Bilim jáne ǵylym mınıstrligi ulttyq birińǵaı testileýge qatysty jıi qoılatyn suraqtardyń jaýabyn Facebook jelisindegi resmı paraqshasynda jarıalady dep habarlaıdy  Qamshy.kz aqparat agenttigi.  

Jalpy, 97 top bar. Oǵan bir nemese birneshe baǵdarlama kiredi. Toptar tizimi men olarǵa sáıkes pánder tizimin ulttyq testileý ortalyǵynyń saıtynan nemese vıdeodan (post sońynda) kóre alasyz.

UBT kezeńderi

Birinshi qadam: 20 maýsym men 5 shilde aralyǵynda aldyn-ala ótinim berip, test tapsyrasyz. Bıyl UBT men KT biriktirildi. Test tapsyrý oryndary tizimi Ulttyq testileý ortalyǵynyń saıtynda bar. Mektep burynǵydaı túlekterdi test tapsyrý ornyna aparyp-alyp kelýge jaýapty emes.

Ekinshi qadam: 13-20 shilde aralyǵynda bilim berý grantyna baıqaý ótedi. Oǵan UBT-dan ótip, jetkilikti bal alǵan jaǵdaıda ǵana qatysa alasyzdar.UBT

Úshinshi qadam: bilim berý toptaryn tańdaısyzdar.

"Birinshi jaǵdaıda: mysaly maýsym aıyndaǵy UBT kezinde siz "Bıologıa" + "Hımıa" boıynsha synaq tapsyrsańyz, bul pánderge tıesili 16 toptyń ishinen (tizimi UTO saıtyndaǵy vıdeoda kórsetilgen) ár túrli JOO-dan tórt bilim berý tobyn tańdaı alasyz. Árıne, top UBT-da tańdaǵan pánińizge saı kelýi kerek. Sizde mynadaı tańdaý bolýy múmkin: "Hımıa páni muǵalimi"; 2. "Bıologıa men aralas ǵylymdar"; "Veterınarıa"; "Jalpy medısına". Siz osy kórsetilgen tórteýin ǵana emes, on alty toptyń ishinen basqa bilim berý toptaryn da tańdaı alasyz.

Ekinshi jaǵdaıda: shyǵarmashylyq mamandyqqa tapsyratyn talapkerler grant baıqaýyna qatysý kezinde tek bir ǵana bilim berý tobyn tańdaı alady. Mysaly, "Aýdıovızýal quraldar men medıaóndiris" tańdaǵanda eki shyǵarmashylyq synaq tapsyrasyzdar. Bilim berý toptarynan tómendegi mamandyqtardy tańdaı alasyzdar: "Operatorlyq sheberlik"; "Baspa isi"; "Polıgrafıa".

Tórtinshi qadam: oqýǵa qabyldaý. Grant bilim berý toptaryna bólinedi. Al bilim berý baǵdarlamasyn (buryn bul "mamandyq" dep atalǵan) joǵary oqý ornyna barǵan soń tańdaısyz. "Mysaly, "Hımıa pániniń muǵalimi" boıynsha grantqa ıe bolsańyz joǵary oqý ornynyń bilim berý baǵdarlamalaryn qaraısyz. Aıtalyq, JOO-da "Hımıa" nemese "Hımıa-Bıologıa" degen bilim berý baǵdarlamalary bolsa - bireýin tańdaısyz", - dep túsindirdi mınıstrlik ókilderi. 

Oqýǵa qabyldaý kezeńi 10-25 tamyz aralyǵynda, on kúnge sozylady. Oqýǵa túskeni jaıly buıryq naqty bilim berý baǵdarlamasyna qaraı shyǵady. Keıin oqý bitirgen sol boıynsha dıplom beriledi.

Aqyly oqýǵa túsý Joǵary oqý ornyna aqyly túrde túspek bolǵan talapkerler úshin UBT-ny birneshe ret tapsyrý múmkindigi bar. 2019 jyldan bastap test qańtar, naýryz, maýsym jáne tamyz aılarynda ótedi. Ár kezde ár túrli pán tańdap test tapsyrýǵa bolady. UBT-2019 sertıfıkaty jyldyń sońyna deıin jaramdy. Osylaısha, joǵary oqý ornynyń aqyly bólimine qujat tapsyrǵan kezde qalaǵan páni boıy shekti bal jınaǵanyn rastaıtyn sertıfıkat usynasyz.

Granttar sany 2019-2020 oqý jylyna memleket 66 556 grant bólip otyr. Onyń 51 085-i bakalavrıatqa, 13159-i magıstratýra, 2312-i doktorantýraǵa (PhD). Osy másele boıynsha mınıstrlikte parlament depýtattary, "Atameken" UKP, tıisti memlekettik organdar, JOO qaýymdastyǵy jáne qoǵamdyq uıym ókilderiniń qatysýymen arnaıy otyrys ótti.