كەشە مەملەكەتتىك حاتشى گۇلشارا ءابدىقالىقوۆانىڭ تورايىمدىعىمەن قازاقستان رەسپۋبليكاسىنىڭ پرەزيدەنتى جانىنداعى سىبايلاس جەمقورلىققا قارسى كۇرەس ماسەلەلەرى جونىندەگى كوميسسيانىڭ وتىرىسى ءوتتى.
وتىرىستا ەكونوميكالىق ىنتىماقتاستىق جانە دامۋ ۇيىمىنىڭ (ەىدۇ) سىبايلاس جەمقورلىققا قارسى كۇرەس ءجونىندەگى ءىس-قيمىلىنىڭ ىستامبۇل جوسپارى ۇسىنىمدارىن ورىنداۋ، سونداي-اق، مەملەكەتتىك ساتىپ الۋ راسىمدەرىن وتكىزۋ كەزىندە سىبايلاس جەمقورلىقتىڭ الدىن الۋ جونىندە مەملەكەتتىك ورگانداردىڭ قولعا العان شارالارى تالقىلاندى.
وتىرىس بارىسىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى ا.شپەكبايەۆتىڭ، قارجى ۆيسە-مينيسترى ر.بەكەتايەۆتىڭ، «اتامەكەن» ۇلتتىق كاسىپكەرلەر پالاتاسى ءتوراعاسىنىڭ ورىنباسارى ر.ءجۇرسىنوۆتىڭ ەسەپتەرى تىڭدالدى.
گ.ءابدىقالىقوۆا ءوز سوزىندە سىبايلاس جەمقورلىققا قارسى تەتىكتەردىڭ تيىمدىلىگى قازاقستان پرەزيدەنتى ۇسىنعان، ەلىمىزدى جان-جاقتى جاڭعىرتۋعا باعىتتالعان ۇلت جوسپارىن تابىستى ىسكە اسىرۋدىڭ بىردەن-بىر شارتى بولىپ تابىلاتىنىن اتاپ ءوتتى.
سىبايلاس جەمقورلىققا قارسى ناتيجەلى ءىس-قيمىل جاساۋ بارىسىندا جەمقورلىققا قارسى زاڭنامانى حالىقارالىق تالاپتاردى ەسكەرە وتىرىپ جەتىلدىرۋ ءىسىنىڭ ەرەكشە ماڭىزى بار.
قازاقستان رەسپۋبليكاسى سىبايلاس جەمقورلىققا قارسى حالىقارالىق كونۆەنسيالارعا قوسىلۋ، سونداي-اق، ىستامبۇل ءىس-قيمىلدار جوسپارىنىڭ ۇسىنىمدارىن ورىنداۋ ءجونىندەگى جۇمىستاردى جۇيەلى تۇردە جۇزەگە اسىرىپ كەلەدى.
اتالعان ۇسىنىمداردى ورىنداۋدىڭ ماڭىزدى ستراتەگيالىق ءمانى بار، ويتكەنى، قازاقستان ەىدۇ-عا مۇشە بولۋدى جوسپارلاپ وتىر.
سونداي-اق، مەملەكەتتىك حاتشى بۇگىندە مەملەكەتتىك ساتىپ الۋ سالاسى سىبايلاس جەمقورلىق ەتەك العان سالالاردىڭ ءبىرى بولىپ وتىرعانىن ايتتى. گ.ءابءدىقالىقوۆا قالىپتاسقان احۋال مەملەكەتتىك ساتىپ الۋ سالاسىندا شەشىمدەر قابىلداۋدىڭ ايقىندىلىعىن، ونىڭ ىشىندە وسى پروسەستەرگە قوعامدىق باقىلاۋدى كۇشەيتۋدى جانە ەلەكتروندىق رەسۋرستاردىڭ مۇمكىندىكتەرىن كەڭىنەن پايدالانۋدى كوزدەيتىن قوسىمشا ۇيىمداستىرۋشىلىق-قۇقىقتىق تەتىكتەر ازىرلەۋدى قاجەت ەتەتىنىن اتاپ ءوتتى.
وتىرىس قورىتىندىسى بويىنشا كوميسسيا مەملەكەتتىك ورگاندارعا ناقتى ۇسىنىمدار مەن تاپسىرمالار بەردى.
دەرەككوز: ەگەمەن قازاقستان
