كەشە كەشكە شىعىس قازاقستان وبلىسى ريددەر قالالىق سوتى 26 جاستاعى بلوگەر يگور سىچيەۆتى ​"سەپاراتيزمگە شاقىرعانى ءۇشىن" بەس جىلعا سوتتادى. تۇرمەگە كەسىلگەن سىچيەۆ ايىپتى مويىندامادى. بۇل تۋرالى «قامشى» پورتالى ازاتتىققا سىلتەمە جاساپ حابارلايدى.

– ۇكىمگە قاتىستى اپپەلياسيالىق سوتقا مىندەتتى تۇردە شاعىمدانامىز، – دەپ مالىمدەدى سوتتالعان بلوگەردىڭ ادۆوكاتى يگور شيگرين.

يگور سىچيەۆ تەرگەۋ كەزىندە جانە سوت پروسەسىندە، ونىڭ ىشىندە بۇگىن تاڭەرتەڭ تاراپتار جارىسسوزىندە سويلەگەندە جانە وزىنە سوڭعى ءسوز بەرگەندە تاعىلعان ايىپتى مويىندامايتىنىن مالىمدەگەن.

تاراپتار ءجارىسسوزىن باستاعان پروكۋرور سوتتان ي. سىچيەۆتى بەس جىلعا سوتتاۋدى سۇرادى. قىرىمدى رەسەي قۇرامىنا ءبولىپ العاننان كەيىنگى ۋكرايناداعى جاعدايعا سىلتەمە جاساعان پروكۋرور ي. سىچيەۆ «كوبىنەسە ورىس حالقى تۇراتىن ايماقتا» سەپاراتيستىك كوڭىل-كۇي تۋدىرۋعا تىرىسقان ارەكەتتەرگە قاساقانا بارعان دەپ مالىمدەدى.

ي. سىچيەۆ ىسىنە قاتىستى پروسەسس بارىسىن باقىلاعان جەرگىلىكتى قۇقىق قورعاۋشى الەكساندر حارلاموۆتىڭ ازاتتىققا ايتۋىنشا، بلوگەردىڭ سوتى ريددەردە ۇلكەن رەزونانس تۋدىرعان.

– يگور سىچيەۆتى قولداۋ ءۇشىن سوتقا وتە كوپ ادام كەلدى، – دەيدى الەكساندر حارلاموۆ.

يگور سىچيەۆ رەسەيلىك «ۆكونتاكتە» الەۋمەتتىك جەلىسىندەگى «پودسلۋشانو ۆ ريددەرە» پاراقشاسى ادمينيستراتورلارىنىڭ ءبىرى بولعان. بيىل كوكتەمدە ول توپ پاراقشاسىندا «داۋىسقا سالۋ ريددەر قالاسىندا ءوتىپ جاتىر دەپ ەلەستەتىپ كورەيىكشى» دەگەن تاقىرىپپەن ساۋالناما جاريالاپ، وقىرماندارعا شىعىس قازاقستان وبلىسىن رەسەي فەدەراسياسى قۇرامىنا قوسۋدى «قولدايمىن» نەمەسە «قارسىمىن» دەپ جاۋاپ بەرۋدى ۇسىنعان. جۇرت نارازىلىق بىلدىرگەن سوڭ ول الگى داۋىس بەرۋدى الىپ تاستاعان. كەيىن سىچيەۆكە ايىپ تاعىلعان.

جەرگىلىكتى قۇقىق قورعاۋشىلاردىڭ پىكىرىنشە، بلوگەر يگور سىچيەۆتىڭ سوت پروسەسى بەلسەندىلەرگە قارسى «بۇرىن-سوڭدى بولماعان رەپرەسسيالار» كەزەڭى تۇسىندا ءوتىپ وتىر. بۇگىن استانا سوتى «ب ا ق ارقىلى الەۋمەتتىك جانە ۇلتتىق ارازدىقتى قوزدىرۋعا باعىتتالعان» ارەكەتتەردى قاساقانا جاسادى دەگەن كۇدىكپەن 9 قاراشادا ۇستالعان 42 جاستاعى ازاماتتىق بەلسەندى بولاتبەك ءبىلالوۆتى تەرگەۋ اباقتىسىندا قاماۋدا قالدىرۋدى ۇيعارعان شەشىم شىعاردى. الماتىدا رەسەيگە قارسى پوزيسياسىمەن تانىلعان ازاماتتىق بەلسەندىلەر ەرمەك نارىمبايەۆ پەن سەرىكجان مامبەتالين «ۇلتارالىق ارازدىقتى قوزدىرۋ» ءىسى بويىنشا تەرگەلىپ جاتىر. جامبىل وبلىسىندا رەسەيشىل كوزقاراستارىمەن تانىلعان بلوگەر ەرمەك تايشىبەكوۆتىڭ سوتى ءوتىپ جاتىر. وعان «ۇلتارالىق وشپەندىلىكتى قوزدىردى» دەگەن ايىپ تاعىلعان.