ەل ىشىندە جەڭىل ونەركاسىپتىڭ تاپتىرماس شيكىزاتىنا پايدالاناتىن ءتورت تۇلىك مال ءجۇنى وڭدەلمەيتىنى اقيقات.
سان جىلدار بويى مال شارۋاشىلىعىن شىعىنعا باتىرىپ، وڭدەلمەي قوقىسقا تاستالاتىن مال ءجۇنىن حالىقتىڭ يگىلىگىنە پايدالانۋ ءۇشىن اتىراۋ وبلىسىنىڭ اكىمى باقتىقوجا ىزمۇحامبەتوۆ ايماققا باسشى بولىپ تاعايىندالعان ساتتە-اق اۋقىمدى جوبانى جوسپارلادى. ناتيجەسىندە، «Caspiy Lana Atyrau» تۇيە جانە قوي ءجۇنىن وڭدەۋ جانە توقىما فابريكاسى اعىمداعى جىلى تاۋەلسىزدىك كۇنى قارساڭىندا پايدالانۋعا بەرىلەتىن بولادى. ەلىمىزدە تولىق قۋاتىنا قوسىلاتىن بالاماسى جوق جاڭا جوبانى جەكە كاسىپكەر ءالىمجان بالجىگىتوۆ «اتىراۋ» الەۋمەتتىك-كاسىپكەرلىك قورپوراسياسىنىڭ قولداۋىمەن جۇزەگە اسىرۋدا. 
وزگە ايماقتاردا جوق جوبانى جۇزەگە اسىرۋعا تاۋەكەل ەتكەن كاسىپكەر ءالىمجان قاپان ۇلىنىڭ ايتۋىنشا، جەلتوقسان ايىن­دا پايدالانۋعا بەرىلۋى جوسپارلانعان فابريكادا العاشقى كەزەڭدە 100 توننا تۇيە جانە 350 توننا قوي ءجۇنى وڭدەۋدەن وتكىزىلەدى. تارقاتىپ ايتقاندا، مالدىڭ ءجۇنىن العاشقى وڭدەۋ كەشەنى 2 سەحتان تۇرادى. ءبىرىنشىسى – مالدىڭ ءجۇنىن جۋىپ-تازالاۋ، بوياۋ، ەكىنشىسى – تازالانعان ءجۇندى تاراپ، ءتۇبىتىن الۋ. تۇيە مەن قوي ءجۇنىن وڭدەۋ جانە توقىما فابريكاسى تۋرالى ءسوز قوزعالعاننان-اق، وبلىس ورتالىعى مەن جەتى اۋدان حالقى تۇيە مەن قوي ءجۇنىن جيناپ، فابريكاعا وتكىزۋگە دايىندىق جۇمىستارى باستالىپ كەتتى. العاشىندا باستاپقى وڭدەۋ ساتىلارىنان وتكەن شيكىزات توقىما سەحىنا جونەلتىلەدى. 
«جوبا بىرنەشە كەزەڭنەن تۇرادى. الدىمەن تەكستيل سالاسىندا جىلىنا 400 مىڭ جۇمساق جامىلعى كورپە شىعارامىز. كەلەسى كەزەڭدە بۇل جۇمىستار كۇردەلەنىپ، نارىققا بەيىم ءونىم تۇرلەرىن كوبەيتۋ ماق­ساتىمىز بار. وسى جوبانى ساراپتاۋ كەزىندە ءبىز، تريكوتاج بۇيىمدارىن شى­عاراتىن سەحىمىزعا لايىق مامان­داردىڭ وبلىستا جوق ەكەنىن بىلدىك. تريكوتاجدان ءونىم شىعارۋ وتە كۇردەلى جۇمىس ەكەن. دە­گەنمەن ءبىز تريكوتاجدان كوستيۋمنەن باس­تاپ شۇلىققا دەيىن ساپالى ءونىم شىعارۋعا بەل بۋىپ وتىرمىز. بيىلعى وقۋ جىلىنا ماسكەۋدەگى ۋنيۆەرسيتەتكە 8 ادامدى وقۋعا جىبەردىك. ولار وقۋدان تىس كەزدە فابري­كامىزعا كەلىپ، ماسكەۋدەن وتكەن پراكتي­كالىق تاجىريبەلەرىمەن بولىسەدى ءارى وقۋدى اياقتاعان سوڭ كاسىبي مامان بولىپ ىسىلىپ كەلەر دەگەن ءۇمىتىمىز بار. فابريكا پايدالانۋعا بەرىلگەن سوڭ، جەرگىلىكتى جەر­دەن 150 ادام جۇمىسقا قامتىلادى دەپ بول­جاپ وتىرمىز» دەگەن ءالىمجان قاپان­ۇلى اعىمداعى جىلدىڭ جەلتوقسان ايىندا فابريكانى ىسكە قوسۋعا قاۋىرت جۇمىس جۇرۋدە دەدى. ناقتىسىندا، قازىرگى تاڭدا جۇمىستىڭ 80 پايىزى اياقتالعان. 
