Almaty qalasy, Qalqaman-2 yqsham aýdanyndaǵy qazirgi Ábishev, burynǵy Alty-alash-1 kóshesiniń búginde astań-kesteńi shyǵyp jatyr. Sebebi jol jóndeýshiler atalmysh kósheni jóndeý jumystaryna kirisip, aqyry aıaqsyz qaldyrǵan. Astana kúniniń qarsańynda jóndeý jumystary toqtap qalǵan kórinedi.

Turǵyndardyń aıtýynsha, bul kóshe eshqashan asfált kórmegen. Ár jazda sý qubyrlaryn ótkizý jumystary júrip turady. Jıi qazylǵan jerdiń saldarynan kúzgi jáne kóktemgi jańbyrda turǵyndar balshyqqa batatyn. Osy jyly dál sol jaǵdaıdy bastan keshemiz be dep úreılenip otyr halyq.

Onyń ústine, kóshe qazylǵan kúıi jatyr eken. «Kólikterdiń qatynaýy tipti qıyn, nebári 500 metr bolatyn kósheniń basynan aıaǵyna jetý úshin 20 mınýt ýaqyt ketedi» dep turǵyndar ashynyp otyr. Kishkentaı balalardyń ári beri júgirip oınaýyna da yńǵaısyz. Oınap júrip jaraqat alǵandary da jeterlik.

Qalıeva Almagúl, Qalqaman-2 yqsham aýdanynyń turǵyny:

«Osynda kóship kelgenimizge 10 jyldan astam ýaqyt ótti. Asfált degendi kórgen emespiz. Mamyrda jóndeý jumystary bastalǵanda, qatty qýanyp edik, ony da toqtatyp qoıdy. Qaıtadan qalpyna keltirip qoısa bolady ǵoı eń bolmaǵanda, kósheniń bári qazylǵan kúıi jatyr. Adamdar ol jerlerdi qoqysqa úıip tastady. Kólik ótken saıyn shań-tozań bolady».

Osy máseleniń sebebin bilý maqsatynda Qamshy.kz aqparat agentitgiginiń tilshisi Naýryzbaı aýdanynyń ákimdigine habarlasyp kórdi. Alaıda ákimniń qabyldaý bólimi de, kómekshisi de tutqalaryn kótermedi.

Aıta keteıik, mamyrdyń basynda Almaty qalasynyń ákimi Baýyrjan Baıbek Naýryzbaı aýdanyn damytý boıynsha kóshpeli jıyn ótkizgen. Jıyn barysynda Naýryzbaı aýdanynyń ákimi Saıran Saıfedenov bıylǵy jyly Qalqaman yqsham aýdanynda jańa joldar salý josparlanǵanyn, uzyndyǵy 17 shaqyrym bolatyn 32 kósheniń jańartylatynyn, uzyndyǵy 26 shaqyrym bolatyn 22 kóshege ortasha jóndeý jumystary júrgiziletinin aıtty.

Turǵyndar Naýryzbaı aýdanynyń ákiminen jol jóndeýshilerdiń óz jumystaryna jaýapkershilikpen qaraýyn talap etýin, sondaı-aq jóndeý jumystarynyń kúzge deıin aıaqtalýyn surady.