وسى جىلدىڭ مامىر ايىندا ەلباسى بەس ينستيتۋسيونالدىق رەفورمادان تۇراتىن «100-ناقتى قادام» ۇلت جوسپارىن جاريالاعانى بارىمىزگە ءمالىم. ۇلت جوسپارىنىڭ 27-قادامى بويىنشا مەملەكەت باسشىسى جەكە سوت ورىنداۋشىلار ينستيتۋتىن ودان ءارى دامىتۋدى تاپسىرعان.
جالپى العاندا ازاماتتىق-قۇقىقتىق داۋلار بويىنشا شەشىمدەردى ورىنداۋ بالاماسىز نەگىزدە جەكە ورىنداۋعا بەرىلۋى مەملەكەتتىك اپپاراتتىڭ جۇكتەمەسىن ءبىرشاما ازايتارى انىق. ەلىمىزدە جەكە سوت ورىنداۋشىلار ينستيتۋتىن ەنگىزۋ كەزىندەگى باستى ماقسات تا مەملەكەتتىك اپپاراتتىڭ جۇكتەمەسىن ازايتۋ جانە ازاماتتارعا تاڭداۋ قۇقىعىن بەرە وتىرىپ، سوت اكتىلەرىن ساپالى جانە ۋاقتىلى ورىنداتۋ بولعان بولاتىن.
بۇگىنگى تاڭدا ادىلەت مينيسترلىگىمەن 27-قادامدى ىسكە اسىرۋ ماقساتىندا جەكە سوت ورىنداۋشىلار ينستيتۋتىن دامىتۋ ارقىلى مەملەكەتتىك سوت ورىنداۋشىلارى قىزمەتىن بىرتىندەپ قىسقارتۋ جوسپارلانىپ، ءبىرقاتار ءىس-شارالار جۇزەگە اسىرىلۋدا.
ءبىرىنشى كەزەكتە قازاقستان رەسپۋبليكاسىنىڭ «اتقارۋ ءوندىرىسىن جەتىلدىرۋ جانە ۇيىمداستىرۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرتۋلەر مەن تولىقتىرۋلار ەنگىزۋ تۋرالى» زاڭىنىڭ جوباسى ازىرلەنىپ، پارلامەنتتە قارالۋدا. زاڭ جوباسى اتقارۋشىلىق ءىس جۇرگىزۋ سالاسىن رەتتەيتىن زاڭنامانى جەتىلدىرۋ، سوت ورىنداۋشىلارىنا بورىشكەرلەرگە اسەر ەتۋدىڭ ناقتى تەتىكتەرىن بەرۋ، اتقارۋ سالاسىنداعى جۇمىستىڭ تيىمدىلىگىن ارتتىرۋعا باعىتتالعان.
جوباعا سايكەس مەملەكەتتىك سوت ورىنداۋشىلارىنىڭ وندىرىسىندە مەملەكەتتەن نەمەسە داۋىس بەرەتىن اكسيالارىنىڭ (جارعىلىق كاپيتالىنداعى قاتىسۋ ۇلەستەرىنىڭ) ەلۋ جانە ودان دا كوپ پايىزى مەملەكەتكە جانە ونىمەن ۇلەستەس زاڭدى تۇلعالارعا تيەسىلى زاڭدى تۇلعالاردان، تابيعي مونوپوليا سۋبەكتىلەرىنەن ءوندىرىپ الۋ، مەملەكەت ءوندىرىپ الۋشى بولىپ تابىلاتىن ىستەر: پاتەردەن شىعارۋ، ورنالاستىرۋ، بۇزۋ، جەر ۋچاسكەسىن الۋ، ءوندىرۋ سوماسى 1000 اەك-تەن اساتىن وندىرۋلەر جانە مۇلىكتى تاركىلەۋ بويىنشا اتقارۋشىلىق قۇجاتتار قالادى دەپ كۇتىلۋدە.
