Qazaqstan Respýblıkasy Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń memlekettik tapsyrmasy boıynsha Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń uıymdastyrýymen Astanada 2018 jyldyń 18 mamyrynda «Termınjasam qaǵıdattary jáne ulttyq termınologıa máseleleri» atty respýblıkalyq ǵylymı-teorıalyq konferensıa ótedi.
Konferensıanyń maqsaty – qazirgi jahandyq ǵylymı-tehnıkalyq damý úderisterinde ǵylym, bilim, tehnıka men ekonomıka, qoǵamdyq-áleýmettik salalaryndaǵy termınder men termın sózderdi jetildirý, tolyqtyrý jáne birizdendirý maqsatynda teorıalyq jáne praktıkalyq izdenisterdi saraptaý jáne talqylaý.
Konferensıada qazirgi ulttyq termınologıanyń jaı-kúıi jáne keleshegi, termınjasam qaǵıdalary men ulttyq termınologıa mindetteri, qazaq tilin latyn grafıkasyna kóshirýge baılanysty týyndaıtyn termınologıalyq mindetter, termınjasam qurylymyn damytý, termındi bekitý, birizdendirý jáne standarttaýdy iske asyrýdyń memlekettik tetikterin damytý, ulttyq termınqordyń elektrondyq bazasyn jasaýdyń ǵylymı-tájirıbelik negizderi baǵytynda sóz qozǵalady.
Jıynda ulttyq termınologıadaǵy máseleler jóninde QR UǴA korespondent múshesi, f.ǵ.d., profesor Sherýbaı Qurmanbaıuly, Nazarbaev Ýnıversıtetiniń profesory, fılologıa ǵylymdarynyń doktory Sarqyt Álisjan jáne t.b. termınolog-ǵalymdar baıandama jasaıdy.
Ǵylymı-teorıalyq konferensıaǵa Qazaqstan Respýblıkasy Úkimetiniń janyndaǵy Respýblıkalyq memlekettik termınologıalyq komısıa músheleri, QR Mádenıet jáne sport mınıstrliginiń jaýapty qyzmetkerleri, termınolog-ǵalymdar, doktoranttar men magıstrler, ortalyq jáne jergilikti atqarýshy memlekettik organdardyń qyzmetkerleri, ulttyq kompanıalardyń ókilderi, sondaı-aq qoǵamdyq uıymdar men zıaly qaýym, BAQ ókilderi qatysady.
Pikir qaldyrý