الماتى قالاسىنىڭ جاڭا جىلدىق شىرشاسى رەسپۋبليكا سارايى الدىنداعى اباي الاڭىنا ورناتىلادى. بۇل تۋرالى «قامشى» پورتالى الماتى اكىمدىگىنىڭ مادەنيەت باسقارماسىنا سىلتەمە جاساپ حابارلايدى.

شىرشانىڭ ورناتىلاتىن ناقتى ۋاقىتى ءالى بەلگىسىز. اكىمدىكتەگىلەر سونداي-اق، قالا اۋداندارىندا دا جاڭاجىلدىق شىرشالار ورناتىلاتىنىن حابارلادى. قالادا جاڭا جىلدى اتاپ وتۋگە بيزنەس قۇرىلىمدارى دا جۇمىلدىرىلىپ، ۇزدىك بەزەندىرۋگە بايقاۋ جاريالانباق.

ەل پرەزيدەنتى اتىنان وتەتىن شىرشا مەرەكەسى الماتىدا 24 جەلتوقساندا، قالا اكىمىنىڭ شىرشاسى 25 جەلتوقساندا ۇيىمداستىرىلماق. قالا اكىمىنىڭ شىرشاسىنا 1700 بالا شاقىرىلىپ، ولارعا سىي-سىياپات جاساۋ ءۇشىن 22،85 ميلليون تەڭگە قاراجات قاراستىرىلىپ وتىر. اكىم شىرشاسىن ۇيىمداستىرۋعا 13،8 ميلليون تەڭگە بولىنبەك. 200 بالا قاتىسادى دەپ جوسپارلانىپ وتىرعان پرەزيدەنت شىرشاسىنا 16،35 ميلليون تەڭگە قاراستىرىلعان. مادەنيەت باسقارماسىنداعىلار جاڭا جىلدىق شىرشا مەرەكەسىنە كاسىپكەرلەردىڭ قاتىسۋىنا بايلانىستى مەرەكەلىك بيۋدجەتتە تاعى وزگەرىستەر بولاتىنىن ەسكەرتكەن.