استانا. 4 قاراشا. قىزىلوردا وبلىسى اكىمدىگى جانىنداعى قۇقىق بۇزۋشىلىق پروفيلاكتيكاسى جونىندەگى ۆەدومستۆوارالىق كوميسسيانىڭ جانە وبلىستىق قۇقىق قورعاۋ ورگاندارىنىڭ زاڭدىلىقتى، قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ بىرلەسكەن كەڭەيتىلگەن ءماجىلىسى بولىپ ءوتتى. بۇل تۋرالى قىزىلوردا وبلىستىق پروكۋراتۋراسىنىڭ باسپا ءسوز قىزمەتى حابارلادى.
ماجىلىسكە كوميسسيا جانە كەڭەس مۇشەلەرى، مۇددەلى مەملكەتتىك ورگانداردىڭ باسشىلارى، وبلىستىق ىشكى ىستەر دەپارتامەنتى، كەيبىر كەنت، اۋىلدىق وكرۋگ اكىمدەرى قاتىسىپ، وڭىردەگى ۇرلىق قىلمىسىنىڭ پروفيلاكتيكاسى ماسەلەسىن تالقىلادى.
ناقتىلاساق، 2015 جىلدىڭ 9 ايىندا وبلىس بويىنشا 9،950 قىلمىستىق قۇقىق بۇزۋشىلىق تىركەلگەن بولسا، ونىڭ 4،784 نەمەسە 48،0 پايىزى ۇرلىق قىلمىستارى قۇراعان.
تالداۋمەن قامتىلعان مەرزىمدە 4،784 ۇرلىق قىلمىسى تىركەلىپ، ولار وتكەن جىلدىڭ وسى مەرزىمىمەن سالىستىرعاندا 220-عا نەمەسە 4،8 پايىزعا ارتقان.
بۇل ساناتتاعى قىلمىستار قازالى، قارماقشى، شيەلى، جاڭاقورعان اۋداندارى، بايقوڭىر قالاسىندا وسكەن بولسا، ال قىزىلوردا قالاسى، ارال، جالاعاش، سىرداريا اۋداندارىندا تومەندەگەن.
كامەلەتكە تولماعانداردىڭ اراسىندا ۇرلىق قىلمىسى وزگە قىلمىستارعا قاراعاندا كەڭ تارالىپ وتىر.
وسى مەرزىمدە 136 قىلمىس بۇرىن قۇقىق بۇزۋشىلىق جاساعاندارمەن، 630-ى جۇمىسسىزدارمەن، 31ء-ى جۇمىس ىستەيتىندەرمەن، 54ء-ى ءبىلىم بەرۋ ۇيىمدارىندا وقيتىندارمەن جاسالسا، قىلمىس جاساۋ بارىسىندا 128 ادام الكوگولدى ەلىتۋ جاعدايىندا بولعان.
وبلىستىڭ ەلدى مەكەندەردەگى تۇرعىندارى، نەگىزىنەن مال شارۋاشىلىعىمەن اينالىسىپ، حالىقتىڭ قوسالقى، كەي جانۇيالاردىڭ نەگىزگى كۇن كورىس كوزدەرىن قۇرايدى.
سالىستىرمالى كەزەڭدە مال ۇرلىعى قىلمىستارى 153-كە ارتىپ، وسى كاسىپ تۇرىمەن اينالىساتىندارعا وراسان زالال اكەلۋدە.
پروكۋراتۋرا ورگاندارىمەن قالىپتاسقان احۋالعا جاسالعان تالداۋ ناتيجەسىمەن مال ۇرلىعىنىڭ ءوسىپ، كريمينوگەندىك سيپاتتالۋىنا كەلەسى سەبەپتەر نەگىز بولعان.
بىرىنشىدەن، مالداردىڭ كوبىسى ورىستەن ۇرلانىپ، جوعالۋدا. ياعني، قىلمىسكەرلەر مالداردىڭ جايىلىمدا قاراۋسىز جۇرگەنىن پايدالانۋدا. مىسالى، 693 مال ۇرلىعىنىڭ 537ء-سى، نەمەسە 77،5 پايىزى ورىستە ورىن العان.
