بۇگىن استانادا بىرنەشە تۇرعىن سۇرىلگەلى جاتقان باسپانالارىنىڭ ورنىنا ءۇي بەرۋدى تالاپ ەتىپ نارازىلىق اكسياسىن ۇيىمداستىردى. بۇل تۋرالى «قامشى» پورتالى ازاتتىققا سىلتەمە جاساپ حابارلايدى.
نارازىلىق شاراسىنا شىققان كەلىنشەكتەردىڭ قولىندا «جاقسىبەكوۆ، جىلاتپا!» دەپ جازىلعان پلاكاتتار بولعان. ال، انالارىمەن ەرىپ شىققان كىشكەنە بالالاردىڭ ۇستىندەگى كيىمدەرىنە «ءبىزدى ۇيىمىزدەن شىعارىپ كورىڭىزدەر!»، «پاتەر بەرۋدى سۇرايمىز!» دەگەن تالاپتار جازىلعان پاراقتار جاپسىرىلعان.
اكسيا ۇيىمداستىرۋشىلارىن پوليسيا قىزمەتكەرلەرى قالالىق اكىمدىك جانىندا ۇستاپ الىپ، اۆتوبۋسقا تيەپ اكەتكەن.
قالا اكىمدىگىنەن باسپانا سۇراپ جۇرگەن بۇل ازاماتتار – استانا ىرگەسىندەگى ءوندىرىس ەلدى مەكەنىنىڭ تۇرعىندارى. ولار تۇرىپ جاتقان باسپانا سوت شەشىمىمەن قۇلاتىلۋى ءتيىس. ال، تۇرعىندار مەملەكەتتەن بولىنەتىن وتەماقى جاڭا باسپانا الۋعا جەتكىلىكسىز دەپ وتىر. ولار بۇعان دەيىن دە بىرنەشە رەت وسى ماسەلە بويىنشا مەملەكەتتىك مەكەمەلەرگە شاعىم تۇسىرگەن ەكەن.
پىكىر قالدىرۋ