Kúni keshe portalymyzda "Áset Isekeshev pen Dınara Sátjan "Ólketaný" oqýlyǵyna endi" degen aqparat salǵan edik. İle-shala "Almatykitap baspasyna" habarlasyp, jaýapty mamannyń túsinikteme bergenin qaladyq. Mundaı aqparat atalmysh oqýlyqtyń qandaı betinde ekenin, ol bólimniń avtory kim ekenin birden aıta almaǵan "AlmatyKitap baspasy" birneshe saǵattyq uzaq oılanýdan keıin ýáde etkendeı poshtamyzǵa jaýap bermeı, óz feısbýk paraqshalarynda túsinikteme beripti. Oǵan da shúkir. Áset Isekeshev pen Dınara Sátjan sıaqty ıgi jaqsylardyń feısbýk pen ınstagramda qansha myń jazylýshysy bar ekendigi jaıly málimet 5-7 synyp oqýshylaryna qajetti emes dep túıin túıgen "AlmatyKitap baspasy" ujymyna basymyzdy ızeı otyryp alǵysymyzdy aıtamyz. Endeshe, oqyrman qaýym, súıinshińizdi daıyndaı otyryp, tómendegi túsiniktemege mán berýlerińizdi suraımyz.

Búı deıdi: "5-7-synyptarǵa arnalǵan «Ólketaný. Astana» oqýlyǵy «Rýhanı jańǵyrý» aıasynda jazylyp jatqany barshańyzǵa málim. Qazirgi tańda talqyǵa túsken oqýlyqtyń jobasyna blogerler týraly málimetti rasynda da avtorlar ujymy alǵashynda «Týǵan ólke pýblısısıka betterinde» aıdarymen usynǵan bolatyn. Pýblısısıkanyń bir elementi retinde qazirgi tanymal blogerlerdi kórsetken avtorlyq ujymnyń jobasy, alaıda, oqýlyqtyń sońǵy nusqasyna kirgen joq. «Ólketaný» oqýlyqtary boıynsha shilde aıynda ótken memlekettik saraptamada sarapshylardyń usynysymen oqýlyqtan blogerler týraly málimet alynyp tastalǵan. 
Baspasóz konferensıasynda jýrnalıserge usynylǵan birneshe nusqanyń ishinde nazarǵa ilingeni - blogerler sıaqty málimetteri aýystyrylatyn, azdaǵan óńdeýdi qajet etetin nusqasy. 
Oqýlyqtardy basylymǵa daıyndaý jumysy aldaǵy qyrkúıek aıynda máresine jetedi dep josparlap otyrmyz. Sýrette oqýlyqtyń alǵashqy nusqasy jáne sońǵy nusqasy".

Bir aıta ketetini, mundaı túkke turǵysyz aqpardy oqýlyqtyń ishine kirgize otyryp, úıdeı bálege tap bolatynyn biletin "AlmatyKitap baspasynyń" o bastaǵy kózdegeni ne ekendigi bizge jumbaq bolyp qala beretindigi.