڭداپ، رەسپۋبليكالىق «ەگەمەن قازاقستان» گازەتىن قۇر­مەتتەي بىلەتىندىگىن اشىق ايتىپ، مۇمكىندىگىنشە قاراپايىم حالىقتىڭ ءۇنىن، ەلمەن ەتەنە ارالاسۋعا بۇل ورتالىقتىڭ ابدەن بەيىمدەلگەنىن كورسەتۋ قاجەتتىگىن كوڭىلىمە تۇيدىرە ءبىلدى. ويتكەنى، «ا.ن.سىزعانوۆ اتىن­داعى حيرۋرگيا ۇلتتىق عىلىمي ور­­تالىعى» ەمحاناسىندا جانىنا شيپا تاۋىپ، العىستارىن اعىتقان ەلدىڭ اقجارما اق تىلەگىن دە، سارى التىنداي سارالى ءسوزىن دە ەت قۇ­لا­عىممەن ەستىدىم عوي. ەم­دەلىپ شىققان جانداردىڭ مەديسينا قىزمەتكەرلەرىنە ءتانتى بولا تۇرىپ، سوزدەرىمەن جەتكىزە الماعان العىسىن كوزدەرىمەن ۇعىندىرۋعا قارەكەت ەتىپ مەيىرىم شۋاعىن بارىنشا توككەندەرىن كوردىم عوي. ادامداردىڭ بۇل ورتالىق تۋرالى حان ءتاڭىرىنىڭ ساف اۋاسىنداي تازا دا تۇنىق ويىن وقۋ دا ءبىر عانيبەت ەكەن. وي تەرەڭىنە بويلاي بىلسەڭىز، سول زاماتتا ادامعا ءومىر سىيلاي ءبىلۋدىڭ ءوزى ءبىر باقىت ەكەنىن دە تۇيسىنەسىز. ادامعا ءومىر سىيلاۋ دەگەندە، ءدال وسى تۇستا رەسپۋبليكامىزعا كەڭىنەن تانىمال قوس تۇلعانىڭ ەسىمىن اتاپ ءوتۋدى ازاماتتىق پارىزىم دەپ سانايمىن. وسىناۋ جولداردىڭ اۆتورى دارمەنسىز كۇيگە تۇسكەن ساتتە قازاقستان رەسپۋبليكاسىنىڭ دەنساۋلىق ساقتاۋ جانە الەۋمەتتىك دا­مۋ ۆيسە-مينيسترى ساليدات قايىر­­بەكوۆا مەن رەسپۋبليكالىق «ەگەمەن قازاقستان» گازەتى اق پرە­زيدەنتى ساۋىتبەك ابدراحمانوۆ دەرەۋ قول ۇشىن بەرىپ، سەبەپشى بولعان ەدى. «اۋىرىپ تۇردىڭ – اۋناپ تۇردىڭ» دەگەن دانالىقتى دا ايتىپ كوڭىلىمدى قوش ەتكەن جانداردى قالاي قۇرمەتتەمەيىن. قۇرمەت تۇتا وتىرىپ، «ا.ن.سىزعانوۆ اتىن­داعى حيرۋرگيا ۇلتتىق عىلىمي ورتالىعىنا» سەنىم ارتۋلارى كاسىبي دە، ءومىر­لىك تە تاجىريبەنى تو­عىستىرا اقىل تارازىسىنان وتكىزە بىلە­ءتىن سۇڭعىلالىقتارى دەپ تە باعالايمىن.

قورىتا ايتقاندا، بۇل جولدار مەنىڭ جەكە باسىمنىڭ العىسى بولىپ اق قاعازعا ءتۇستى. سول العىس وي تۇنىعىنان تولقىپ ۇلكەن تۋىندىعا دا اينالۋى بەك مۇمكىن. ونى ۋاقىت اتتى تورەشى كورسەتەر.