Qazkom-daǵy daýǵa baılanysty Oǵyz Doǵan tıisti qujattardy jınap, ony saýatty daıyndasa, sotta jeńip shyǵýy bek múmkin. Bul týraly Qamshy.kz aqparat agenttigine zańger, advokat Abzal Quspan aıtty.

– Eger Qazaqstan aýmaǵynda memlekettik tilde qyzmet ala almaı, sol úshin sottassańyz, ol iste 100 paıyz jeńip shyǵasyz. «Tutynýshylar quqyǵy» deıtin ámbebap zań bar ári ol soǵan kepildik berip otyr. Osy zańda: «Qazaqstanda kez kelgen qyzmet kórsetýshi memlekettik tilde qyzmet kórsetýge mindetti», – delingen. Muny basshylyqqa alsańyz, qazaq tilinde qyzmet kórsetpegen kez kelgen mekemeni sotqa berip, jeńip shyǵasyz», – dedi Abzal Quspan.

Aıta keteıik, Oǵyz Doǵan ózine qazaq tilinde qyzmet kórsetýden bas tartqan Qazkom bank bólimshesinen keshirim suraýyn talap etken. Suramaǵan jaǵdaıda, sottasatynyn málimdedi.

Qazaqstannyń memlekettik tili úshin kúresip júrgen túrik azamaty byltyr Air Astana kompanıasymen sottasyp, nátıjesinde jeńiske jetken. Air Astana kompanıasy bortseriginiń qazaq tilin bilmegenine narazalyǵyn bildirip, qazaq tilinde qyzmet kórsetýin talap etken Oǵyz Doǵan atalmysh kompanıadan óz kinásin moıyndap keshirim suraýyn jáne moraldyq shyǵyn retinde 1 teńge berýin talap etken. Air Astana ókili keshirim suraýdan bas tartyp, Oǵyz Doǵandy ult arazdyqty qozdyrdy dep aıyptady. Alaıda túrik azamatynyń quqyǵyn qorǵaǵan zańger Abzal Quspannyń jáne birneshe belsendiniń aralasýymen Oǵyz Doǵan jeńip, Air Astana kompanıasynyń bortserikteri jappaı qazaq tilin úırenýge mindetteldi.

Sonymen qatar Abzal Quspan ýaqyty tyǵyz bolǵandyqtan Qazkom-daǵy daýǵa baılanysty Oǵyz Doǵanǵa advokat bolmaıtynyn aıtty.