قازاقستاندىق ارۋ رەگينا ۆاندىشيەۆا قىتايدا وتەتىن «الەم ارۋى-2015» سۇلۋلىق بايقاۋىنا قىزۋ دايىندىق ۇستىندە. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.

«مەن ءۇشىن ەلىمدى حالىقارالىق دودادا تانىستىرۋ ۇلكەن مارتەبە. ءقازىر سپورتتىق سايىسقا، دەفيلەگە، ۇلتتىق كيىم بايقاۋىنا دايىندىققا بارىنشا كىرىسىپ جاتىرمىن. ۇيىمداستىرۋشىلار ءبىر اي بويى قاتىسۋشىلاردى قاتاڭ باقىلايتىن بولادى»، - دەدى ول. 

قازاقستاننىڭ ەڭ ادەمى ارۋى شىعارماشىلىق بايقاۋعا دايىنداپ جاتقان ءنومىرى تۋرالى ايتىپ بەردى. 

«كونتەمپوراري ستيلىندە بي دايىنداپ جاتىرمىن. ءقازىر شەبەرلىگىمدى شىڭداي ءتۇسۋ ءۇشىن جاتتىعۋ زالىندا، كروسس-فيت، فيتنەس زالدا دايىندالىپ ءجۇرمىن. ءوزىمنىڭ دەمەۋشىم Sherri Hill كيىمدەرىن كيەمىن. ءبىراق ۇلتتىق ناقىشتا ديزاينەر ايدا قاۋمەنوۆانىڭ تىككەن كويلەگىمەن شىعامىن»،- دەدى ول.
جاقىندا عالامتوردا رەگينانىڭ الەمدىك دوداعا دايىندىعى تۋرالى بەينەتانىستىرىلىمى جارىق كوردى. بەينەروليكتە رەگينا قازاقستاننىڭ كوركەم جەرلەرىن تانىستىرىپ، ءوزىنىڭ بولاشاققا دەگەن جوسپارىمەن ءبولىستى.
«الەم ارۋى-2015» بايقاۋى قىتايدىڭ حاينان ارالىندا 19 جەلتوقساندا وتەدى.