ءجۇن جۋۋ سەحىنا قۇرال-جابدىقتار الۋعا «QingdaoYuanQuanMachineryCO» كومپانياسىمەن، توقىما سەحى ءۇشىن جاڭا تەحنولوگيانى جەتكىزۋگە يتاليالىق VICOTEXSRL كومپانياسىمەن كەلىسىمشارت جاسالعان. جەڭىل ونەركاسىبى قارقىندى دامىعان شەتەلدەردىڭ بىلىكتى ماماندارى كەڭەسشى رەتىندە تارتىلادى. ءقازىردىڭ ءوزىن­دە اتىراۋدا باستاپقى وڭدەۋدەن وتكىزىلەتىن جۇنگە رەسەي، جۇڭگو جانە موڭعوليا ەلدەرىنىڭ قىزىعۋشىلىعى بايقالىپ وتىر. سونىمەن بىرگە ەۋروپا ەلدەرى تەحنولو­گياسىمەن كيىم تىگۋدى قولعا الۋ جولدارى قاراستىرىلادى. وسىعان بايلانىستى فرانسيا، يتاليا جانە بەلگيا سەكىلدى ەلدەردىڭ جەتەكشى ماماندارىنان كەڭەس الۋ اتالعان جوبانىڭ ءساتتى جۇمىس ىستەپ كەتۋىنە ۇلەسىن قوسارى ءسوزسىز. 
 ايماق باسشىسى باقتىقوجا ءىزمۇحام­بەتوۆ بالاماسى ازىرگە جوق فابريكا ءونىم­دەرى­ءنىڭ باسەكەگە قابىلەتتى بولاتىندىعىنا سەنىمدى. العاشقى تاپسىرىستى توقىما فابريكاسىن قۇرال-جابدىقتارمەن قامتى­عان يتاليالىقتاردىڭ وزدەرى جاساپ، تو­قىما فابريكاسىنىڭ العاشقى ونىمدەرىن جەتكىزىپ بەرۋگە ءوتىنىش بىلدىرگەن. 
– اۋدانداردى ارالاعانىمدا ءماسليحات دەپۋتاتتارى اۋىلشارۋاشىلىق تاۋار­لارىن ءوندىرۋ مەن ءجۇن وڭدەۋ ماسەلەسىن ءجيى كوتەرىپ، ۇسىنىس-پىكىرلەرىن جولداعان ەدى. بۇل جوبا ۇدەمەلى يندۋستريالىق-ين­نوۆاسيالىق دامۋ باعدارلاماسى بويىنشا قولعا الىندى. وبلىستا تۇيە باسى كوبەيۋ­دە. ءقازىر 60 مىڭداي تۇيە بار. بۇدان باسقا، ماڭعىستاۋ مەن باتىس قازاقستان وبلىستا­رى مال ءجۇنىن جەتكىزۋگە ۋادە بەرىپ وتىر. ماڭعىستاۋ وبلىسىندا 70 مىڭداي تۇيە بار. ءبىراق قوس وركەشتى تۇيەلەردىڭ ءجۇنى اق جانە ءتۇبىتتى بولارىن ەسكەرىپ، بولا­شاقتا اق ءتۇستى ءارى قوس وركەشتى تۇيەلەر سانىن كوبەيتۋدى جوسپارلاپ وتىرمىز، – دەگەن وبلىس اكىمى باقتىقوجا سالاحات­دين ۇلى فابريكا كەلەر جىلى تولىق قۋاتىنا شىعادى دەپ سەنىممەن ايتتى.

دەرەككوز: ايقىن-اقپارات