بۇدان بولەك، زاڭ جوباسى بويىنشا جەكە سوت ورىنداۋشىلارى جۇمىسىنىڭ تيىمدىلىگىن ارتتىرۋ ماقساتىندا ولاردىڭ سوتپەن سانكسيالاناتىن ارەكەتتەرىن ازايتۋ، كومەكشىلەرىنىڭ وكىلەتتىگىن كەڭەيتۋ ماسەلەلەرى كوزدەلگەن. قولدانىستاعى زاڭنامامەن جەكە سوت ورىنداۋشىلارىنا جەكە سوت ورىنداۋشىسى قىزمەتىمەن اينالىسۋعا ليسەنزياسى بار ادام عانا كومەكشى بولا السا، جاڭا زاڭ جوباسىندا بۇل مىندەتتىلىك الىنىپ تاستالعان.
سونىمەن قاتار، الەۋمەتتىك ماڭىزى بار قۇجاتتاردى (اليمەنت، ەڭبەكاقى) ورىنداۋ قىزمەتىن مەملەكەتتىك بيۋدجەتتەن قارجىلاندىرۋ بەلگىلەنگەن. ياعني، اليمەنت تولەمدەرى بويىنشا بورىشكەرگە ىزدەۋ جاريالانۋىنا بايلانىستى ءۇش ايدان استام قارىزى بولسا نە بورىشكەردىڭ تۇراقتى تابىسى، جۇمىس ورنى، مۇلكى بولماۋ، ال ەڭبەكاقىنى ءوندىرۋ بويىنشا بورىشكەردىڭ ءوندىرۋ جۇرگىزەتىن قاراجاتى نە مۇلكى بولماۋ كەزىندە جەكە سوت ورىنداۋشىعا بيۋدجەتتەن اقى تولەۋ قاراستىرىلعان.
زاڭ جوباسىمەن قامتىلعان وزگەرىستەر سوت اكتىلەرىنىڭ ۋاقتىلى ءارى ناتيجەلى ورىندالۋىنا وڭ اسەرىن تيگىزەرى ءسوزسىز.
ۇلت جوسپارىنىڭ 27-قادامى اياسىندا ادىلەت مينيسترلىگىمەن مەملەكەتتىك سوت ورىنداۋشىلارىن ءۇش ەسەگە قىسقارتۋ جوسپارلانعان.
بۇگىندە ماڭعىستاۋ وبلىسى اتقارۋ وكرۋگىندە 17، ونىڭ ىشىندە: اقتاۋ قالاسى بويىنشا – 14، جاناوزەن قالاسى بويىنشا – 1، مۇنايلى اۋدانى بويىنشا – 1 جانە ماڭعىستاۋ اۋدانى بويىنشا 1 جەكە سوت ورىنداۋشىلارى قىزمەتتەرىن جۇزەگە اسىرۋدا (جەكە سوت ورىنداۋشىلارى بويىنشا تولىققاندى اقپارات دەپارتامەنت سايتىندا www.mng.adilet.gov.kz ورنالاسقان).
الداعى كۇتىلىپ وتىرعان رەفورمالار اياسىندا وبلىستاعى جەكە سوت ورىنداۋشىلار سانىن 54-كە دەيىن كوبەيتىپ، بارلىق قالا، اۋدان ورتالىقتارىن قامتۋ كوزدەلۋدە. ءقازىردىڭ وزىندە دەپارتامەنتتىڭ اۋماقتىق بولىمدەرىندە قىزمەت ەتەتىن سوت ورىنداۋشىلارىنىڭ باسىم بولىگىنىڭ جەكە سوت ورىنداۋشىسى قىزمەتىمەن اينالىساتىن ليسەنزيالارى قولىندا. سونداي-اق، وبلىستىڭ جەكە سوت ورىنداۋشىلارىنان 15 زاڭگەر تاعىلىمدامادان وتۋدە.
