Belgili almatylyq fotograf Oleg Ionov Esquire portalynyń tilshisine erekshe sýreti jaıly baıandap berdi. Sýretten muz ústindegi galosh kıgen aqsaqal men shomylý kıimindegi jas qyzdy baıqaısyzdar. Fotograf álgi aqsaqaldy muz aıdynyna alyp shyǵýǵa qalaı kóndirdi? Shomylý kıimimen kónkı teýip júrgen jas qyz kim? Erekshe sýrettiń tarıhy jaıly fotograftyń oqıǵasyn Qamshy.kz aqparat agenttigi qazaq tiline aýdaryp, oqyrman nazaryna usynyp otyr.

80 jyldardyń aıaǵynda «Medeý» muz aıdyny turǵyndardyń súıikti demalys ornyna aınaldy. Týrıser úzilmeıtin, demalys saıyn qalanyń jastary jınalatyn edi. Qalanyń kúıbeń tirshiliginen bir-birimen kezdesýge múmkindikteri bolmaıtyn tanys-jarandar demalys kúnderi Medeýde baıqaýsyzda kezdesip qalatyn. Sol kúni men muz aıdynynda «Drýjnye rebáta» gazetinde birge qyzmet atqarǵan áriptesim, jas jýrnalıs Alena Ostrovskaıany kezdestirdim. Ózi aqjarqyn, ádemi, kóńildi qyz edi. Kún aspanda shaqyraıyp tur, al álgi jýrnalıs shomylý kıimimen kónkı teýip júr. Aýa raıy keremet boldy, nege solaı júrmeske... Men ádepki ádetime basyp, oryndyqqa otyryp, fotoaparatymdy alyp shyqtym. Alena qasyma kelip otyrdy. Janymyzdaǵy oryndyqta aýyldan kelgen bir top delegasıa otyr edi, olar «Medeýge» kónkı tebý úshin emes, qalanyń kórikti jerlerin tamashalap júrgen kórinedi.  Sondaǵy aýyldyń qurmetti aqsaqalyna bardym da: «Sizdi jas qyzben sýretke túsirip alsam qalaı?» dep suradym. Ónerdiń men qadirleıtin eń keremet tusy – ıýmor. Sol sátte kóz aldyma keremet bir kadr elestedi. Aqsaqal da qarsy bolmady, galoshymen birge muzǵa shyqty. Qýanyshymyzǵa qaraı, baqylaýshylar da eshteńeni kórmedi. Atam Alenanyń qulshyna qushaqtap aldy, qyz da qarsylyq tanytpaı, maıysyp sala berdi. Al men fotoplenkamdy únemdeý úshin sýretke bir ret qana túsirippin. Ári qaraı Alena óz jónimen ketti, aqsaqal ekskýrsıasyn jalǵastyrýǵa attandy.

Sýretti birneshe sýret kórmesine usynǵanymmen, eshqaıda jarıalanbaǵan edi. 25 jyldan soń álgi sýretke jańa lep bitti, bir qyzyǵy, oǵan meniń qatysym joq edi. Áıteýir ınternette júr eken. Internetke kimniń jarıalaǵanynan áli beıhabarmyn. Sýretti kórgen áıelim Alenany ýaıymdady. Sebebi keshegi jas jýrnalıs búgin Amerıkada ataqty Sýkerbergtermen kórshi turady ári myqty programmıstiń áıeli. Oǵan dál osyndaı ataq kerek pe edi?

Alena Ostrovskaıa

2015 jyly Alena Almatyǵa kelip, eski áriptester bolyp bas qosqan edik. Sonda Alena jaıdarly júzimen sýrettiń erekshe estelikke tunyp turǵanyn ári jurttyń ne oılaıtynynda, ne deıtininde sharýasy joq ekenin aıtqan. 

Aýdarǵan: Gúlim Jaqan