اسكەردە جارالانعان سارباز ەربايان مۇحتار ەمدەلۋ ءۇشىن ىستانبۋلعا ۇشىپ كەتتى. بۇل تۋرالى ادۆوكات ينگا يمانباي ءوزىنىڭ فەيسبۋك پاراقشاسىندا حابارلادى.
"ەربايان ەمنىڭ ەكىنشى كەزەڭى – تولىققاندى رەابيليتاسيادان ءوتۋ ءۇشىن تاڭعى بەستە ستامبۋلعا ۇشىپ كەتتى. قاسىندا اناسى مەن اكەسى بار. بۇل ساپار ەربايان ءۇشىن شەشۋشى كەزەڭ. سول سەبەپتى بارلىعىمىز بىرگە بالامىزعا اق جول، ءساتتى ساپار تىلەيىك. سوڭعى ءبىر جىلدا ەربايان تەك اتا-اناسىنىڭ ەمەس، بۇكىل حالىقتىڭ ۇلىنا اينالدى. ونىڭ جاعدايى ەشكىمدى بەي-جاي قالدىرمادى. ءبىرىنشى كەزەڭدەگى وپەراسيا مەن ەم حالىقتىڭ قولداۋىمەن جاسالسا، بۇل جولى مەملەكەت تاراپىنان ۇلكەن كومەك كورسەتىلدى: پورتال ارقىلى ءۇش ايعا سوزىلاتىن قىمبات ءارى ماڭىزدى رەابيليتاسيالىق ەم تولىق قارجىلاندىرىلدى. ال ۇشۋدى ىشكى ىستەر جانە قورعانىس مينيسترلىكتەرى بىرلەسىپ ۇيىمداستىردى"، دەپ جازدى ينگا يمانباي.
ادۆوكات ەرباياننىڭ ىستانبۋلعا ۋشۋى ءۇشىن ىشكى ىستەر مينيسترلىگى مەن قورعانىس مينيسترلىگى كومەكتەسكەنىن ايتتى.
"وسى رەتتە ەرباياننىڭ اتا-اناسىنىڭ اتىنان دەنساۋلىق ساقتاۋ ءمينيسترى اقمارال ءالنازاروۆا حانىمعا، گەنەرال قايرات ۇمبەتوۆ مىرزاعا العىس بىلدىرەمىز. ەربايانعا قاتىستى «نە ىستەپ جاتىرسىز؟» دەپ ماعان ءجيى سۇراق قوياسىزدار. جاۋاپتى كوپ سوزبەن ەمەس، وسىنداي ناقتى ناتيجەلەرمەن بەرگىم كەلەدى. حالىقتىڭ نازارىن اۋدارتۋ، مەملەكەتتىك ورگانداردى ىسكە جۇمىلدىرۋ، وسىنداي ماڭىزدى ەمدى ۇيىمداستىرۋ – ءبىر كۇننىڭ شارۋاسى ەمەس. بۇل ۇزاق كەلىسسوزدەر مەن تاباندى ەڭبەكتىڭ جەمىسى. ايقايسىز، ءبىراق جۇيەلى جاسالعان جۇمىس"، دەيدى ينگا يمانباي.
ونىڭ سوزىنشە، الداعى ءۇش ايدا ەرباياننىڭ دەنساۋلىعى باقىلاۋدا بولادى.
