ەلىمىزدە ينۆەستورلار تارتۋمەن جانە ينۆەستيسيالىق كليماتتى جەتىلدىرۋمەن اينالىساتىن جاڭا مەملەكەتتىك ورگان قۇرىلۋى مۇمكىن. بۇل تۋرالى «قامشى» پورتالى حابارلايدى.
«اكىمدىكتەر مەن بيزنەس وكىلدەرى قاتىسقان ۇكىمەت وتىرىسىندا ينۆەستيسيالىق كليمات ماسەلەلەرىن تالقىلادىق. پرەمەر-مينيستر مۇددەلى مەملەكەتتىك ورگاندار دۇيسەنبىگە دەيىن جاڭا مەملەكەتتىك ورگان نەمەسە باسقا فورماداعى – اگەنتتىك ياكي اكسيونەرلىك قوعام تۇرىندەگى ۇيىم قۇرۋعا قاتىستى ۇسىنىستاردى ەنگىزۋ تۋرالى تاپسىرما بەردى. ول ۇسىنىستاردى ءبىز سوسىن ەلباسىعا ەنگىزەمىز» دەدى ۇكىمەت باسشىسىنىڭ ءبىرىنشى ورىنباسارى باقىتجان ساعىنتايەۆ بۇگىن ءماجىلىستىڭ پلەنارلىق وتىرىسىندا.
ب. ساعىنتايەۆ ينۆەستيسيالىق احۋالدى جەتىلدىرۋدىڭ ەلىمىز ءۇشىن ماڭىزدى ەكەنىن باسا ايتتى. ونىڭ ايتۋىنشا، سوڭعى 10 جىلدا قازاقستانعا 200 ميلليارد اقش دوللارى كولەمىندە ينۆەستيسيا تارتىلعان جانە 2014 جىلدىڭ قورىتىندىسى بويىنشا ەلىمىز ينۆەستيسيا تارتۋشى ۇزدىك 30 مەملەكەت قاتارىنا ەنگەن.