ەكىنشىدەن، جالپى وبلىس كولەمىندەگى 147 اۋىلدىق وكرۋگتىڭ 66-سىندا عانا پادا ۇيىمداستىرىلىپ، باقتاشىمەن قامتىلعان. ياعني، ولاردىڭ كوبىسى ۇجىمداسىپ باقتاشى جالداپ، مال جايۋدى ۇيىمداستىرماعان. بۇل دا قىلمىسكەرگە ۇرلىق جاساۋعا وڭتايلى ءسات تۋعىزادى.
ۇشىنشىدەن، بۇگىنگى كۇنى وبلىس كولەمىندە جالپى 755 405 مال قۇجاتتاندىرىلعان. دەگەمەن دە، مال سانىن تۇگەندەۋ جۇمىستارى وبلىس كولەمىندە تولىق اتقارىلدى دەپ ايتۋعا ەشكىم كەپىل بەرە المايدى.
ەسەپتىڭ بولماۋى قىلمىستىڭ ورىن الىنۋىنىڭ بىردەن ءبىر سەبەبى. بۇل – مالدى قۇجاتتاندىرۋعا، تاڭبا، ەن سالۋعا قاتىستى.
تورتىنشىدەن، مالدى وتكىزەتىن، سويىلعان مالدىڭ ەتىن قابىلدايتىن جانە سوياتىن ورىندار قىزمەتىنە ءتيىستى باقىلاۋدىڭ بولماۋى.
بەسىنشىدەن، وسى ساناتتاعى قىلمىس جاساعانداردىڭ الەۋمەتتىك پورترەتىن جاساۋ ناتيجەسىندە، قىلمىستىڭ بۇل ءتۇرىنىڭ جاسالۋىنىڭ ءبىر سەبەبى – كۇن كورىس تومەندىگىمەن دە بايلانىستى ەكەنى انىقتالدى، ۇرلىقتى كوبىنەسە جۇمىسسىز جۇرگەن 30-عا دەيىنگى جاستاعى اۋىل تۇرعىندارى، جەكەلەگەن جاعدايلاردا بۇرىن مال ۇرلىعى ءۇشىن سوتتالعاندار جاساعان.
التىنشىدان، ورىستەن كەتكەن مالداردىڭ ۇرلانعانى تۋرالى دەر كەزىندە جەرگىلىكتى ىشكى ىستەر ورگاندارىنا حابارلاماي، اپتالاپ وزدەرى ىزدەۋلەرىنە وراي، قىلمىسكەرلەردىڭ ءىزى سۋىپ، قىلمىستىڭ اشىلۋىنا كەرى اسەرىن تيگىزۋدە.
وتكەن مەرزىمدە سوتتاردا ۇرلىقا بايلانىستى 267 ادامعا قاتىستى 196 قىلمىستىق ءىس قارالىپ، 74 ادام باس بوستاندىعىنان ايىرىلدى.
قىزىلوردا وبلىسىنىڭ اگرارلىق ءوڭىر ەكەنىن، حالىقتىڭ باسىم كوپشىلىگى اۋىل شارۋاشىلىعىمەن اينالىساتىنىن ەسكەرە وتىرىپ، مال ۇرلىعىمەن كۇرەستى ورتاق مىندەت دەپ تانىپ، قىلمىستىڭ بۇل ءتۇرىن الدىن الۋ، بولدىرماۋ جانە جولىن كەسۋ باعىتىنداعى ءىس-شارالاردى بىرىگىپ ىسكە اسىرۋ قاجەتتىگى ايتىلدى.
قىلمىستىڭ بۇل تۇرىمەن كۇرەس جاعدايى وبلىستىق پروكۋراتۋرانىڭ ۇدايى نازارىندا بولىپ، بۇل تۇرعىدا مال ۇرلىعىنىڭ ءتول قۇجاتى جاسالدى جانە ولار جىل سايىن جاڭارتىلىپ، جەتىلدىرۋدە.

دەرەككوز: ەگەمەن قازاقستان