جەكە سوت ورىنداۋشىسى قىزمەتىمەن اينالىسۋ ءۇشىن زاڭنامامەن بەلگىلەنگەن تالاپتارعا كەلسەك، جيىرما بەس جاسقا تولعان، جوعارى زاڭگەرلىك ءبىلىمى بار، جەكە سوت ورىنداۋشىسى ليسەنزياسىن العان جانە رەسپۋبليكالىق پالاتانىڭ مۇشەسى بولىپ تابىلاتىن قازاقستان رەسپۋبليكاسىنىڭ ازاماتى جەكە سوت ورىنداۋشىسى بولا الادى.
زاڭ جوباسىندا جەكە سوت ورىنداۋشىسى ليسەنزياسىن الۋ باعىتىندا دا ءبىرقاتار جەڭىلدىكتەر قامتىلعان. بۇرىن جەكە سوت ورىنداۋشىسى ليسەنزياسىن تاعىلىمدامادان وتپەي جانە بىلىكتىلىك ەمتيحانىن تاپسىرماي الۋعا قۇقىق قورعاۋ ورگاندارىنىڭ قىزمەتكەرلەرىنە كەمىندە 10 جىل جۇمىس ءوتىلى كەرەك بولسا، جاڭا زاڭ بويىنشا 5 جىل جۇمىس ءوتىلى جەتكىلىكتى.
وسى ورايدا، جەكە ورىنداۋ سالاسىنداعى كوزدەلگەن پەرسپەكتيۆالاردى ەسكەرە وتىرىپ، اتالعان سالادا قىزمەت ەتكىسى كەلەتىن جوعارى زاڭگەرلىك ءبىلىمى بار ازاماتتاردى تاعىلىمدامادان وتۋگە شاقىرامىز. تولىققاندى اقپاراتتى ماڭعىستاۋ وبلىسى ادىلەت دەپارتامەنتىنىڭ جەكە سوت ورىنداۋشىلار قىزمەتىن ۇيىمداستىرۋ ءبولىمى ارقىلى الۋعا بولاتىندىعى حابارلانادى: اقتاۋ قالاسى، 3 ب شاعىن اۋدان، 16-عيمارات، 311-كاب، بايلانىس تەلەفونى 30-20-14.
ارينە، كۇتىلەتىن رەفورمالار ۋاقىت ەنشىسىندە. قازىرگى تاڭداعى باستى ماسەلە جەكە سوت ورىنداۋشىلار ينستيتۋتىنىڭ ەنگىزىلگەنىنە ءبىرشاما ۋاقىت وتكەنىنە قاراماستان، ازاماتتارىمىزدىڭ باسىم بولىگى ولاردىڭ قىزمەتىنە جۇگىنبەي وتىرعاندىعى. وسى جەردە ازاماتتارىمىز جەكە سوت ورىنداۋشىلارىنىڭ قىزمەتىنە تولەنەتىن اقىنىڭ ءوتىنىش بەرۋشىدەن ەمەس، بورىشكەردىڭ ەسەبىنەن جۇرگىزىلەتىندىگىن تۇسىنسە دەيمىز.
جەكە سوت ورىنداۋشىلارىنىڭ تابىس كوزدەرى وندىرىلگەن سومانىڭ بەلگىلى ءبىر بولىگىنەن قۇرالاتىندىقتان، اتقارۋ قۇجاتىنىڭ تەز ءارى ناتيجەلى ورىندالۋىن كوزدەيدى. بۇل ءوز كەزەگىندە جۇمىستىڭ وڭ ناتيجەسى مەن جەدەلدەتۋىنە اكەلەدى.
وسى ورايدا جانە الداعى رەفورمالاردى ەسكەرە وتىرىپ، ازاماتتار مەن زاڭدى تۇلعا وكىلدەرىن ءوز قارىزدارىن ءوندىرىپ الۋمەن قاتار قاراجاتتارى مەن ۋاقىتتارىن دا ۇنەمدەگىلەرى كەلسە، جەكە سوت ورىنداۋشىلارىنا جۇگىنۋگە كەڭەس بەرەمىز.
باقتىگۇل اتاعازييەۆا،
ماڭعىستاۋ وبلىسى
ادىلەت دەپارتامەنتىنىڭ باسشىسى.

دەرەككوز. ەگەمەن قازاقستان