تاۋەلسىزدىك كۇنىمىز بەن جەلتوقسان كوتەرىلىسىنىڭ قۇرباندارىن ەسكە الار، 16-17 جەلتوقسان جاقىنداعان سايىن ءبىزدىڭ ەلدە «دايىندىق جۇمىستارى» قىزۋ باستالادى. كوزگە كورىنىپ تۇرعان دايىندىقتار بولماعان سوڭ، قانداي دايىنىقتار دەپ ويلايتىن بولارسىزدار. ول دايىندىق جاڭا جىل سياقتى مەرەكەلىك كوڭىل كۇيدەگى دايىندىقتار ەمەس، كەرىسىنشە ۇرەي مەن كۇماننان تۋعان ساقتىق شارالارىنىڭ دايىندىعى ەدى.
الماتىدا 7 جىل اكىم بولعان احمەتجان ەسىموۆ مىرزا كەزىندە تاۋەلسىزدىك كۇنىمىز 6 رەت اتالىپ وتكەن ەدى. سونىڭ ءبىر دە بىرىندە الماتىدا بولماعان اكىم الماتى ستۋدەنتتەرىن ۇيىنە قايتارىپ جىبەرىپ، ءوزى اۋىلىنا بارىپ تۋعان كۇنىن تويلايتىن بولعان. ونى كەزەكتى ءبىر باسپا ءسوز ءماسليحاتىندا ءوزى دە مويىندادى. جىلدا 16-17 جەلتوقسان كۇندەرى الماتىداعى تاۋەلسىزدىڭ مونۋمەنتى مەن جەلتوقسان قۇرباندارىنا ارنالعان «تاۋەلسىزدىك تاڭى» ەسكەرتكىشىنە كەلىپ گۇل شوعىن قويىپ، قۇران باعىشتايتىن 20 ادامنىڭ «قاۋىپسىزدىگىن» 200 پوليسيا «قورعايدى». بيىل دا الماتىدا سونداي كەزەكتى «دايىندىق جۇمىستارى» باستالىپتى. ءبىراق، ەسىموۆتىڭ كەزىندەگىدەي ەمەس.
كەشە كەشتە ساتبايەۆ پەن جەلتوقسان كوشەسىنىڭ قيلىسىندا ورنالاسقان، جەلتوقسان رۋحىنا ارنالعان «تاۋەلسىزدىك تاڭى» ەسكەرتكىشىنىڭ قورشاۋدا تۇرعانىن كوردىم. كوڭىلگە بىردەن «ەسىموۆ مىرزا جەلتوقسان باتىرلارىنا قۇران باعىشتامادى دەپ جۇرگەندە باۋىرجان بايبەك كەلىپ ءبارىمىزدى ەسكەرتكىش ماڭايىنا جولاتپايىن دەدى مە؟» دەگەن قورقىنىشتى وي كەلدى. تاۋەلسىزدىك كۇنى جاقىنداعاندا نە قىلعان جوندەۋ جۇمىستارى، بۇنىڭ ارتىندا ءبىر ساياسي قيتۇرقىلىق تۇر ما دەگەن ويدان ادا بولۋ ءۇشىن الماتى قالالىق ىشكى ساياسات ءبولىمىنىڭ باسشىسى ساياسات نۇربەك مىرزادان كوكەيىمدىگى سۇراقتاردى قويىپ، «ول جەردە 25 قاراشاعا دەيىن قالپىنا كەلتىرۋ جۇمىستارى جۇرگىزىلەدى»،- دەگەن جاۋاپ الدىم. سونىمەن بىرگە، ساياسات نۇربەك مىرزا ءوزىنىڭ فەيسبۋك پاراقشاسىنداعى وسى تۋرالى جازعان جازباسىنىڭ سىلتەمەسىن كورسەتتى. «2006 ج. قىركۇيەكتىڭ 18ء-ى كۇنى الماتىدا 1986 جىلعى جەلتوقسان وقيعاسىنىڭ 20 جىلدىعىنا ارنالعان «تاۋەلسىزدىك تاڭى» ەسكەرتكىشى اشىلعان ەدى. جەلتوقسان وقيعاسىنىڭ 29 جىلدىعىنا وراي جەلتوقسان مەن ساتپايەۆ كوشەلەرىنىڭ قيىلىسىندا ورنالاسقان «تاۋەلسىزدىك تاڭى» ەسكەرتكىشىنىڭ قالپىنا كەلتىرۋ جۇمىستارى جالعاسۋدا. بۇگىن جينالىس وتكىزىپ مەردىگەرمەن وسى ايدىڭ 25-نە دەيىن بىتىرۋگە كەلىستىك»،- دەپ جازىپتى س. نۇربەك مىرزا 16 قاراشا كۇنى.
مىنە، بۇل دا بولسا ساياسات نۇربەك سياقتى ۇلتتىق قۇندىلىقتاردى جوقتاۋشى ازاماتتاردىڭ بيلىكتە بولعانىنىڭ ارقاسى. ەستەرىڭىزدە بولسا، بەرىك ءۋالي وڭتۇسىك قازاقستان وبلىسىنىڭ ىشكى ساياساتىن باسقارىپ تۇرعان كەزىندە وبلىس اكىمىنىڭ وبلىستا تاۋەلسىزدىك كۇنى وتپەيىنشە جاڭا جىلعا دايىندىق جۇمىستارىن باستاماۋ تۋرالى شەشىم قابىلداۋىنا اسەر ەتىپ، ءقازىر «نۇر وتاندىقتار» سول باستامانى بۇكىل قازاقستانعا ۇندەۋ ەتىپ تاستاپ وتىر. ساياسات نۇربەك مىرزا دا جاس اكىم باۋىرجان بايبەككە ۇلتتىق قۇندىلىقتاردى ۇلىقتاۋ جاعىندا ءوز ىقپالىن جۇرگىزىپ وتىرعان بولسا كەرەك. سوندىقتان دا، رەسمي بيلىكتىڭ ءوزى قادىرىنە جەتپەگەن جەلتوقسان كوتەرىلىسىن ۇلىقتاپ، قۇرباندارعا تاعزىم رەتىندە ەسكەرتكىشكە جوندە جۇمىستارىن جاساپ جاتسا كەرەك. ەندى، بەرگىلەنگەن ۋاقىتتا جوندەۋ جۇمىستارى ءساتتى اياقتالسىن دەپ تىلەيىك.
رەسمي بيلىكتىڭ ءوزى قادىرىنە جەتپەي وتىر دەگەنىم، 17 جەلتوقساندى قازاقستاننىڭ دەموكراتيالىق جاڭارۋ كۇنى دەپ مايموڭكەلەمەي، جەلتوقسان كوتەرىلىسىن ەسكە الۋ كۇنى دەپ اتاۋ كەرەك ەدى. ءبىراق، جەلتوقسانن كوتەرىلىسىنىڭ 29 جىلدىعىن دا دەموكراتيالىق جاڭارۋ كۇنى دەپ اتاپ وتكەلى وتىرمىز. قۇداي قالاسا، شىرشانىڭ ورىنىنا ەسكەرتكىشتەردى تۇگەندەپ جۇرگەن جىگىتتەر جوعارى بيلىككە بارعاندا، 17 جەلتوقساندى جەلتوقسان كوتەرىلىسىن ەسكە الۋ كۇنى دەپ اشىق اتايتىن بولارمىز.
تۇردىبەك قۇرمەتحان
پىكىر قالدىرۋ