Oǵyz Doǵan Qazkom banki qyzmetkerleriniń keshirim suraǵanyn kútip júr, dep jazady Qamshy.kz aqparat agenttigi. Ol áli bankti sotqa bermegen.

– Bul – keshe ǵana bolǵan oqıǵa. Qazir biz banktiń tutynýshylarmen jumys isteıtin bólimine habarlasyp jatyrmyz. Eger olar qazaq halqynan, menen keshirim suraıtyn bolsa,  árıne, sotqa bermeımiz. Air Astana oqıǵasynda da solaı bolǵan. Alaıda bank qyzmetkerleri Air Astana sekildi keshirim suraýdan bas tartatyn bolsa, onda sotqa júginýge májbúr bolamyz, – deıdi Oǵyz Doǵan.

Ol banktiń keshirim suraýyn qansha ýaqyt kútetinin kesip aıta almady.

– Men olarmen áli sóılespedim. Telefon soǵyp shaǵymdanǵan azamattarǵa bank ókilderi: «Bul is qaralyp jatyr», – degen kórinedi. Búgin ózim de habarlasamyn. Jaǵdaıǵa qarap, sotqa berý-bermeý týraly sheshim shyǵaramyz. Biraq olar keshirim suraıdy dep úmittenemin, – dedi Oǵyz Doǵan.

El arasynda Oǵyz Doǵanǵa qatysty eki túrli pikir bar. Basym kópshilik ony til kúreskeri dep qurmettese, keıbiri ony qazaq tiliniń atyn jamylyp, arzan pıar qýalap júr dep sanaıdy.

– Meni pıar jasap júr deıtin adamdardyń sany az. Men qazaq tiliniń mamanymyn. Meniń «Qazaq tiliniń gramatıkasy» atty eńbegim bar. Ol – qazaq til bilimi salasyndaǵy Túrkıada jarıalanǵan alǵashqy hám jalǵyz kitap. Ǵylym jolynda júrgen bizdeı adamǵa pıardyń eshqandaı qajeti joq, - dedi Doǵan.

Qazaq tiliniń mártebesi úshin shırek ǵasyrdan astam ýaqyt jumys istep júrgenin aıtqan Oǵyz Doǵan búginde kúres tásilin ózgertkenin aıtady.

– Men jańa tehnologıany qoldanyp kúrese bastadym. Bar aıyrmashylyq – osy.  Qazir kez kelgen adamnyń qolynda uıaly telefon bar. Osy múmkindikti tilimizdiń abyroıyn qorǵaý jolynda paıdalanyp jatyrmyn. Sizder de biletin shyǵarsyzdar, qazaq tili tek meniń kózimshe ǵana emes, basqa da azamattardyń aldynda qorlanyp, taptalyp jatyr, – dedi ol.

Aıta keteıik, Oǵyz Doǵan Qyrǵyzstanda da til máselesin kótergen bolatyn. Bul jóninde ol óz ustanymyn naqty bildirdi.

– Bul aqparat – ras. Qyrǵyz tili de – bizdiń tilimiz. Qazaq tili ǵana emes, túrki tilderiniń árqaısysy bizdiń ana tilimiz dep esepteımin. Túrki tilderiniń qaı-qaısysy taptalyp jatsa da, men qolymnan kelgen kómekti aıamaımyn. Erteń Ózbekstanda da osyǵan uqsas jaıt bolsa, Tatarstanda tatar tili qorlanatyn bolsa, járdem jasaýǵa daıynmyn, – dedi Oǵyz Doǵan.

Túrkıalyq BAQ-tarda Oǵyz Doǵannyń stýdent qyzdy zorlamaq boldy degen aıyppen jaýapqa tartylǵany jarıalanǵan bolatyn. Sol týraly suraǵymyzǵa:

– Bul – ótirik, jala. Bul aqparatty jarıalaǵan mekemeni sotqa bergenbiz. Osy máseleni qozǵaıtyn azamattardy zańdy túrde sotqa beretin bolamyz. Bul týraly basqa aıtarym joq. Osyndaı aqparat tarasa da, bul jalǵan aqparat bolǵannan keıin qoǵamdyq máselege aralasa beremin. Buǵan eshqandaı kedergi joq, – dep jaýap berdi Oǵyz Doǵan.